1 Aba lásügürün bián irumu. Luagu aban weyu aba gewenedü lan urúei rara liña lan laru duna le gíribei Nilu, 2 aba háfuridun sedü bágasu dibunetiña ani buíduburitiña dúnarugugiñe, aba heigin híduru labadinagua maburu. 3 Hárigi aba háfuridun sedü bágasu wuribatiña ani dúreitiña dúnarugugiñe, aba hararamun laru duna harugabu ha buga híbiri. 4 Lárigiñe aba héiginiña bágasu ha dúreibaña ha dibunebaña.

Aba lagagudun urúei. 5 Gama lumoun ábaya larumugun urúei, ábaya gewenedü lan larihin sedü lugule türigu ma lubuidun burí ginti giñe, gama lumoun sédügubei luáguñein ábanmeme ugudinaü. 6 Lárigiñe aba liabin sedü limu mábeiti churá laali ligarabalin nuru, 7 aba léigini limu le minbei sedü le ginbei.

Aba lagagudun urúei, aba lasubudiragun lungua luagu luénedü lan. 8 Gama lumoun larugan binaafin lauñein idiheri, aba lóunahan hawagu sun garíaahatiña hama chu tau ha Ehiptubaña. Dan le labahüdaguni urúei luénedü houn, úati ni aban gayara lumuti lanichigu ariñaga lun. 9 Ábati lariñagun hábuti eseriwihatiña diwéin lun urúei:

—Haritaguaadina luagu adügaadina lan wuribati. 10 Dan meha le hagañidunbei numa labu luma hábuti adaagutiña fein, aba hóunahaniwa tidoun lufurisun hábuti óunigirutiña. 11 Luagu aban áriebu, aba gewenedü lan hábuti adaagutiña fein aban uénedü, gewenedü au aban, kada uénedü lau lanichigu lungua. 12 Ñein furisunrugu, ñeinñein aban wügüri nibureingili wama ebüréu, lumusun hábuti óunigirutiña. Aba wabahüdaguni wawenedü lun, aba lariñaguni lanichigu woun. 13 Aba lasuseredun ítara kei lariñaguni woun! Au aba nagiribudun nárigoun lidoun nuadigimari, le aban aba látigiruniwa.

14 Aba lóunaagüdün urúei luagu Hosé, aba hasagaruni furese furisunrugúgiñe, aba lasarúniwa, sánsigua ligía, aba lidin lun urúei. 15 Lariñagati urúei lun:

—Gewenedütina aban uénedü, ani úati ni aban ariñaguti lanichigu nun; gama lumoun aganbaadina luagu dan lan le baganbun aban uénedü, gayara bani lanichigu asagara.

16 Lariñaga Hosé lun:

—Mama nídanñein lira; gama lumoun lóunabubadün Bungiu warúeite luagu hufulesein.

17 Lariñaga urúei lun Hosé:

—Lidan nuénedü raraníña laru duna le gíribei Nilu, 18 aba háfuridun sedü bágasu dibunetiña dúnarugugiñe ma habuidun burí, aba heigin sagadi labadinagua maburu. 19 Aba háfuridun sédüya bágasu hárigi ma hariban burí ma hadurein. Marihinñahagidina buga bágasu wuribaburitiña kei hagía lidan sun Ehiptu! 20 Aba héiginiña bágasu ha dúreibaña ha furumiñetiña sedü, ha buga dibunebaña, 21 gama lumoun lárigiñe héiginiña, menege lumuti luagu hóuhaña lan, dúreimemegiña kei buga lubaragiñe héiginiña. Aba nagagudún, 22 gama lumoun ábaya narumugun, ábaya gewenedü nan labouchun sedü lugule türigu luagu ábanmeme ugudinaü, ma lubuidun burí, ginti. 23 Lárigi ábaya labouchun sédüya lugule mábeiti, bürüburiti churá laali ligarabalin nuru. 24 Aba léigini ugulei burí le mábeibei le buídumeraüburibei. Aba nabahüdaguni houn garíaahatiña, úati ni aban hádangiñe ariñaguti lanichigu nun.

25 Lariñagati Hosé lun urúei:

—Biángubei uénedü le huénedübei urúei ábanmeme. Lariñaguñein Bungiu hun kaba lan ladüga. 26 Sedü bágasu buíduburitiña hagía sedü irumu, kéigubeirügü giñe sedü limu buíduburiti ligía, sedü giñe irumu, ábanmeme uénedü. 27 Sedü bágasu dúreitiña ha áfuridubaña hárigi ha dibunebaña, sedü giñe irumu; kéigubeirügü sedü limu mábeiti le churá laalibei ligarabalin nuru. Sédübei irumu lau ümi. 28 Ítara liña kei nariñaguni hun urúei. Subudigüda laali Bungiu hun le lunbei ladügüni. 29 Liábinba sedü irumu lau saragu éigini lidan sun Ehiptu. 30 Lárigiñeme ábame liabin sedü irumu lau ümi. Úaañame aritagutiña luagun buga sedü irumu le gibe lubéi éigini Ehiptu, ladüga lañawarihabei ümi fulasu. 31 Wéiribei ümi le lunbei liabin darime lun merede lan lárigirugu liibe éigini le buga lubaabei. 32 Gewenedü lumuti warúeite ábanmeme uénedü bián wéiyaasu, ladüga anihein lidan Bungiu lun ladügüni katei le, ani ladügübei furese.

33 Buiti hamuga lubeiti lun lálugun warúeite aban wügüri le chu tau lun ligía lan gamanihari lau ageiraü. 34 Anihán le lunbei ladügüni warúeite: Óunaha laña warúeite agumadihatiña lun houdin lidan sun ageiraü Ehiptu lun hóundaruni seingü lídangiñe sun le alubahóuti Ehiptu lidan sedü irumu le lánina liibe éigini. 35 Lun hóundaraguni sun türigu le lánina irumu burí buiti le lunbei liabin, híchigeimeti lidan aban fulasu lábugiñe laríaahan warúeite, hareideime lidan burí uburugu lun héigagüdüniwa gürigia. 36 Ítara luba areidúañu lan türigu lun hageira, móunwegun hamaamuga gürigia halama lidan sedü irumu lau ümi le lunbei ñein lan Ehiptu.

37 Gúndaati urúei hama sun lánigu lau le lubeibei Hosé, 38 aba lubeiti lariñagun urúei houn:

—Wadariruba funa san aban wügüri kei le, le lauti lani Bungiu sífiri?

39 Lariñagati lun Hosé:

—Úati ni aban chu tau buéi, ladüga subudigüda laali Bungiu sun katei le bun. 40 Buguyaba gamanihari tau lúbaana narúeihan, sun lílana fulasu hóudiba lau le bubeibei. Áurügübei wéirigu buéi ladüga au lan urúeibei. 41 Ru naadibu kei gumadan lidan sun Ehiptu. Dan lariñaguni urúei katei le.

42 Aba laragachuni lubagün le gawagubalin seyu lánina larúeihan, aba ladaürüni luagu Hosé. Aba lariñagun lun hadaüraguagüdüni tau daüguaü to tautu gamisa to fínutu, ani lun ladaürǘn aban iñari golu luagu ligiina. 43 Lárigiñe aba lawariragüdüniwa tidoun tubuidun-agei karü tárigiñe lugune urúei, aba líchugun lúrudu lun hagúarahan lubá lubá: «Ru humá üma!» Ítara liña lerederun Hosé gumadanme lidan sun Ehiptu. 44 Lárigiñe, aba lariñagun urúei lun:

—Lau sun au lan urúeibei, úati ni aban lun lánhingichun aban ifingaü lidan sun Ehiptu míchuga buguya üma.

45 Aba líchugun urúei liri Hosé le iri Ehiptuna: Safenátü-panéa, aba lamarieidagüdüni tuma Asenátü, to liráü Potifera le fádiri uburugu On. Ítara liña lerederun Hosé alidihei Ehiptu. 46 Darandi meha irumu lau Hosé dan le hanügünbalin ligibugiñoun lurúeite Ehiptu. Aba lafanreinragun Hosé luma urúei, aba lagumeserun éibugei sun Ehiptu. 47 Aba líchugun múa saragu éigini lidan sedü irumu le lidaani líbenouga éigini, 48 aba lóundaruni Hosé sun türigu le lídanbei sun Ehiptu lidan sedü irumu ligía, aba lareiduni lidan burí uburugu, ígiralei burí le abudahóubei lidan áraabu le burí yarafabei lun kada uburugu ñein. 49 Óundarati Hosé türigu kamá hamuga sagoun, le liibe. Gíbeyaali darí lun mamisurahan laali lan, siñá giñe labahüdǘn.

50 Lubaragiñebei lagumeserun lidaani ümi, garahüñüti Hosé bián irahüñü tau Asenátü to lúmari. 51 Aba líchugun Manasési luagu furumiñeti, lariñaga:

«Bulíeigüda laali Bungiu sun nasufurirun nun, bulíeigüda niduheñu». 52 Aba líchugun Éfürain luagu le habiaman, lariñaga:

«Garahüñügüda láadina Bungiu lidan ageiraü le ñein lubéi súfurihadina lan».

53 Aba lásügürün sedü irumu le lánina líbenouga Ehiptu, 54 aba lagumeserun sedü irumu le lánina ümi, kei buga lariñaguni Hosé. Aba ladagarun ilamaü lidan sun fulasu, Ehipturügüñein ñein lan éigini, 55 danti le halamachunbei lílana Ehiptu, aba houdin amuriaha türigu luma urúei:

—Lariñagati urúei houn sun Ehiptuna: Heiba lumoun Hosé, hadügeime le lubeibei hun.

56 Dan le laweiridagunbei ilamaü lidoun sun fulasu ligía, aba ladaarunu Hosé lagei türigu lun lalugurahan türigu houn Ehiptuna, ladüga, sagü dan aweirideinatima lan ilamaü. 57 Ábati hayabin burí lídangiñe sun fulasu Ehiptu, agañeiha luma Hosé, ladüga ua lan éigini lidan amu fulasu.