1 Lidoun meha dan ligía, aba lábürühan Esekíasi lau sandi, aba lidin profeta Isaíasi, le liráü Amosu arihei, aba lariñagun lun:

—Lariñahare Bungiu: "Ariñagabéi lagumuhóun burí katei le lunbei bariñaguni houn biduheñu, lugundun bounwe, mareidagunbadibu".

2 Aba lagarabaagun Esekíasi lau ligibu tóubawagun muna, aba lafurieidun lun Bungiu, lariñaga:

3 —Amuriahatina buma Aburemei, lun baritagun luagu ida liña lan neseriwidun bun lau úarani luma arumani, adüganéi le aubei bagundaara.

Aba layahuahan lau igarigu.

4 Lubaragiñeti láfuridun Isaíasi lidoun bürürü le tamidanguabei palasiu, aba lariñagun Aburemei lun:

5 —Giribubá, bariñagame lun Esekíasi le hábuti numutuniña: "Lariñahare Aburemei le Lubungiute Dawidi: Aganba naali bafurieidun, ani ariha naali giñe báguira, nareidaguagüdaadibu, ǘrüwame weyu lárigiñe le, gayaraahalime bidin litenpulunrugu Bungiu. 6 Níchiga keinsi irumu lanwoun bibagari. Buguya lau sun Herusalén, nesefurubadün luéi lurúeite Asiria. Nóunigirubei uburugu le luagu nugudemehabu lun nubúein Dawidi luma nuougua".

7 Aba lañoundaguagüdün Isaíasi igu, aba háfadarunu luagu lisandi urúei, aba lareidagun. 8 Álügüda laali bugati Esekíasi Isaíasi, lariñaga lun:

—Kábagia seini arufudei nun luagu lareidaguagüdübadina lan Aburemei, luma luagu gayaraabei lan nidin ténpulurugu lidan ǘrüwa weyu?

9 Lariñaga Isaíasi lun:

—Anihán seini le lunbei líchuguni Aburemei bun luagu lagunfulirubei lan lererun: Busentibu lawanserun lamuñounga diisi laini lubaruaguóun odi labakürün diisi laini?

10 Lariñaga Esekíasi lun:

—Ménrengunti lun lawanserun lamuñounga lubaruaguóun, le hénrengubei, lun labakürün.

11 Ábati lafurieidun profeta Isaíasi lun Aburemei, aba labaküragüdüni Aburemei lamuñounga diisi laini le buga awanselibei lidan luachin Aasi le lánina weyu.

12 Lidoun dan ligía, aba laganbun Merodákü-baladán le liráü Baladán, le lurúeite Babilónia luagu sándiñein lan buga Esekíasi, aba lóunahan gárada lun, luma aban idewesei hama fiu lóunagülegu. 13 Aba leresibiruniña Esekíasi, aba larufuduni lirisin houn, pülata, golu, ibiñein, garaba fínuti luma tagei lárumate, luma sun burí katei le lídanbei lagei. Úati ni kata lídangiñe sun le tídanbei palasiu luma le lídanbei larúeihan lun marufudunlani houn. 14 Ábati lidin profeta Isaíasi arihei urúei Esekíasi, aba lariñagun lun:

—Halíagiñe hayabin wügüriña ha, ka hariñagubei bun?

Lariñaga Esekíasi lun:

—Lídangiñe aban fulasu díseti hayabin, Babilóniagiñe.

15 Lariñaga Isaíasi lun:

—Kagia harihubei tidan bani palasiu?

Lariñaga Esekíasi lun:

—Ariha hamuti sun le tídanbei. Úati ni kata areidúañuti lun marufudun nani houn.

16 Ábati lariñagun Isaíasi lun Esekíasi:

—Aganbabéi ñunsu lúmagiñeti Bungiu le: 17 "Lachülürüba dan lun lanügǘn sun le tídanbei bani palasiu luma sun le hóundaragubei bagüchagu uburugun Babilónia. Meredebei ni kata ya. 18 Ñéinbaña giñe hádangiñe badügawagun anügǘtiña Babilónioun, ábame hasafunrún, ábame herederun keisi musu tidan lani urúei Babilóniana palasiu".

19 Laritagunti Esekíasi, luagu ñeinbei lan darangilaü luma achoururuni sun wínwanñu lan, aba lariñagun lun Isaíasi:

—Fuleseihabúti ñunsu le banügübei nun lúmagiñe Bungiu.

20 Le líbiri asusereduti luáguti Esekíasi, luma burí sun katei le ladügübei, luma luagu ladügüni fusu luma chanili lun lanügün duna uburugun, anihein bürüwañu tidan liliburuna asusereduti hawaguti lurúeitegu Hudá. 21 Dan lóunwenbei Esekíasi, aba larúeihan Manasési le liráü leweñegua.