1 Aba ladimurehan Eliséu tun lúguchu irahü le buga láguyuguagüdübei, aba lariñagun tun lun tidin aganawa lidan amu fulasu hau sun tílana tuban, lugundun ariñagaali lan Bungiu luagu ñeinbei lan aban óunwenbu ilamaü fulasurugu le lunbei ladurarun sedü irumu. 2 Aba taranserun, aba tadügüni le lariñagubei profeta tun: Aba tidin hau tílana tuban hamúanrugun Filistéana, aba terederun aganawa ñein luagu sedü irumu. 3 Dan lásügürün sedü irumu ligía, aba táfuridun hageiragiñe Filistéana, aba tidin lumoun urúei lun láguyugüdünu tuban luma tufulasun tun. 4 Ñeinñein urúei adimureha luma Geasí le lubúein Eliséu, lariñaga lun, lun labahüdagun lun luagu sun lubuiduniga katei le ladügübei Eliséu. 5 Dan le anihán lan Geasí abahüdagua lun urúei luagu láguyuguagüdüni Eliséu tiráü aban würi, ligía tachülürün würi tuguya amuriahoun tuban lau tufulasun luma urúei. Ábati lariñagun Geasí lun urúei:

—Uruei, anuhán würi tuguya, anihán giñe tiráü le láguyuguagüdübei Eliséu.

6 Aba lálügüdagunu urúei würi tuguya, aba tabahüdaguni tuáguti lun. Lárigiñe aba lariñagun urúei lun aban úfisi lun lederegerún sun tumegen würi tuguya tun, luma sun le larandarubei tumúan lúmagiñe táfuridun fulasurugugiñe darí lumoun dan ligía.

7 Lárigiñe aba lidin Eliséu uburugun Damasüku. Lidan bugaha dan ligía, sándiñein Ben-adadü le lurúeite Siria, aba lariñawagún lun luagu chülühali lan profeta. 8 Ábati lariñagun urúei lun Asaeli:

—Barüba idewesei, beiba arihei profeta. Bamuriahame luma lun lálügüdahan luma Bungiu anhein nareidaguba lubéi lídangiñe sandi le.

9 Aba lidin Asaeli arihei profeta, barüina ligía idewesei lídangiñe lubuidun-agei burí katei le Damasükubei lun hanagawagu bián-wein kameyu. Dan lachülürün ligibugiñe urúei, aba lariñagun lun:

—Lóunahañadina Ben-adadü le lurúeite Siria, le unbei ítara ban kei aban úguchili, álügüdabu anhein nege lareidaguba lubéi lídangiñe lisandi.

10 Lariñaga Eliséu lun:

—Beiba, bariñagame lun luagu lareidaguba lan, lau sun subudigüda laali lan Bungiu nun luagu lóunwememeba lan.

11 Sódini aba lerederun Eliséu aríaguei Asaeli, aba laribadun laritagun Asaeli. Lárigiñe aba layahun profeta. 12 Aba lariñagun Asaeli lun:

—Ka uagu bayahua nabureme?

Lariñaga Eliséu lun:

—Ladüga subudi numuti wuribani le lunbei badügüni houn Ísüraelina, bágudubei habarieirun, báfaragubaña nibureinhaña tau eféin áfaraguabañame irahüñü ñǘbürigiña, bóuguabeime haragei würiña dageinatiña.

13 Lariñaga Asaeli:

—Aban fugiabu ounli au! Ida luba hamugagia nadügüni katei le?

Lariñaga Eliséu lun:

—Arufuda laali Bungiu nun luagu buguyaba la lurúeite Siria.

14 Aba lidin Asaeli lúmagiñe Eliséu lumoun lurúeite, aba lálügüdüni urúei, lariñaga lun:

—Kagia lariñagubei Eliséu?

Lariñaga Asaeli lun:

—Lariñahare nun luagu bareidaguba lan.

15 Gama lumoun larugan, aba lanügün Asaeli aban gamisa, aba ladüdüragüdünu lau duna, aba líchugunu ligibuagu urúei, aba lounwen urúei. Lárigiñe aba larúeihan Asaeli leweñegua.

16 Lidan liseingün lirumudiri larúeihan Horamü le liráü Aabü, Ísüraeli, ligía lagumeserun Horamü, le liráü Hosafátü arúeiha Hudá. 17 Darandi biama irumu lau dan le lagumeserunbei arúeiha, aba larúeihan widü irumu Herusalén. 18 Gama lumoun falá lumuti hagaburi lurúeitegu Ísüraeli hama ladügawagun Aabü, lugundun hádangiñetu ladügawagun Aabü lúmari; mabuidunti lubeiti ligaburi ligibugiñe Bungiu. 19 Gama lumoun magünrinchagun lumuti Bungiu Hudá ladüga línsiñehabu lun Dawidi, le buga unbei lariñaga luagu ñeinbei lan aban lanpu durungu ligibugiñe súnwandan.

20 Lidan larúeihan Horamü, aba liñuragun Edomu lungua luagun lagumadihan Hudá, aba líchugun lurúeite ñein. 21 Ábati lidin Horamü Sairü tau sun likarün to lánina wuribu, aba lásaarun áriebu hau sun abugahatiña karü, aba hábürühan hawagun Edomuna ha buga egeyedagubaña hau, aba héibaaguagüdüniña. 22 Gama lumoun furiti Edomu lábugiñegiñe lugumadin Hudá chülǘ lumoun dan le. Furiti giñe uburugu Libüná lábugiñegiñe lugumadin Hudá lidan dan ligía.

23 Le líbiri asusereduti lun Horamü luma burí sun katei le buga ladügübei, anihein bürüwañu tidan liliburuna asusereduti hawaguti lurúeitegu Hudá. 24 Aba lounwen Horamü, aba hábununi luburuguterugu Dawidi. Aba larúeihan Okosíasi le liráü leweñegua.

25 Lidan liduusun lirumudiri larúeihan Horamü, le liráü Aabü, Ísüraeli, ligía lagumeserun Okosíasi le liráü Horamü, le lurúeite Hudá arúeiha. 26 Wein-biama irumu lau dan le lagumeserunbei arúeiha, aba larúeihan aban irumu Herusalén. Atalía tíribei lúguchu, ladügawagun Omurí, lurúeite Ísüraeli. 27 Falá lumuti Okosíasi ligaburi Aabü hau sun lánigu. Mabuidunti ligaburi ligibugiñe Bungiu ítara kei buga Aabü hau sun tílana luban, ladüga hádangiñetu liduheñu Aabü lúmari.

28 Adügati Okosíasi umadaguaü luma Horamü le liráü Aabü lun hageindagun luma Asaeli le lurúeite Siria uburugu Ramotu le lani Galaadü. Gama lumoun féridi lumuti Horamü wuribu hama Síriana, aba habuleseiruni, 29 aba lagiribudun uburugun Hesüreeli lun lagaranihóun lun lárigi habuleseiruni Síriana lidan wuribu luma Asaeli, le lurúeite Siria. Keiti sándiñein lubéi Horamü, aba lidin Okosíasi uburugu Hesüreeli arihei.