1 Dan le lásurunbei sun wadagimanu le ladügagüdübei Salomón litenpulunrugu Wabungiute, aba lanügüni ílagu burí golu luma pülata le bugaha lederegerubei Dawidi le lúguchi lun Wabungiute, aba líchuguni lidoun tirisin-agei ténpulu.

2 Ábati lóundaruniña Salomón sun ábutigu Ísüraeli, hábutigu türibugu, gürigia íñugutiña hádangiñe iduheñu Ísüraelina Herusalén, lun tanügǘniwa lubagüsinina lidaradun Wabungiute uburugugiñe Sión, lun luburuguterugun Dawidi. 3 Lidan weyu le wéirigutimabei lidan fedu, lidan lisedün hati lidan irumu ligía, aba hóundaragun sun Ísüraelina luma urúei Salomón. 4 Aba hachülürün sun wéiyaaña mutu Ísüraeli hama Lewitagu, aba hanügünu bágüsi lánina daradu. 5 Aba hanügünu úara tuma kianpu lánina óundaraguni luma Wabungiute, lau sun ílagu sagüráuti le tídanbei, le hanügübei fádirigu hama Lewitagu. 6 Tigibugiñeñanu bágüsi urúei Salomón hama sun Ísüraelina ha óundaragubaña luma, adagaragüdeina hagía mudún hama bágasu wügüriña; gíbetiña animaalu hagía darí lun siñá lan habahüdǘniwa. 7 Lárigiñe aba hanügünu fádirigu lubagüsinina lidaradun Wabungiute múnadoun tibiti ténpulu, lidoun Fulasu le Sándutimabei, lábugiñe harüna kátaña garünatiña, 8 ha tuleñubaña arüna lóugiñe fulasu le ñein tubéi bágüsi, hadouragua dandu tau bágüsi kei lau tebu. 9 Gama lumoun miginaguti tebu darí lun larihín lídangiñe Fulasu le Sándubei, ligibugiñe Fulasu le Sándutimabei, gama lumoun marihinti bóugudigiñe; ítara liña herederun. 10 Tidan bágüsi tuguya úati ni amu katei luéidigia bián murusun dübü le meha líchugubei Moisesi tidoun luagu wübü Orebü, dübü le ñein lubéi bürüwañu lan daradu le meha ladügübei Wabungiute hama Ísüraelina dan le háfuridunbei Ehiptugiñe.

11 Aba háfuridun sun fádirigu lídangiñe Fulasu Sánduti. Sun fádirigu ha ñéinbaña harumadaguagüdaaña buga houngua ligibugiñe Wabungiute meberesenga lau lidaani eseriwiduni le aubei hafanreinhóua. 12 Sun Lewitagu ha eremuhabaña, Asafü, Emán, Hedutún úara hama hasaanigu hama ha híbiri haduheñu, rara haña luéigiñe oubaü le ñéingiñe lubéi láfuacha weyu libiti latarü, tau hadaüragun lautu linu fínuti. Ñeinñein burí pülatíyu hama, tuma sun tuwuyerigu árüpa. Ñéinñanu san-wein fádirigu íñaahatiña fidu hama.

13 Ábati hagumeserun áfara, íñaaha luma eremuha úara, lun híchugun uéiriguni lun Wabungiute tau fidu, pülatíyu tuma amu burí tuwuyeri fidu sun añaha lan eremuha. Hariñaga lidan heremuhan:

«Heremuha lun Wabureme,

lugundun buiti Wabungiute ani magumuchaditi línsiñehabu».

Lidan oura ligía aba tabuinchun litenpulun Wabungiute lau dúeri, 14 ladüga dúeri lásiñarunbei herederun fádirigu ñein lun hadügüni kultu, lugundun buíngüdala meha luéirigun Wabungiute ténpulu.