1 Luagu lanügün larúeihan Peka le liráü Remalíasi disedü irumu, ligía lagumeserun Aasi le liráü Hotamü arúeiha Hudá. 2 Wein irumu lau dan le lagumeserunbei arúeiha, aba larúeihan disisi irumu Herusalén; gama lumoun mabuidunti ligaburi ligibugiñe Bungiu, kei meha Dawidi; 3 falarügü lumuti hafigoun lurúeitegu Ísüraeli, darí lun lágudagüdüni liráü kei adagaragüdüni, le hóuserun lílana burí fulasu ha buga lasagarubaña Bungiu hagibugiñegiñe Ísüraelina. 4 Bóugudin luéi lira, dagagüdati, águdaha ligía kupali tidan hatenpulun gibe tubungiutegu, luagu wübü luma tábugiñe wewe.

5 Lidoun dan ligía, aba lidin Resín le lurúeite Siria luma Peka le lurúeite Ísüraeli Herusalén lun hageindagun hama lílana. Aba hegeyedaguni Aasi, gama lumoun siñá hamuti uburugu agañeira. 6 Ábati libihini lurúeite Edomu uburugu Elatü lárigoun lun Edomu; aba hayabin Edomuna, aba hasagaruniña Hudaana Elatügiñe, aba herederun aganawa ñein chülǘ lumoun dan le.

7 Ábati lóunahan Aasi ariñaga lun Tigülátü-Pileserü le lurúeite Asiria: «Au, ítara niña bun keisi aban bisaani. Ñǘbuinba lubeiti esefurana luéi lurúeite Siria luma luéi lurúeite Ísüraeli, ladüga añaha abusenra hiñuragun houngua nuagun».

8 Barǘ lumuti giñe Aasi pülata luma golu le tídanbei litenpulun Aburemei luma le tídanbei palasiu, aba lóunahani keisi idewesei lun lurúeite Asiria, 9 aba lúaradun lurúeite Asiria luma, aba lábürühan hau lánigu luagun Damasüku, aba lagañeiruni, lárigiñe, aba lasagaruniña ha aganóubaña ñein ñéingiñe, aba lóunahaniña uburugun Kirü, aba láfaruni Resín.

10 Danbei lidin urúei Aasi Damasüku, lun ladunragun luma Tigülátü-Pileserü le lurúeite Asiria, aba larihini latarü le ñeinbei. Ábati lóunahanu liyawa latarü ligía lun fádiri Uríasi. 11 Ábati ladügün Uríasi aban latarü kei lariñaguni urúei Aasi lun Damasükugiñe, aba lagumuchuni lubaragiñe lagiribudun urúei Aasi Damasükugiñe.

12 Dan lagiribudunbei urúei Damasükugiñe, aba larihini latarü, aba lidin, aba ladagaragüdün le gudawarügüti luagu, 13 aba láguduni kéigubeirügü idewesei le fulúaruauti, aba láwiyuruni idewesei le tauti diwéin luagun latarü, bahigualéi lita ladagaragüdün le lánina arandaruni luagun.

14 Le bugati latarü lauti buronse le tigibugiñebei lani Bungiu ténpulu, aba lagidaruni Aasi ñéingiñe, aba líchuguni luéigiñe nórute libiti le aban latarü, aban lerederun lamidangua le iseri latarü tuma ténpulu. 15 Lárigiñe aba líchugun urúei dimurei lun fádiri Uríasi lun luagu lan latarü le wéiribei lágudahei adagaragüdüni gudawarügüti le lánina binaafin luma idewesei le fulúaruauti le lánina rábounweyu, luma adagaragüdüni gudawarügüti luma idewesei le fulúaruauti le lani urúei, luma adagaragüdüni gudawarügüti luma idewesei le fulúaruauti tuma diwéin le hani lílana fulasu. Ariñagati giñe lun, lun labahichaguni latarü ligía lau hata sun animaalugu adagarawagüdütiña, gama lumoun anhein lan latarü lauti buronse, lúnrügüba lan lálügüdahan urúei luma Bungiu leseriwida.

16 Aba ladügüni fádiri Uríasi sun le lariñagubei urúei Aasi lun. 17 Lárigiñe aba líbuguni urúei Aasi fulansu le luágubei ebu, gidaléi óunwenbu lagei duna tuéigiñe hayawa bágasu wügüriña ha ágüdahabalin, aba líchuguni ligibuagu dübü. 18 Lun lagundaaraguagüdüni lurúeite Asiria, aba lagidaruni fulasu íñuguati le ñein lubéi lichugúa lálana arúeihani le ténpulurugubei lubá luéyuri emeraaguni luma bena le bóugudigiñebei le lúnrügübei urúei.

19 Le líbiri asusereduti lun Aasi, luma sun burí katei le ladügübei, anihein bürüwañu tidan liliburuna asusereduti hawagu lurúeitegu Hudá. 20 Dan lóunwenbei Aasi, aba labunún hama lagüchagu luburuguterugu Dawidi. Aba larúeihan Esekíasi le liráü leweñegua.