1 Dan laganbunbalin urúei Esekíasi katei le, aba ladaüragun daüguaü to furumiñeguarügü, arufudei ligarigu, aba lidin litenpulunrugu Bungiu. 2 Aba lóunahani Eliakímü le hábuti óunigirutiña palasiu, Sebüná hama fádirigu ha wéiyatimahañabaña lumoun profeta Isaíasi le liráü Amosu, 3 lun hariñagun lun luéigiñe lóubadina urúei: «Uguñe láuñadiwa íruni, abeichúni luma ǘnabuguni, kei aban würi to eferidiruti tere dan lachülürün oura lun tágurahan. 4 Aganbadügü láamugei Aburemei le Bubungiute dimurei le burí lariñagubei úfisi Asiriana le lóunahabei labureme lun lanabuni Bungiu le wínwanbei, ani labeichei hamuga luagu burí katei le laganbubei Bubungiute guánarügü. Adügabá lubeiti aban furíeigi hawagu ha añaheinguabaña».

5 Aba houdin lánigu urúei hagía arihei Isaíasi, 6 aba lariñagun Isaíasi houn lun hariñagun lun habureme: «Lariñahare Bungiu: "Manufudedabá luagu hanabagunina lumusuniña lurúeite Asiria. 7 Nadüga lun lachülürün aban uganu lumoun le lunbei lafosuruni lun lagiribudun lageiroun, ábame nadügün lun lounwen ñein afarúarügü" ».

8 Aba laganbun úfisi Asiriana luagu ñǘdünha lan lurúeite Asiria Lákisigiñe. Ábati lidin Herusaléngiñe, aba ladariruni lurúeite Asiria ageindagua hama lílana Libüná. 9 Ñein laganba lurúeite Asiria luagu anite lan Tiraka le lurúeite Etiopía ageindagua luma. Ábayati lóunahan lurúeite Asiria ariñaga lun Esekíasi le lurúeite Hudá: 10 «Bubungiute, le uágubei bemenigida, chouru lumuti bun luagu mábürühanbei lan Herusalén labun nubafu; gama lumoun mígiraguagüdaba bungua lun leyeedunibu. 11 Aganbaadibu luagu le hadügübei lurúeitegu Asiria lau sun fulasu burí le hagünrinchagubei. Buguyadigiame san esefura? 12 Sefu hamutiña funagia búngiugu gürigia lílana fulasu ha burí hagünrinchagubaña nagüchagu? Fulasu burí le Gosán, Arán, Résefü, hama lílana Betü-edén ha meha aganóubaña uburugu Telasárü? 13 Hagañagia lurúeite Amatü, lurúeite Arüpádü, lurúeite Sefarüwaimü, lurúeite Ená luma lurúeite Iwá?»

14 Aba lanügünu Esekíasi gárada to hederegeruboun óunagüleigu lun, aba laliihanu. Lárigiñe aba lidin ténpulurugu, aba látulerunu gárada ligibugiñe Bungiu, 15 aba lafurieidun, lariñaga:

—Aburemei, Lubungiute Ísüraeli buguya le íchugubalin bala hagibuagu kátaña garünatiña: Buguya Lubungiutebei sun arúeihani le ubouagubei; buguya adügübalin sielu luma ubóu. 16 Tenibá nun Nabureme, aganbabána. Fegebei bagu Nabureme, arihabá. Aganbabéi dimurei burí le lóunahabei Senakeríbü ariñaga nun, dimurei burí le anabagutibu buguya Bungiu le wínwanbei. 17 Inarüni Aburemei luagu günringua hamaaña lan lurúeitegu Asiria néchanigu lau sun hageira, 18 luagu giñe gudá hamaniña habungiutegu, ladüga lidan linarün aban katei, mama búngiugu hagía, kátañarügüñanu láutiña wewe o dübü, ha hadüga gürigia. Ligía hagünrinchagunbaliña. 19 Guentó lubeiti Wabureme, Wabungiute, sefubáwa luéi habafu, subudi hamaamugei sun néchanigu ha ubouagubaña luagu buguyarügüñein lan Bungiu.

20 Ábati lóunahan Isaíasi ariñaga lun Esekíasi: «Anihán le lariñagubei Aburemei le Lubungiute Ísüraeli: "Aganba naali furíeigi le badügübei nun luagu Senakeríbü le lurúeite Asiria" ».

21 Anihán dimurei burí le lariñagubei Aburemei luagu lurúeite Asiria:

«Uburugu Sión, ítara kei aban nibureintu,

éherahatu bau, Senakeríbü.

Ánhinha lumuti Herusalén lichügü adüga bula bau

dan le badisedun.

22 Kagia banabagubei, kagia banabubei?

Ka un biñurei bumalali?

Iñuraguabéi bagu lau pantaü?

Luagun Aburemei Sánduti le Lubungiute Ísüraeli!

23 Óunahatibu anabei Aburemei.

Bariñaga:

"Waritina lábulugun burí wübü,

tau nikarün lánina wuribu to gíbeboun

luagun liñun-agei Líwanu.

Chaün numuti burí hibúari le íñutimabei ñein

luma lubuidun-agei burí gudi.

Chülütina luagun burí lábulugu le íñutimabei,

luagun burí dabíara le lenege fuluri-agei.

24 Chigatina fusu,

gurá au lídangiñe duna ligía lidan fulasu terenchati,

mábeigüda numuti sun lidunari Ehiptu lau lábugiñe nugudi".

25 Ibidiñeti funagia bun luagu au lan Aburemeibei,

le aransehabalin burí katei le?

Lúmagiñe bugaha binarü naransehan lun nadügüni,

guentoti adüganá,

ligía bagünrinchagunbei uburugu burí le héreti,

aba bígiruni lidan günringuaü.

26 Lílana burí fulasu ligía, siñaguatiña houngua,

buin lau anufudei luma busiganu,

ñǘbuinhaña lun ítara haba lan kei híduru áraabu,

kei sagadi wurigili,

kei híduru burí le áhüchübei tábulugu muna

aba láguduni garabali le luéigiñeti oubaü le ñéingiñe lubéi laboucha weyu.

27 Subudi numuti sun bánhingichun luma sun badaagun;

subudi numuti luagu gáñihadibu lan numa.

28 Ani kei subudi nubalin bigañi luma banaagun bungua,

níchiga aban bángüli luagu bígiri, furenu biyumulugu,

ábame nagiribudagüdünibu lídangiñe üma le ñéingiñe lubéi biabin».

29 Ábati lariñagun Isaíasi lun Esekíasi:

«Anihánba seini lani katei le lunbei lasuseredun:

Lidan irumu le luma le lunbei liabin,

héigibei türigu le áhüchübei lungua,

gama lumoun lídanme lǘrüwan irumu

gayaraabei hábunagun, alubaha huguyame,

hábunagun beibei-agei lun héiginu tin.

30 Hame móunweguntiña hádangiñe lílana Hudá,

ítara haba kei nadü,

labouchuba hálagüle ábame hagindun.

31 Ladüga ñéinbaña hádangiñe erederutiña Herusalén;

ñéinbaña móunweguntiña luagu luwübüri Sión.

Lanarimeba línsiñehabu Bungiu Suntigabafu adügei katei le.

32 Lariñahare Bungiu libügürü lurúeite Asiria:

"Mebelubei Herusaléun,

machüübei ni aban gimara luagun,

mábürühanbei luagun lau idáü lauti gürabu

málugun ligíame lebelurun lidoun lubarieirun.

33 Lagiribuduba luéigiñememe üma le ñéingiñe lubéi liabin;

mebelubei lidoun uburugu le.

Au le Aburemei ariñagubalin.

34 Nóunigirubei uburugu le ani nesefurubei,

luagu nugudemehabu lun Dawidi le nubúein luma nuougua" ».

35 Áriebumeme ligía aba láfarun lani Bungiu ánheli san-gádürü-wein-seingü milu wügüriña tídangiñe hakianpun-agei Asiriana, larugan binaafin hilaguaaña súngubei.

36 Ábati láhulaagunu Senakeríbü kianpu-agei, aba lidin uburugun Níniwe. 37 Luagu aban weyu dan le ténpuluruguñein lubéi áhuduragua lun Nisüróku le lubungiute, aba hayabin Adüramélekü luma Sareserü ha lirahüñü aba háfaruni hilagubei aba hanurahan lóubawagun Ararátü. Aba larúeihan Esaradón le liráü leweñegua.