1 Dan taganbunbei Atalía, to lúguchu Okosíasi luagu hilá lan tiráü aba táfaraguniña sun tílana luban urúei. 2 Gama lumoun aba tanügüni Hosewa, to liráü urúei Horamü, litu Okosíasi Hoasi, liráü Okosíasi hádangiñe híbiri lirahüñü urúei ha áfarawagubaña, aba taramuduni tuéi Atalía tau sun lúyawa lidan aban sónburu. Mafarúnti lubeiti, 3 aba lerederun Hoasi aramudagu tuma lúyawa tidan litenpulun Bungiu luagu sisi irumu. Sunti buga dan le, Atalía agumadihaboun fulasurugu.

4 Lidan lisedün irumu, aba lóunahan Hoyadá hawagu arüneigu, Keretüna hama óunigihatiña aba lebelaagüdüniña litenpulunrugun Bungiu. Ñein ladüga aban daradu hama lábugiñe fiñún, aba larufuduni Hoasi le liráü urúei houn. 5 Lárigiñe aba lariñagun houn:

—Anihán katei le lunbei hadügüni: Hafanreinragua lidan ǘrüwa sétanu; lerederame aban sétanu óunigira tidan palasiu lidan luéyuri emeraaguni; 6 ábame sétanu luéigiñe bena le Suru; leme aban luéigiñe lagumuhóun tubenari haban súdaragu. Ítara luba hóunigirunu palasiu lau dan. 7 Bián sétanu ha áfuridubaña lidan luéyuri emeraaguni, ábame hóunigirun tidan lani Bungiu ténpulu lurugabu urúei 8 Geyegu huba lau urúei, kada aban tau lárumate lúhaburugu, le áluguti lebelurun hidoun, lóunweba. Hídiba luma urúei le ñeinhin lumuti lidin.

9 Aba hadügüni arüneigu sun le uágubei lariñaga Hoyadá houn. Kada aban hádangiñe aba larihin hau luwügüriñan dandu ha ebelurubaña óunigira lidan luéyuri emeraaguni kei ha áfuridubaña, aba harufudagun houngua ligibugiñe fádiri Hoyadá. 10 Ábati lederegerunu fádiri arufun luma burí idáü lauti gürabu le meha lani urúei Dawidi le tídanbei litenpulun Bungiu houn arüneigu. 11 Aba hárügüdüni óunigirutiña habara lúmagiñe luéigiñe touba ténpulu le tóunwenren, dagá lumoun tubaünan, luma geyegua lau latarü, kada aban tau lárumate lúhaburugu lun hóunigiruni urúei. 12 Ábati lasagaruni Hoyadá liráü urúei, aba ladaürüni ridi luagu tuma sun ladaüragun urúei, lárigiñe láwiyurun garaba luagun, aba líchuguni urúeime. Lárigiñe aba hapouchuni súngubei háhabu, aba hagúaragun ariñaga:

—Gabagarilá urúei!

13 Dan taganbuni Atalía hagúarahan óunigirutiña hama híbiri gürigia, aba tidin litenpulunrugu Bungiu, le ñein habéi súngubei. 14 Aba tarihini urúei ñein lurugabu wagabu, kei échuni. Ñéinñanu ábutigu lóubagiñe hama íñaahatiña, añahati gürigia lau saragu ugundani íñaaha fidu. Ábati taheiridagunu Atalía tadaüragun, aba tagúaragun ariñaga:

—Garabaguaadün nuagun! Garabaguaadün nuagun!

15 Aba lariñagun fádiri Hoyadá houn arüneigu ha agumadirubaliña súdaragu:

—Sagá humóun bóugudin tuéi ténpulu, le asigirutu, áfara huméi tau gusiñu!

Kei ariñagaali lan buga fádiri lun máfarun hamanu turageirugu litenpulun Aburemei, 16 aba hárügüdünu, aba hasagarunu lídangiñe bena le ñéingiñe lubéi hebelura súdaragu ha háubaña gabayu tidoun lúbaana arúeihani, aba háfarunu ñein.

17 Lárigiñe aba ladügün Hoyadá aban daradu luma Bungiu, lílana fulasu lau sun harúeite, luagu hagíaba lan lánigu Bungiu. 18 Lárigiñe aba houdin litenpulunrugun Baali, aba hágurunu, günringua haméi latarü hama guáriuagu. Aba hadürürüni lichügü Matán le lufadirin Baali, ligibugiñe latarü. Lárigiñe, aba líchugun fádiri óunigirutiña litenpulunrugu Bungiu; 19 lárigiñe aba lagúarun houn arüneigu, houn Keretüna, houn óunigirutiña luma houn sun lílana fulasu, aba houdin súngubei luma urúei lúmagiñe litenpulunrugugiñe Bungiu, chülǘ tidan palasiu, aba hebelurun luéigiñe habenari óunigirutiña. Aba lañuurun Hoasi luagu lala urúei, 20 aba hagundaarun sun lílana fulasu. Keiti buga afarúa tan Atalía tau eféin tidan palasiu, aba lerederun uburugu lidan darangilaü.