1 Lidan liduusun lirumudiri larúeihan Aasi le lurúeite Hudá, ligía lagumeserun Oseasi, le liráü Elá arúeiha Ísüraeli, aba larúeihan nefu irumu Samaria. 2 Gama lumoun mabuidunti ligaburi ligibugiñe Bungiu labu sun mama lan saragu kei híbiri urúeigu ha lubaabaña.

3 Aba lábürühan Sálümanasarü le lurúeite Asiria luagun Oseasi, aba lerederun lubúeinme, afayeiha ligía seinsu lun.

4 Gama lumoun aba lasandiruni Sálümanasarü luagu leledeguña lan Oseasi lubá, luma luagu óunahaali lan fiu gürigia lumoun So le lurúeite Ehiptu, luma luagu mafayeihanhali lan liseinsun gumadi sagü irumu. Ábati ladaürüni Sálümanasarü Oseasi; 5 lárigiñe aba lebelurun fulasurugún, aba lábürühan luagun Samaria, le ñein lubéi lageindagua luagu ǘrüwa irumu. 6 Luagu linefun lirumudiri larúeihan Oseasi, aba lárügüdüni lurúeite Asiria Samaria, aba lanügüniña Ísüraelina adaürǘwa Asiria, aba líchuguniña aganawa Ala, lóubawagu Aworu, duna Gosán, luma burí haburuguterugu Médiana.

7 Lasuseredunbei le, ladüga hafigouhan Ísüraelina ligibugiñe Aburemei le habungiute, le asagarubaliña Ehiptugiñe, sagaláña lábugiñegiñe lubafu urúei Ehiptuna, ani aba háhuduragun houn amu búngiugu, 8 adüga haméi katei le burí meha hadaagubei gürigia ha lasagarubaña Aburemei hagibugiñegiñe, luma burí le hadügagüdübei urúeigu Ísüraelina.

9 Ariñagatiña giñe Ísüraelina dimurei burí le moun lumuti hariñaguni luagu Aburemei le Habungiute, adaagua hagía hatenpulun gibe tubungiutegu lidan sun haburugute, dandu luagu burí wáyelesi le ñein habéi óunigirutiña, kei lidan burí uburugu baríeiruati. 10 Adügatiña burí guáriua tuma liyawa Asera luagu kada wübü, luma burí tábugiñe sun wewe hilumatu, 11 ani kei buga hagaburi gürigia ha lasagarubaña Bungiu hagibugiñegiñe águdahatiña kupali, adüga hagía burí katei mabuidunti agañidagüdei Bungiu. 12 Huduguatiña houn guáriuagu, katei le ueibei leweridiraña Bungiu.

13 Ariñagañahaali Bungiu hádangiñe profetagu houn Ísüraelina lun hígiruni luriban hagaburi, lun hagunfulirun lau lugumadin luma lilurudun le buga líchugubei houn hagüchagu hádangiñe lubúeingu ha profeta. 14 Gama lumoun madügüntiña gasu, lubaragiñe lira dererügütu hanigi kei hagüchagu ha buga memenigidunbaña luagu Bungiu le habungiute; 15 rútiña mebereseni lau lúrudu luma daradu le buga ladügübei Bungiu hama hagübürigu, luma gumadi le buga líchugubei houn. Falá hamaña búngiugu ha mebegitiña, le giñe aubei heferidirei hebegi, áyeiha hamaña gürigia ha geyegubaña hau, le ueibei leweridiraña Bungiu. 16 Ígira hamuti sun lugumadin Bungiu le Habungiute, aba hadügün biama hayawa bágasu lau buronse le arürüdaguagüdawarügüti tuma aban liyawa Asera, hudugua hagía houn sun waruguma ha siélubaña luma lun Baali. 17 Gudá hamutiña hasaanigu, adaagua hagía egesihani luma aríaagüdüni, aba híchaagun houngua lun hadügün wuribani agañidagüdei Bungiu.

18 Aba lubeiti lagañidun Bungiu lun Ísüraeli, aba lachagaruniña liñúarürugugiñe, aban lígiruniña hárügü lani Hudá türibu. 19 Gama lumoun magunfulirunti giñe Hudá lau lugumadin Bungiu, aba lafalaruni le meha hadügübei lánigu Ísüraeli. 20 Ábati lamaharun Bungiu houn sun ladügawagun Ísüraeli, aba lǘnabudagüdüniña lau lederegeruniña háhaburugun híwerutiña, darí lachagaruniña liñúarürugugiñe. 21 Aba lagidaruni Ísüraeli hádangiñe ladügawagun Dawidi, aba híchuguni Ísüraelina Heroboamü le liráü Nabatü urúeime, aba ladireiragüdüniña Heroboamü Ísüraelina luéi Bungiu, aba lanarimedun hafigouhan. 22 Ítara liña hadügüni Ísüraelina figóu burí le ladügübei Heroboamü, mígirun hamuti. 23 Lagumuhóun oura, aba lagidaruniña Bungiu Ísüraelina liñúarürugugiñe, ítara kei buga lariñaguni hádangiñe lánigu profeta hama lubúeingu, ítara liñati hanügǘn Ísüraelina keisi adaürütiña Asirioun, le ñein habéi chülǘ lumoun dan le.

24 Aba lanügün lurúeite Asiria gürigia Babilóniagiñe, Kútagiñe, Awagiñe, Amatügiñe, luma Sefarüwaimügiñe, aba líchuguniña aganawa Samaria heweñegua Ísüraelina. Ítara liña herederun gürigia hagía aganawa lidan burí luburugute Samaria. 25 Gama lumoun kei máhuduragun habéi gürigia hagía lun Bungiu, dan hagumeserunbei árügüdagua houngua fulasurugu, aba lóunahan Bungiu liñún hadoun aba háfaragun hádangiñe. 26 Ábati houdin ariñaga lun urúei: «Gürigia ha banügübaña aganawa lidan burí luburugute Samaria, ibidiñeti lubungiute fulasu le houn, ladügati libidiñe houn, óunahaali liñún hadoun ani háfaraguñanu liñún gürigia hagía».

27 Ábati lariñagun urúei: «Óunaha humá fiu fádirigu hádangiñe ha ñǘbuinbaña adaüra, lun houdin aganawa ñein arufudaha hamaamugei lilurudun lubungiute fulasu le houn».

28 Ábati lidin aban hádangiñe fádirigu ha asagarúbaña Samariagiñe aganawa Beteli, aba larufudahan houn lun háhuduragun lun Bungiu. 29 Gama lumoun kada néchani aba hadügün habungiute lidan uburugu le ñein lubéi haganawa, aba híchuguni tidan sanduariu to burí lídanboun fulasu íñuti to meha hábunaguboun Samariana. 30 Aba hadügün Babilóniana aban liyawa Sukotu-benotu; Kútana adüga aban liyawa Nerügáli, Amatüna adüga aban liyawa Asimá. 31 Ha Awaana aban liyawa Nibasi luma aban Tarütákü, ha Sefarüwaimüna aba hágudahaniña hasaanigu keisi adagaragüdüni lun Adüramélekü luma lun Anamélekü, ha habungiutegu. 32 Huduguatiña giñeha lun Bungiu, gama lumoun aba híchugun fádirigu hádangiñe guánarügü lun hafadirihan tidan burí hatenpulun gibe tubungiutegu. 33 Lau sun lubeiti adüga hamá kultu lun Bungiu huduguamémetiña houn habungiutegu ítara kei hadügüni lílana burí fulasu le ñéingiñe lubéi hanügawa.

34 Chülǘ lumoun dan le, adaagua hamagili katei burí le meha hadügübei, lugundun madügüntiña kultu lun Bungiu, méibugun hagía úaragua luma lilurudun, ni luma lugumadin ni luma larufudahan, le uágubei lariñaga houn ladügawagun Hakobu lun hagunfuliruni, ha uágubaña líchigei iri Ísüraelina. 35 Dan meha ladügünbei Bungiu aban daradu hama, ariñagati buga houn: «Madüga humá kultu houn amu búngiugu máhuduragun huguyame houn, madagaragüdün huguyame houn. 36 Núnrügüba, au le Hubungiute hadüga kultu, au le asagarubadün Ehiptugiñe lau óunwenbu nubafu. Núnrügüñein lun hadügün kultu, hudugua huguyame nun, dagagüda huguyame nun. 37 Gúnfuli huméi giñe nugumadin, narufudahan, luma nilurudun le níchugubei hun bürüwañu, madüga huma kultu houn amu búngiugu, 38 Mabulieida huméi daradu le meha nadügübei huma, máhuduragun huguyame houn amu búngiugu; 39 luéidigia nun, au le Aburemei le Hubungiute, ábame nesefurunün lábugiñegiñe habafu háganiñu».

40,41 Gama lumoun madügüntiña gasu, aba hasigirun adügei le binadu hagaburi, añaha adüga kultu lun Bungiu, añaha áhuduragua houn guáriuagu. Aba giñe hadügüni hadügawagun lememe hadügübei hagüchagu, ani ligiaméme hadügübei chülǘ lumoun dan le.