1 Luagu wein-ǘrüwa irumu lau larúeihan Hoasi le liráü Okosíasi Hudá, ligía lagumeserun Hoakasi, le liráü Heú arúeiha Ísüraeli, aba larúeihan Samaria luagu disedü irumu. 2 Gama lumoun mabuidunti ligaburi ligibugiñe Bungiu, adüga lumuti burí figouméme le buga aubei lafigougüdaña Heroboamü le liráü Nabatü Ísüraelina, madireirúnti luéi. 3 Aba lubeiti lagañidun Bungiu hama Ísüraelina, ábati lederegeruniña labun lubafu Asaeli le lurúeite Siria luma labun lubafu Ben-adadü le liráü Asaeli luagu saragu dan.

4 Ábati lafurieidun Hoakasi lun Bungiu, aba laganbuni Bungiu lafurieidun, lugundun ariha lumuti lidere dan le líchugubei lurúeite Siria houn Ísüraelina. 5 Aba líchugun Bungiu aban esefuragülei houn Ísüraelina, aba háfuridun lábugiñegiñe habafu Síriana, ábaya hagiribudun awinwanda darangilu hábiñe, kei buga furumiñe. 6 Lau sun lira madireirúntiña luéi hafigoun ladügawagun Heroboamü, le buga afigougüdübaliña Ísüraelina, ábameme hasigirun afigouha, rédeimemetu liyawa Asera Samaria.

7 Úaañameti buga amu súdara luma Hoakasi, haweidigia dimí-san súdara ha hawagutiña gabayu, diisi karü lánina wuribu, hama diisi-milu súdara ha éibutiña, ladüga günringualá meha lurúeite Siria.

8 Le líbiri asusereduti lun Hoakasi luma burí sun katei le bugaha ladügübei, anihein bürüwañu tidan liliburuna asusereduti to hani lurúeitegu Ísüraeli. 9 Danbei le lounwen, aba hábununi uburugu Samaria. Aba larúeihan Hoasi le liráü leweñegua.

10 Luagu darandi-sedü irumu lau larúeihan Hoasi, le lurúeite Hudá, ligía lagumeserun Hoasi, le liráü Hoakasi arúeiha Ísüraeli, aba larúeihan luagu disisi irumu Samaria. 11 Gama lumoun mabuidunti ligaburi ligibugiñe Bungiu, madireirúnti luéi sun figóu le buga aubei lafigougüdaña Heroboamü le liráü Nabatü Ísüraelina, aba lasigirun adügei.

12 Le líbiri asusereduti lun Hoasi luma sun burí katei le buga ladügübei, anihein bürüwañu tidan liliburuna asusereduti hawaguti lurúeitegu Ísüraeli. 13 Aba lounwen Hoasi, aba hábununi uburugu Samaria hama lurúeitegu Ísüraeli. Aba larúeihan Heroboamü leweñegua.

14 Wéiriti lisandi Eliséu, aba lidin Hoasi le lurúeite Ísüraeli arihei, aba layahun, aba lóuburuni, lariñaga lun:

—Núguchi, Núguchi, ítara biña kei likarün Ísüraeli, kei lumutuniña ha hawagutiña gabayu!

15 Lariñaga Eliséu lun:

—Barüba aban tebu gimara tuma fiu gimara.

Aba lanügün urúei aban tebu gimara tuma fiu gimara. 16 Ábati lariñagun Eliséu lun:

—Aransebá lun bachüürün aban gimara.

Sun anihán lan urúei adügei le lariñagubei Eliséu lun, aba líchuguni Eliséu lúhabu luagu lúhabu urúei, 17 aba lariñagun lun:

—Darabei funedera le luágunbei oubaü le ñéingiñe lubéi laboucha weyu.

Aba ladaaruni urúei, aba lariñagun Eliséu lun:

—Chüboun gimara guentó!

Aba lachüürünu urúei gimara. Ábati lagúaragun Eliséu ariñaga:

—Ligimaran Bungiu to lunboun tesefuhan! Gimara esefuhatu kóntüra Siria!

Buguya, báfaragubaña Síriana uburugu Afekü, ábame bagumuchun hau.

18 Lárigiñe aba lariñagun lun urúei:

—Ragüboun gimara.

Dan lárügüdünbarun urúei, aba lariñagun Eliséu lun:

—Bagayuaha luagu múa.

Aba lagayuahan urúei ǘrüwa wéiyaasu múarugu, aba lerederun lagayuahan. 19 Ábati lagañidun profeta luma, aba lariñagun lun:

—Lun hamuga agayuaha ban múarugu seingü o sisi wéiyaasu, báfaraguñanu hamuga Síriana darí bagumuchun hau; gama lumoun guentó, ǘrüwarügübei wéiyaasu bagañeiruni wuribu hawagu.

20 Aba lounwen Eliséu, aba labunún. Keiti sagü lan irumu hebelaagun Moábüna híwerutiña fulasurugún, 21 luagu aban dan, dan le hábunahaña lan Ísüraelina aban óunweti, dan harihin hayabin fiu hádangiñe híwerutiña hagía, aba háhuchuruni hilaali lidoun lumuaha Eliséu, aba houdin. Gama lumoun kei ladagarun hilaali ligía luagu labu Eliséu, aba láguyugun, aba lararamun.

22 Ruti Asaeli le lurúeite Siria lidere dan houn Ísüraelina lidan sun libagari Hoakasi. 23 Gama lumoun gudemehabuti Bungiu houn, ladüga buga lidaradun luma Abüraámü, Isaakü luma Hakobu, aba líchuguni larihin hawagun, máhati lagünrinchaguniña. Ani dagá lumoun dan le, madügün lumuti.

24 Aba lounwen Asaeli le lurúeite Siria, aba larúeihan Ben-adadü, le liráü leweñegua. 25 Ábati lasagaruni Hoasi le liráü Hoakasi uburugu burí le buga lanügübei Asaeli luéi Hoakasi le lúguchi lúmagiñe Ben-adadü. Aba lagañeiruni Hoasi wuribu luagu Ben-adadü ǘrüwa wéiyaasu, ábaya láguyugüdüni burí luburugute Ísüraeli lárigoun.