1 Wein-seingü irumu lau Esekíasi dan le lagumeserunbei arúeiha, arúeihati wein-nefu irumu Herusalén. Abí bugaha tíribei lúguchu, liráü Sakaríasi. 2 Buiti bugaha lóuserun Esekíasi ligibugiñe Wabureme kei bugaha lóuserun Dawidi le lagücha. 3 Ligía adaarubalin tubenari litenpulun Wabureme lidan furumiñeti hati le lánina furumiñeti lirumudiri larúeihan, aba laranseruni. 4 Lárigiñe aba lagúarun houn fádirigu hama Lewitagu, aba lóundaraguniña lidan bürürü le ñéingiñe lubéi láfuacha weyu tibiti ténpulu, 5 aba lariñagun houn:

—Lewitagu, aganba humana: Harumaguagüda humá hungua guentó, harumagüda humounme litenpulun Wabureme le Habungiute hagüchagu, sagá huméi sun katei le wíyebei sanduariurugugiñe. 6 Lugundun magunfuliruntiña meha wagüchagu, wuribati meha hóuserun ligibugiñe Wabureme le Wabungiute, aba hígiruni Wabureme. Ígira hamuti Wabungiute tau sun ténpulu to ñein lubéi laganóua aba híchugun mebereseni lun. 7 Darugua hamuti lubenari rumu le ebelaagülei, ñegú hamuti lanpu, ígira hamuti hágudahan kupali luma hedewehan adagaragüdüni gudawarügüti sanduariurugu lun Lubungiute Ísüraeli. 8 Ligía lagañidunbei Wabureme lun Hudá luma lun Herusalén, aba lígiruniña eredera kei katei le hanufunati, ítara kei harihini lau hagu. 9 Ligía meha hóunwegunbei wagübürigu wuriburugu, barüwagua hagía warahüñü hama wámarigu adaürawagúa. 10 Haritaguaadina lubeiti, nadügün daradu luma Wabureme le Lubungiute Ísüraeli, lun ladireirun ligañi wawéi. 11 Ítara liña lubeiti, nirahüñü, merederagua humá, lugundun anúadira laadün Wabureme lun aranseñu humá súnwandan lun heseriwidun luma lun hágudahan kupali lun.

12 Añahán Lewitagu ha ábabei hagumeserun nadagimein: Hádangiñe ladügawagun Keatü, Maatü le liráü Amasái, luma Hoeli le liráü Asaríasi; hádangiñe ladügawagun Merarí, Kisü le liráü Abüdí luma Asaríasi le liráü Healeeli; hádangiñe lánigu Gerüsón, Hoá le liráü Simá luma Edén le liráü Hoá; 13 hádangiñe lánigu Elisafán, Simürí luma Heieli; hádangiñe lánigu Asafü, Sakaríasi luma Mataníasi, 14 hádangiñe lánigu Emán, Heieli luma Simí, hádangiñe lánigu Hedutún, Semaíasi luma Usieli. 15 Furumiñe aba hóundaruniña haduheñu aba harumadaguagüdün houngua ligibugiñe Wabungiute sun hagía; lárigiñe aba hebelurun ténpulurugun lun harumadagüdünu ligibugiñe Wabungiute kei buga lariñaguni urúei houn según lugumadin Wabureme.

16 Lárigiñe aba hebelurun fádirigu turageirugun ténpulu lun harumadagüdünu ligibugiñe Wabungiute. Aba hasagaruni sun katei wíyeti le hadarirubei múnada tibürürünrugun ténpulu, aba hachagaruni Lewitagu lidoun lere lidunari Sedurón. 17 Weyu furumiñe lidan furumiñeti hati ligía hagumeserun arumadagüdoun ténpulu ligibugiñe Wabungiute, lúmounbei liwidün weyu lidan hati ligía chülühaña lumoun tebelaagüle litenpulun Wabureme. Nadagimeinyatiña widü weyu lidan le emegeirubei turageirugu ténpulu lun harumadagüdünu ligibugiñe Wabungiute, lúmounbei yebe lidisisin weyu sun hamaali wadagimanu. 18 Lárigiñe aba hebelurun tidoun lani urúei Esekíasi palasiu, aba hariñagun lun:

—Harumagüda wamaaru ténpulu ligibugiñe Wabungiute: Latarü le lánina adagaragüdüni gudawarügüti lau sun lumegen luma dábula tun fein to anuadirúaboun lau sun lumegegun. 19 Seti wamaali giñe ani harumagüda waméi sun umegeni le meha unbei lamahara urúei Aasi lidaaniwagu larúeihan ladüga múaran lan ligaburi ligibugiñe Wabungiute, guentó aniheinhali sun katei ligía ligibugiñe lani Wabureme latarü.

20 Aba saragia lan urúei Esekíasi aba lóundaruniña sun lúrudugu ha uburugubaña, aba houdin litenpulunrugun Wabureme. 21 Barüinahaña sedü bágasu wügüriña ha ñǘbürigiña, sedü mudún, sedü mudún ha ñǘbürigiña, hama sedü harahüñü gábara keisi idewesei luagu figóu luagu hafulesein liduheñu urúei, tufulesein ténpulu luma lufulesein Hudá. Aba lariñagun urúei houn fádirigu ha ladügawagun Aarón lun hadagaragüdüniña keisi adagaragüdüni gudawarügüti luagu lani Wabureme latarü. 22 Aba háfaruniña fádirigu bágasu, aba hanügüni hata, aba habahichaguni latarü lau. Lárigiñe aba háfaruniña mudún hama mudún ha ñǘbürigiñabaña.

23 Lárigiñe aba hanügüniña harahüñü gábara ha lánina idewesei luagu figóu ligibugiñoun urúei hama lílana fulasu, aba híchuguni háhabu hawagu animaalu hagía. 24 Lárigiñe aba háfaruniña fádirigu luagu latarü keisi idewesei luagu figóu, lun hibihini ferudun luagu hafigoun sun Ísüraelina, kei buga ariñagaali lan urúei lun luagu lan sun Ísüraeli ladagarawagüdüwa adagaragüdüni gudawarügüti.

25 Ruti giñe Esekíasi Lewitagu lau pülatíyu, árüpa tuma gidara litenpulunrugun Wabureme, según meha lariñaguni Dawidi luma Gadü, profeta le eseriwidubei lun urúei, luma profeta Natán. Lugundun Wabureme bugaha íchugubalin igaburi ligía hádangiñe lani profetagu.

26 Rara haña Lewitagu lau burí lílagu Dawidi le lánina áfaruni ligía, ánhañati fádirigu táuñanu fidu. 27 Ábati lariñagun Esekíasi lun ladagarawagüdün adagaragüdüni gudawarügüti ligibuagu latarü. Óurati le lagumeserunbei adagaragüdüni gudawarügüti, aba giñe lagumeserun eremuhani lun Wabureme luma tíñaahoun fidu, úara luma lani urúei Dawidi katei burí lánina íñaahani luma áfaruni. 28 Hudugu haña lílana fulasu íchiga uéiriguni lun Wabungiute sun añaha lan eremuhatiña eremuha hama fádirigu íñaaha. Ítara haña darí lumoun lagumuchun adagaragüdüni gudawarügüti. 29 Dan le lagumuchunbei adagaragüdüni gudawarügüti, aba láhuduragun urúei hama sun ha úarabaña luma íchiga uéiriguni lun Wabungiute. 30 Lárigiñe aba lariñagun urúei Esekíasi hama lúrudugu houn Lewitagu lun heremuhan lun Wabureme lau burí sálumu le lani Dawidi luma le lani profeta Asafü. Aba hadügüni ítara lau saragu ugundani, aba giñe háhuduragun íchiga uéiriguni lun Wabungiute.

31 Lárigiñe aba lariñagun Esekíasi houn gürigia:

—Kei deregeguaadün lubéi hungua lun Wabureme uguñe, higougu, barǘ humá adagaragüdüni luma idewesei le lánina eteingiruni litenpulunrugun Wabureme.

Ábati hanügün lílana fulasu adagaragüdüni luma idewesei lánina eteingiruni, ha gúndaabaña hadügüni aba hadagaragüdün adagaragüdüni gudawarügüti. 32 Animaalugu ha hanügübaña lílana fulasu lun adagaragüdüni gudawarügüti: Ǘrüwa-wein-diisi bágasu wügüriña, san mudún hama bián-san harahüñü mudún, sun animaalugu hagía, lun hadagaragüdüniña lun Wabureme keisi adagaragüdüni gudawarügüti. 33 Hadan sun animaalugu ha hadagaragüdübaña: Sisi-san bágasu hama ǘrüwa-milu hachügü ibiñanigu ñǘbüritiña.

34 Gama lumoun kei mibe habéi fádirigu, lóuguatiña lun hélehani houra animaalugu lun adagaragüdüni gudawarügüti, aba híderaguniña Lewitagu ha hábirigu ha mama fádirigu agumuchei wadagimanu darí harumadun ha híbiri fádirigu ligibugiñe Wabungiute; lugundun aransetiña Lewitagu ha mámabaña fádirigu lun harumadun sügǘ hau fádirigu. 35 Bóugudin luéi lira, gíbeti adagaragüdüni gudawarügüti le lunbei ladagarun, luma hagüle animaalugu ha adagaragüdüni lánina arandaruni luma burí idewesei le diwéin le adagarubei úara luma adagaragüdüni gudawarügüti.

Ítara liña ladügǘnya kultu litenpulunrugu Wabureme. 36 Dánduti Esekíasi kei sun lílana fulasu gúndaatiña lau le ladügübei Wabungiute hawagu lílana fulasu, lugundun lau sun lufuresen lasusereda sun katei ligía.