1 Ñeinñein bugaha aban gürigia gíriti Naamán, hábuti lisudaranigu lurúeite Siria, hínsiñeti lun urúei, lugundun gáñeigüda lumuti Bungiu wuribu lun Siria lídangiñe. Gama lumoun sánditi wügüri ligía, anihein lépüra luagu.

2 Ñéinñounti aban irahü hanügün Síriana Ísüraeligiñe adaüra, aba terederun eseriwida tun lúmari Naamán. 3 Ábati tariñagun irahü to tun tabureme:

—Lun hamuga lidin nabureme lumoun profeta le Samariabei, lareidaguña hamuga.

4 Aba lidin Naamán, aba labahüdaguni le tariñagubei irahü to lun urúei. 5 Aba lariñagun urúei lun:

—Magadiñeti, beiba, nóunahaba aban gárada lun lurúeite Ísüraeli. Ábati lidin Naamán barüina darandi milu murusun pülata, sisi-milu murusun golu tuma diisi sutu daüguaü, 6 barülóun giñe gárada lun lurúeite Ísüraeli to ídanboun lariñaga: "Danme beresibirunu gárada to, subudibéi luagu nóunahañein lan nubúein Naamán bun, lun bareidaguagüdüni lídangiñe lisandi".

7 Lárigiñe laliihanu lurúeite Ísüraeli gárada, aba laheiridagunu ladaüragun arufudei ligarigu, aba lariñagun:

—Bungiu funagia au, le íchugubei ibagari ani gidaléi, lóunahanbei le aban wügüri nun lun nareidaguagüdüni lídangiñe lépüra? Aríagu hiña lun luagu láluahaña lan nidurun?

8 Dan lasubudiruni profeta Eliséu luagu héiriguala lan urúei ladaüragun tadüga gárada tuguya, aba lóunahan ariñaga lun:

«Ka uagu baheiridaguoun badaüragun? Ñǘbuinla wügüri ligía numoun, subudi láamugei luagu anihein lan aban profeta ya Ísüraeli?»

9 Aba lidin Naamán tau likarün habu ligabayun, aba lararamagun tubenari luban Eliséu. 10 Gama lumoun aba lóunahan Eliséu ariñaga lun: «Beiba, ábame bachibagun bungua sedü wéiyaasu lidan duna Hordán, ábame bareidagun lídangiñe lépüra le buágubei».

11 Aba lagañidun Naamán, aba lidin ariñageina:

—Naritagun yebe luagu láfuriduba lan eresibirana, aba hamuga lamuriahan luma Bungiu le Lubungiute, aba hamuga láhuruduni lúhabu luagu nugumein, aba hamuga nareidagun. 12 Ma funagia buítimati duna Damasüku, Abaná luma Farüfárü sügǘ lau sun lidunari Ísüraeli? Siñati hamuga funagia nidin achibagua nungua lidan aba hamuga narumadun?

Aba lidin ñéingiñe lau saragu igañi. 13 Gama lumoun aba hayabin lubúeingu luagun, aba hariñagun lun:

—Wabureme, lun hamuga san aban lan katei hénrenguti lariñagubei profeta bun lun badügüni, madügün bumuti hamuga san? Kati uagu madügün bubalin le lariñagubei bun, le ménrengubei?

14 Aba lidin Naamán, aba labuluchun sedü wéiyaasu lidan Hordán, kei lariñaguni profeta lun, aba lerederun lura kei lura aban irahü, aba larumadun. 15 Ábati lidin urúei hau sun lánigu arihei Eliséu. Dan hachülürün lumoun, aba lariñagun Naamán lun:

—Chouru naali guentó luagu ua lan Bungiu lidan sun ubóu luéidigia uburugu Ísüraeli! Amuriahatina lubeiti buma lun beresibirun aban idewesei númagiñe.

16 Lariñaga Eliséu lun:

—Fiñutina luagu Wabureme le aríagubei nun, luagu meresibirun nubéi lan.

Lau sun léredun Naamán luagu, máhati Eliséu leresibiruni. 17 Ábati lariñagun Naamán lun:

—Ígirabati lun nanügün múa Ísüraeligiñe; lugundun míchugunha adina adagaragüdüni houn amu búngiugu, luéidigia lun Wabureme. 18 Ábanrügüñein katei namuriahan luma Wabureme lun feruduna lani nun: Lun danme lan lebelurun nabureme le urúei ténpulurugun lun láhuduragun lun Bungiu, lun lárügüdün luagu narüna, áhuduraguagüdaname tidan ténpulu tuguya, feruduna láamugei Wabureme lira nun.

19 Lariñaga Eliséu lun:

—Beiba darangilu.

Aba lidin Naamán ñéingiñe,

20 Aba lariñagun Geasí le lubúein Eliséu lúnguarügü:

—Ígirala Nabureme Naamán le Síriana lun lidin meresibirunga ni kata lídangiñe le lanügübei lun. Fiñutina luagu Bungiu luagu néibuga lan lárigi furese, ariha ka lan gayaraabei nibihin lúmagiñe.

21 Aba lidin Geasí lárigi Naamán, dan larihin Naamán anite lan lárigi, aba lararirun tídangiñe karü lun leresibiruni, aba lariñagun lun:

—Anihein san katei wuribati asusereduti?

22 Lariñaga Geasí lun:

—Ua, gama lumoun lóunahañadina nabureme ariñaga bun luagu sun liña lan hachülürün bián profetagu lumoun luéigiñe wübü Éfürain, busenti negeti bíchugun ǘrüwa-milu murusun pülata houn tuma bián sutu daüguaü.

23 Lariñaga Naamán lun:

—Fuleseibá nun barüba sisi-milu murusun pülata.

Aba léredun Naamán luagu lun lanügüni, aba ládaruni tidoun bián sagü úara tuma bián sutu daüguaü, aba lederegeruni houn bián hádangiñe lubúein lun hanügüni lubá lubá Geasí. 24 Dan hachülürün luagun wübü, aba lanügüni Geasí pülata le hanügübei musu, aba lareiduni múnada, aba lóunahaniña musu hárigoun. 25 Lárigiñe aba lidin arufudagua lungua lun labureme, aba lariñagun Eliséu lun:

—Halíagiñedibu san Geasí?

Lariñaga Geasí lun:

—Mídintina ni halía.

26 Gama lumoun lariñaga Eliséu lun:

—Dan le lararirunbei ítara gürigia tídangiñe likarün lun leresibirunibu, ñéinñadina buma lau nisaminan. Gama lumoun mama lóurate leresibirun seinsu tuma daüguaü, ni lun lagañeihóun bunaguaü, beibei-agei, mudún, bulu bágasu hama musu. 27 Ladagara lubeiti lépüra le meha luágubei Naamán buagu luma hawagu badügawagun lun súnwandan.

Dan lídinbei Geasí lúmagiñe Eliséu, aniheinhali lépüra luagu, haruti kei niewe.