1 Anihán burí lagumuhóun lererun Dawidi:

«Ariñagaali buga Dawidi, le liráü Hesé,

wügüri le iñuragua láalibei Wabungiute,

urúei le lanúadirubei Lubungiute Hakobu,

le eremuhabei uremu Ísüraeli:

2 "Adimurehati lani Wabungiute sífiri nídangiñe;

anihein lererun tuagu niñeñe.

3 Adimurehaali Lubungiute Ísüraeli;

ariñagaali le óunigirubalin Ísüraeli nun:

Le abuguruti gürigia lau úarani,

le abuguruti lidan linebenwa Wabungiute,

4 ítara luba kei larugounga le lánina larugadun,

kei laruni weyu lidan aban binaafin

le ñein lumuti ua lan huánriñu,

le aweiridagüdübalin híduru lárigiñe huya".

5 Ligía deregüdagu haña lubéi nadügawagun luma Nubungiute,

ladüga adügaali aban daradu magumuchaditi numa,

aban daradu le chóuruti.

Ruti agañeiruni le gumuti nun

adüga ligía lun lagunfulirun sun nayumahan.

6 Ánhañati sun ha salufuribaña,

Ítara haba kei hiiyu hulawaali,

le úabei ni aban árügüdüti lau lúhabu.

7 Le busenti laguuruni gasu láguruni lau somu katei,

mama lau lúhabu,

o lachagaruni lan wáturugun lun lágudun sunsuinagubei».

8 Anihán hiri lisudaranigu Dawidi ha ganigitimabaña: Isü-bosetü, le Akümónna, hábuti ǘrüwa ha ganigitimabaña, luagu aban dan áfarati widü-san wügüriña hilagubei lau larufunte. 9 Eleasárü, le liráü Dodó, le libari Aoí, aban hádangiñe ǘrüwa ha ganigitimabaña. Ñeinñein bugaha luma Dawidi Pasü-damimü, dan le hóundaragunbei Filistéana ñein lun wuribu, aba hadisedun Ísüraelina. 10 Anhein ligía aba lerederun áfaraha Filistéana darí lun labuchadun luagu lúhabu, aba lerederun lúhabu ragüñu tuagu lefeinte. Ruti Wabureme aban óunwenbu agañeiruni houn weyu ligía. Lárigiñe aba houdin súdaragu Ísüraelina lárigi Eleasárü lúnrügü herederun lau le hanügübei hawéi áganiñu.

11 Lárigiñe Eleasárü, Samá, liráü Agé, le Ararátüna. Dan le hóundaragunbei Filistéana uburugu Lei, le meha ñein lubéi ichari lau lenteha, aba héibaagun Ísüraelina hawéi. 12 Gama lumoun aba lararamun Samá lamidangua ichari, aba láfaraguniña Filistéana. Ítara liña lagañeiragüdüni Wabureme.

13 Luagu aban dan, lidan lidaani alubahani, aba houdin ǘrüwa hádangiñe darandi ha ganigitimabaña adunragua luma Dawidi lagadábugiñe dübü Adulámü. Ñéinñanuti súdaragu Filistéana luagu fulasu wayati Refaímü. 14 Ñeinñein Dawidi lidan uburugu baríeiruati, úara luma ñéinñanu lan aban sétanu Filistéana Belén. 15 Aba lariñagun Dawidi:

—Ñéindügü láamuga íchuguti duna le lídangiñeti fusu le Belenbei nun lun natun.

16 Ábati hebelurun ǘrüwa ha ganigibaña le ñeinhin habéi Filistéana, aba hadaburun duna lídangiñe fusu le ñeinbei lubenari Belén, aba hanügüni lun Dawidi. Gama lumoun máhati látuni; aba láturuni kei idewesei lun Wabureme, 17 lariñaga:

—Sefulána Wabureme luéi nátuni! Kéigubeirügü hamuga nátuñein lan hata wügüriña ha, ha áhurerubalin habagari lun houdin adaburei.

Ǘrüwa ganigitiña hagía adügübalin katei le.

18 Awisái le líbugaña Hoabü, le liráü Seruiá, ligía meha hábutibei darandi ha ganigibaña. Luagu aban dan áfarati ǘrüwa-san wügüriña hilagubei lau larufunte. Ítara liña lagañeirun lubuidun iri hadan darandi hagía, 19 aba libihin uéiriguni sügǘ hau sun hagía, chülüti lun hábutibei lan. Gama lumoun machülüti lun ítarabei lan kei ha furumiñetiña ǘrüwa.

20 Benaíasi, le liráü Hoyadá le lílana Kabüséeli, aban meha giñe wügüri ganigiti, adügati saragu katei wéiriguti. Ligía áfaragubaliña bián lirahüñü Arieli le Moábüna. Luagu aban weyu dan le lábürühaña lan niewe, aba lararirun lidoun aban huyu, aba láfarun aban liñún ñein. 21 Áfarati giñe aban Ehiptuna gágubuti, lauñein aban arufun Ehiptuna ligía: Aba lidin Benaíasi luagun lau aban wewe, aba lanügüni larufunte luéi, aba láfaruni tau. 22 Lau katei le, aba libihin Benaíasi lubuidun iri hadan darandi ganigitiña; 23 ibihati uéiriguni sügǘ hau, gama lumoun machülüti kei ha furumiñetiña ǘrüwa. Aba líchuguni Dawidi hábutime súdaragu ha óunigirubalin Dawidi.

24 Hadan darandi ganigitiña hagía, ñeinñein: Asaeli, le lamulen Hoabü; Elanán le liráü Dodó, le Belenna; 25 Samá le Aroduna; Eliká le giñe Aroduna; 26 Elesi, le Palütína; Irá le liráü Ikesi, le Tekoana; 27 Abieserü le Anatótuna, Siwekái, le Úsana; 28 Salümón, le Aoita; Maarai, le Netofána; 29 Éledi, le liráü Baaná, Netofána giñe; Itái, le liráü Ribái, le Gibeana, le lumúanrugubei Benhamín; 30 Benaíasi, le Piratónna; Idái lílana liraüraü lidunari Gaasü; 31 Abí-alübón, le Arübátüna; Asümáweti, le Baurimüna; 32 Eliabá, le Saalübónna; lirahüñü Hasén; Yónatan; 33 Samá, le Ararátüna; Ayamü, le liráü Sararü, le giñe Ararátüna; 34 Eliféletü, le liráü Aasübái, le liráü le Maakana; Eliamü, le liráü Aitoféli, le Gilona; 35 Esürái, le Karümélina; Paarái le Arüwáana; 36 Igali, le liráü Natán, le Sobana; Baní le Gádüna; 37 Sélekü, le Amonna; Naarái, le Beerotuna, le lídeha Hoabü le liráü Seruiá; 38 Irá luma Garebü, ha Hatirüna, 39 luma Uríasi le Étüna. Darandi-sedü wügüriña hadan súngubei.