1 Aba lebelurun lani Wabungiute Sífiri lidoun Asaríasi le liráü Owedi, 2 aba láfuridun lubaroun Asá lun lariñagun lun:

—Aganbabána buguya Asá hama sun lílana Hudá luma Benhamín! Húmañein Wabungiute anhein lúmañadün lubéi. Anhein háluaha hadarirubei; gama lumoun anhein hígira, lígirubadün giñe. 3 Lǘhaña Ísüraelina úouga Wabungiute le tímatimaati hama, mafadiriniga, lun larufudahaba lan houn. 4 Gama lumoun dan le háluahani Lubungiute Ísüraeli lidan lénrengunga houn, arufudaguati lungua houn. 5 Lidan burí meha dan ligía úati meha darangilaü ni ka un, luéidigia saragu nidiheri houn lílana fulasu. 6 Heredera meha néchanigu luma uburugu ageindagua hámagua áfaragua houngua, ladüga ládahani Wabungiute hadoun ítara lau sun luwuyeri lamiselu. 7 Gama lumoun huguya ganigi humá, mábürühala harüna, lugundun gafayeiruahabei huádigimari.

8 Dan laganbunbalin Asá luganute profeta le, aba lárügüdün anigi, aba lagumuchun hau sun guáriua iyereehabútiña ha lumúanrugubaña Hudá luma Benhamín hama ha lídanbaña líbiri burí uburugu le lagañeirubei láraabuterugu Éfürain, aba laranseruni latarü le tigibugiñebei rumu lánina ebelaagülei tidoun litenpulun Wabungiute. 9 Lárigiñe aba lóundaruniña sun Hudaana hama lánigu Benhamín hama terencha ha hámabaña ha lílana Éfürain, Manasési luma Simeón, kei gíbeeña lubéi buga lánigu Ísüraeli ásügürütiña lumoun Asá lau harihini luagu ñeinñein lan Wabungiute le Lubungiute luma.

10 Aba hóundaragun Herusalén lidan lǘrüwan hati lidan irumu keinsi le lánina larúeihan Asá, 11 aba hadagaragüdün lun Wabungiute lidan weyu ligía: Sedü-san bágasu hama sedü-milu mudún, hádangiñe ha hanügübaña hawéi háganiñu. 12 Lárigiñe aba hadügün aban daradu luagu háluahabei lan Wabureme le habungiute hagüchagu tau sun hanigi. 13 Aba füramase hamá luagu furumiñeguarügü lan le máhati láluahani Wabureme le Lubungiute Ísüraeli, wéiyaali, ñǘraügili, wügüri o würi, lasiadirúba lan lun lounwen. 14 Adüga hamuti fiñún ligibugiñe Wabungiute lau umalali reinti agúaraheina lau ugundani íñaaheina fidu luma liganchun bágasu. 15 Aba hagundaarun sun Hudaana lau fiñún le hadügübei, lugundun tau sun hanigi háfiñura, ani lau sun hanarün háluahei Wabureme, aba ladariraguagüdün lungua houn, ru ligía darangilaü houn hama sun habesinanigu.

16 Gidá lumuti giñe urúei Asá ubaraü keisi urúei úguchuru tuéi Maaká to lagütü ladüga bugaha tadügagüdün aba liyawa Asera. Aba lagünrinchagunu Asá iyawaü tuguya; aba lamurudaguagüdünu aba lágudunu lidan liraüraü duna le lani Sedurón. 17 Lau sun magidarún tan burí hatenpulun gibe tubungiutegu Ísüraeligiñe, úaraguamemeti bugaha ligaburi Asá, 18 ru lumuti sun golu luma pülata litenpulunrugun Wabungiute le lanúadirubei dandu ligía kei lúguchi lun Wabureme. 19 Úati wuribu darí irumu darandi-seingü lidan larúeihan Asá.