1 Fiu dan lárigiñe, aba lagañeiruni Dawidi wuribu hawagu Filistéana, aba lagidaruni ubafu hawéi. 2 Gañei lumuti giñe wuribu hawagu Moábüna, aba larounragüdüniña múarugu, aba lamisurahaniña tau aban fítaru; ha erederutiña tabadinagua bián fítaru aba háfarawagun, ha erederubaña labadinagua ábanrügü fítaru aba higirún wínwanñu. Ítara liña herederun Moábüna lábugiñe lubafu Dawidi, aba gasu lan hafayeihan liseinsuna gumadi lun.

3 Gañei lumuti giñe Dawidi wuribu luagu Adadü-éserü, le liráü Reobu, le lurúeite Sobá, dan le yebe lárügüdayaali lan lugumadin luagu duna Éufüratesi. 4 Aba ladaürüniña Dawidi milu-sedü-san súdaragu ha hawagutiña gabayu hádangiñe, hama wein-milu ha éibugarügütiña; aba giñe láhalahani hagudi sun gabayu ha achawahabarun karü to lánina wuribu, ígira san gabayu tun san karü.

5 Ábati hayabin Síriana Damasükugiñe lun híderaguni Adadü-éserü le lurúeite Sobá, gama lumoun aba lagañeiruni Dawidi wuribu hawagu Síriana, aba láfarun wein bián milu hádangiñe. 6 Lárigiñe aba líchugun Dawidi súdaragu Siria le lani Damasüku, aba herederun Síriana lábugiñe lubafu, aba hafayeihan liseinsuna gumadi lun. Sun lubeiti le ñein lumuti lidin Dawidi gáñeigüda lumuti Wabureme.

7 Lárigiñe aba lerederun Dawidi lau burí idaüdinaü lauti golu le hayusurubei lani Adadü-éserü úfisigu, aba lanügüni Herusaléun. 8 Rédeiti giñe lau saragu buronse uburugugiñeti Beta luma Berotái, bián uburugu le meha lani Adadü-éserü.

9 Dan laganbunbei Toi le lurúeite Amatü luagu gáñeila lan Dawidi wuribu hawagu sun lisudaranigu Adadü-éserü; 10 aba lóunahani Horamü le liráü lau ílagu lauti pülata, golu, luma buronse lun líchuguni lun Dawidi luéigiñe lageindagun luma lagañeiruni wuribu luma Adadü-éserü, ladüga awuribuhaali meha giñe Toi luma. 11 Aba lederegeruni Dawidi sun ílagu le lun Wabureme úara luma golu luma pülata le buga lederegerubei lun, le lanügübei lídangiñe sun fulasu le lagañeirubei: 12 Edomu, Moabü, Amünón, hámagiñe Filistéana, Amaléküna luma lídangiñe le lagidarubei luéi Adadü-éserü le liráü Reobu le lurúeite Sobá wuriburugu.

13 Aba laganbahoun saragu luagu Dawidi. Dan le lagiribudunbei lárigiñe lagañeiruniña Síriana, aba láfaragun disiwídü-milu Edomuna luagu fulasu wayati le gíribei Salu. 14 Lárigiñe aba líchugun súdaragu lidan sun Edomu, aba herederun sun Edomuna lábugiñe lubafu Dawidi. Ábaha lagañeiragüdüni Wabureme le ñein lumuti lidin.

15 Arúeihati Dawidi Ísüraeli lau úarani luma irichaü houn sun lílana fulasu. 16 Hoabü le liráü Seruiá ligía hábutibei súdaragu, Hosafátü le liráü Ailudu, ligía lánibei urúei eweridihati. 17 Sadoku le liráü Aitubu, luma Aimelekü le liráü Abiatárü, hagía fádirigubaña; Seraíasi ligía abürühatibei, 18 Benaíasi le liráü Hoyadá ligía haubei Keretüna hama Peletüna. Fádirigu meha lirahüñü Dawidi.