1 Lidan irumu disiwídü lidan larúeihan Hosafátü Hudá, ligía lagumeserun Horamü, le liráü Aabü arúeiha Ísüraeli, arúeihati giñe duusu irumu Samaria. 2 Mabuidunti lóuserun ligibugiñe Bungiu, gama lumoun mama saragu kei buga hóuserun lagübürigu, ladüga gidá lumuti dübü sagüráuti le lani Baali le meha ladügübei lúguchi. 3 Lau sun lira adüga lumuti figóu burí le meha ladügübei Heroboamü le liráü Nabatü, le burí aubei lafigougüdei Ísüraeli.

4 Mesá, le lurúeite Moabü, galügüniñati bugaha mudún gásutiha líchugun san-milu harahüñü mudún hama san-milu gábara lun lurúeite Ísüraeli. 5 Gama lumoun lárigiñe lounwen Aabü, aba liñuragun lurúeite Moabü lungua luagun lurúeite Ísüraeli. 6 Ligía láfuridunbei urúei Horamü Samariagiñe aban lóundaruniña sun lisudaranigu Ísüraeli. 7 Aba lóunahan lurúeite Ísüraeli ariñaga lun lurúeite Hudá: Iñuragua lurúeite Moabü lungua nuagun.

—Bídiba numa lun wageindagun luma?

Lariñaga lurúeite Hudá lun:

—Nídiba buma, au hau sun nisudaranigu, búmabadiwa hau sun bánigu. 8 Gama lumoun kábagia üma uéigiñe wábürüha luagun?

Lariñaga Horamü lun:

—Luéigiñe lémeri fulasu mageirawati Edomu.

Ábati láfuridun urúei Horamü Samariagiñe, aba labahüdüniña sun lisudaranigu Ísüraeli.

9 Ábati háfuridun lurúeite Ísüraeli, lurúeite Hudá luma lurúeite Edomu. Gama lumoun kei gasu lan hadügün aban geyeguaü luagu sedü weyu, aba lagumuchun haniñe súdaragu hama animaalugu duna. 10 Ábati lariñagun lurúeite Ísüraeli:

—Kamatia lanügüñadiwa Bungiu wagía ǘrüwa urúeigu lun lederegeruniwa houn Moábüna.

11 Aba lariñagun Hosafátü:

—Úati san aban lani Bungiu profeta ya, lun wálügüdahan luma Bungiu lídangiñe?

Ábati lariñagun aban hádangiñe lani lurúeite Ísüraeli úfisigu:

—Anihein Eliséu le liráü Safatü ya, le meha lúmañahabei Elíasi.

12 Aba lariñagun Hosafátü:

—Ñeinbei lunti lariñaguni lúmagiñe Wabureme.

Aba lidin lurúeite Ísüraeli, lurúeite Hudá luma lurúeite Edomu lumoun Eliséu furesegueina, 13 gama lumoun aba lariñagun Eliséu lun lurúeite Ísüraeli:

—Mánitina ni kata buma, beiba hamoun lani búguchi profetagu.

Lariñaga lurúeite Ísüraeli lun:

—Ua, ladüga lanügüñadiwa Bungiu lun wábürühan háhaburugun Moábüna.

14 Ábati lariñagun Eliséu lun:

—Fiñutina luagu Bungiu Suntigabafu le aríagu liñabei nun, luagu lun lan hamuga mineben lan Hosafátü le lurúeite Hudá nun, meberesegúntina hamuga bau, marihingubeitina hamuga buagun. 15 Barǘ humá aban gíñaahati nun!

Dan lagumeserunbei íñaaha, aba lebelurun lani Bungiu Sífiri lidoun Eliséu; 16 aba lariñagun Eliséu:

—Lariñahare Bungiu: Adüga humá saragu lagei duna lidan fulasu wayati le, 17 lugundun lau sun úabei lan garabali; marihin huguyame láhuyun huya, labuinchuba fulasu wayati le lau duna, ábame hatun sun huguya hau sun hibiñanigu. 18 Ani kei ni kata lan le lun le liyaraabei Bungiu adüga, ladüga bóugudin luéi lira, lederegerubaña Moábüna húhaburugun, 19 ábame hagünrinchaguni sun uburugu baríeiruati, sun uburugu wéiriguti, chaün humounme sun tídibu wewe to gintu ani geigúatu, darú humeime sun lísensen duna, buíngüda humeime sun le ñein lumuti lábunawagua nadü lau dübü.

20 Larugan binaafin, dan le óuraali lun lichugúniwa idewesei, aba liábingua duna Edomugiñe, aba labuinchun fulasu. 21 Sunti buga dan le, aganba hamaali buga Moábüna luagu añatebaña lan urúeigu lun hageindagun hama, aba hagúarun hawagu sun nibureintiña hama wügüriña ha gayaraati houdin asudaraha, aba houdin, aba híchugunu hakianpun lidan fadaguaü. 22 Dan le hásaarunbei larugan binaafin, ámiriha ligía weyu ligibuagu duna, aba harihini Moábüna duna dísegiñe kamá hamuga hitaü. 23 Ábati hariñagun:

—Hitaü le. Mosu ageindaguaaña lan urúeigu hámagua, aba háfaragun houngua. Moábüna, keimoun anügei katei le burí hígirubei wánime!

24 Gama lumoun dan hebelurunbei Moábüna tidoun hakianpun Ísüraelina, aba hábürühan Ísüraelina hawagun aba héibaahaniña aba háfaraguniña. 25 Lárigiñe aba hagünrinchaguni burí uburugu, buíngüda haméi fulasu le ñein lumuti lábunawagua nadü lau dübü darú haméi sun lísensen duna, áchuaha hamoun sun tídibu wewe to geigúatu tin. Uburugurügüñein Kirü-aresetü eredera rara. Gama lumoun aba hegeyedaguni achüühatiña chilinchádi, aba hagünrinchaguni.

26 Dan larihinbei lurúeite Moabü luagu leferidiruñein lan wuribu, aba lanügün sedü san súdaragu táutiña eféin lúmagua lun yebe hadaarun aban üma lun le ñeinhin lubéi lurúeite Edomu, gama lumoun siñá hamuti. 27 Ábati lanügüni le íbugañaü hádangiñe lirahüñü le yebe lunbei larúeihan leweñegua, aba líchuguni kei adagaragüdüni gudawarügüti luagu baríeiru. Gáñigüda lumutiña katei le Ísüraelina saragu, aba lubéi habudunu hakianpun, aba hagiribudun hageiroun.