1 Sedü irumu lau Hoasi dan le lagumeserunbei arúeiha, lagumesera lidan lisedün lirumudiri larúeihan Heú; aba larúeihan bián-wein irumu Herusalén. Siwiá tíribei lúguchu, Bérüsewana. 2 Buiti lóuserun Hoasi ligibugiñe Bungiu, lugundun fádiri bugaha Hoyadá arufudahabei lun. 3 Lau sun lira, magidarúntu burí hatenpulun gibe tubungiutegu, le ñein lubéi hasigira lílana fulasu adagaragüda luma águdaha kupali.

4,5 Luagu aban weyu, aba lariñagun Hoasi houn fádirigu:

—Óundara huméi sun seinsu le idewesei le ebeluruti tidoun litenpulun Bungiu, dandu seinsu le hafayeihabei kada gürigia, kei idewesei le híchugubei kada aban lau hagundan tidoun litenpulun Bungiu. Amuriaha huméi hámagiñe ha gamaniharibaña lau, lun laransehóun sun le mégeibei tuagu ténpulu.

6 Arúeihati Hoasi dagá wein-ǘrüwa irumu, ani maranserun hamagiru fádirigu ténpulu. 7 Ábati lagúarun urúei Hoasi lun fádiri Hoyadá, aba lariñagun lun:

—Ka uagu maranserun humagiru lubéi ténpulu? Lúmagiñe uguñe lun lubaruaguóun meresibirunhadün seinsu hámagiñe ha gamaniharibaña lau; ani le húmabei gasu híchuguni lun taranserun ténpulu.

8 Aba hánharun fádirigu lun meresibirunhaña lan seinsu hámagiñe gürigia, ani lun marihin hamá lau taranserun ténpulu. 9 Ábati lanügün fádiri Hoyadá aban bágüsi, aba ladügün aban huyu luagu tidáü, aba líchugunu luéigiñe lóunwenren latarü según lebelurúniwa tidoun litenpulun Bungiu; ábati híchaahani fádirigu ha óunigirubaña tubenari ténpulu sun seinsu le anügübei litenpulunrugun Bungiu ñeinhin. 10 Danha le harihin luagu gíbeyaali lan seinsu tidan bágüsi, aba liabin lani urúei abürühati, luma fádiri le íñutimabei, aba habahüdüni seinsu le tídanbei; aba híchuguni tidoun sagü, 11 lárigiñe habürüdüni átiriñein lan seinsu aba híchuguni houn ha arihubaña lau wadagimanu lun hafayeiruniña sarafangei, hama sun ha nadagimeinbaña tuagu litenpulun Wabureme, 12 kei burí ábunagutiña, nadagimeintiña dübü, luma lun lagañeihóun fulansu luma dübü lun taransehóun ténpulu, luma lun burí líbiri mégeiti. 13 Gama lumoun seinsu ligía le anügübei tidoun litenpulun Bungiu, mayusurúnti lun ladügün kopu le pülata, ni isiresi lun líbaahoun limechan lanpu, ni kopu wéinamuti, ni fidu; ni amu katei le lauti golu o pülata, 14 deregewarügüti houn ha arihubaña lau wadagimanu lun taransehóun litenpulun Wabureme. 15 Málügüdawaguntiña wügüriña ha únbaña lederegerúa seinsu lun hafayeihaniña nadagimeintiña ka lan hadügübei lau seinsu? Lugundun lau arumani hawadigimarida. 16 Ánheinti seinsu le idewesei luagu duru luma luagu figóu, manügǘnti ténpulurugun, ladüga haseinsun lan fádirigu.

17 Lidan dan ligía, aba lábürühan Asaeli le lurúeite Siria luagun Gatü, aba lárügüdüni, lárigiñe aba lidin kóntüra Herusalén. 18 Gama lumoun aba lanügüni Hoasi le lurúeite Hudá sun ílagu sagüráuti le buga híchugubei urúeigu Hosafátü, Horamü luma Okosíasi ha lagüchagu lidan arúeihani Hudá lun kultu; barüléi giñe le líchugubei, luma sun golu le adarirubei ténpulurugu luma tidan palasiu, aba lóunahani lun Asaeli, aba lararamuni Asaeli lageindagun luma Herusalén.

19 Le líbiri asusereduti lun Hoasi, luma sun burí katei le buga ladügübei, anihein bürüwañu tidan liliburuna asusereduti to hani lurúeitegu Hudá. 20 Aba heledegun lani guánarügü úfisigu lubá, aba háfaruni tidan muna to luágunboun aragachuni lun Siloun. 21 Hosakárü le liráü Simatü, luma Hosabádü le liráü Somerü ha lánigu úfisigu áfarubalin, lárigiñe aba hábununi luburuguterugu Dawidi; aba larúeihan Amasíasi le liráü leweñegua.