1 Dan laganbunbei Isü-bosetü le liráü Saulu luagu hilá lan Ábünerü uburugu Ebürón, aba leferidiruni luguraasun sunsuinagubei, aba habuinchun sun gürigia Ísüraeli lau anufudei. 2 Ñéinñanu bián hábutigu híwerutiña eseriwidutiña lun Isü-bosetü. Baaná liri aban, Rekabü liri le aban. Lirahüñü Rimón le Beerotuna, ladügawagunti Benhamín, lugundun ha lílana Beerotu, abahüdǘwatiña kei lani Benhamín türibu, 3 lau sun buga anuraha hamá Beerotuna uburugun Gitaimü, le ñein lubéi haganawa kei terencha chülǘ lumoun dan le.

4 Anihein méhati aban liráü Yónatan gíriti Mefi-bosetü, danimati luéigiñe biángubei lugudi. Dan meha seingü lan irumu lau Mefi-bosetü, ligía meha lachülürün uganu Hesüreeligiñe luagu hóunwegun Saulu luma Yónatan; ábati tanügüni lúyawa Mefi-bosetü, aba téibaagun anuraha lau, gama lumoun lidan tóufudahan lau, aba léiguadun, aba lerederun danimañu.

5 Aba lidin Rekabü luma Baaná ha lirahüñü Rimón le Beerotuna lúbiñe Isü-bosetü, hachülüra ñein lidan oura létima lueirin lárouga, dan le larumuguña lan Isü-bosetü le lánina rábounweyu. 6 Ñeinñoun yebe to óunigiruboun abudaha türigu, gama lumoun lagumuhóun oura, aba giñe tarumugun, ítara liña gayara lan hebelurun Rekabü luma Baaná marihínga. 7 Dan hebelurunbei, roun liña Isü-bosetü ligabananrugu; ábati háfaruni, aba hadürürüni lichügü, aba hanügüni lichügü hámagua, aba héibugun sun áriebu ligía Arawáun, 8 lun hederegeruni lun Dawidi uburugu Ebürón. Hariñaga lun:

—Anihán lichügü Isü-bosetü, le liráü Saulu, le meha hágani, le meha busenbei yebe láfarunün hilagubei. Gama lumoun guentó, fáyeigüdaba Saulu hama ladügawagun luagu le hadügübei bun.

9 Lariñaga Dawidi houn:

—Fiñutina hun luagu Wabureme le sefu láadinabei lídangiñe sun idiheri, 10 luagu dan lan le liábinbei aban lau uganu nun luagu hilá lan Saulu, laritagun yebe luagu uganu lan buiti lanügübei nun, aba nadaürüni, aba náfaruni uburugu Sikülágü. 11 Nadügatimabei hun salufuritiña huguya le, luéigiñe háfarun aban wügüri madurunti dan le roun liña lan lúbiñe guánarügü! Nafayeiragüdaadün lubeiti luagu lounwen! Nagidaraadün ligibuagugiñe ubóu le!

12 Aba lariñagun Dawidi houn lani úfisigu lun háfaraguniña, aba háfaraguniña; aba hadürürüni biángubei háhabu luma hagudi, aba hadibiragüdüniña lurugabu lufusun Ebürón. Lárigiñe aba hanügüni lichügü Isü-bosetü, aba hábununi uburugu Ebürón lidan lumuaha Ábünerü.