1 Gama lumoun lidan irumu darandi-sisi lúmagiñe larúeihan Asá, aba lidin Baasá, le lurúeite Ísüraeli ageindagua luma Hudá, aba layaraaguni Ramá lau dübü luma burí wewe, aba lerederun mererunga lun lurúeite Hudá. 2 Ábati lasagaruni Asá golu luma pülata litenpulunrugugiñe Wabungiute luma tídangiñe lani urúei palasiu, aba lóunahani lun Ben-adadü, le lurúeite Siria, le aganóubei Damasüku. Óunahati giñe ariñaga lun: 3 «Adüga wamá aban daradu au buma kei meha hadüga wagübürigu. Nóunahaña golu luma pülata bun. Halaguabei bidaradun luma Baasá le lurúeite Ísüraeli, ítara luba lígirunina nungua».

4 Aba lánharun Ben-adadü lun lidaradun urúei Asá, aba lóunahaniña lisudaranigu ageindagua luma luburugute burí Ísüraeli. Ítara liña hagañeiruni Iyón, Dan, Aweli-maimü luma sun burí luburugute Nefütalí le eseriwidubei kei gamasein. 5 Dan lasubudirunbalin Baasá katei le, aba lerederun layaraaguni Ramá, aba lararamuni luadigimari ñein. 6 Ábati lanügüniña Asá sun Hudaana lúmagua, aba hanügüni sun dübü luma wewe Ramaagiñe le bugaha layusurubei Baasá lun layaraaguni lau, aba layaraaguni Asá Gebá luma Misüpá lau.

7 Lidoun dan ligía aba lidin profeta Ananí bisidei Asá le lurúeite Hudá, lariñaga lun:

—Séfuha lumutuniña lurúeite Siria búhaburugugiñe, ladüga bárügüdün luéigiñe lurúeite Siria, márügüdüntibu luagu Wabureme le Bubungiute. 8 Ma funagia gíbetimatiña ani here hagía hawügüriñanigu Etiopíana hama Líwiana, gibe hagía hagabayun tuma hakarün to lánina wuribu? Gama lumoun lau sun lira derege lumutiña Wabungiute bun ladüga babalachun luagun. 9 Aríagu liña Wabungiute lun sun le asuseredubei lidan sun ubóu, lun líchugun erei houn ha hemenigibaña luagu le tímatimaati. Óuseraadibu kei aban ibidiougua tau! Lugundun lúmagiñe guentó bawuribuhátimaha.

10 Ábati lagañidun Asá saragu lun profeta ligía, aba ladaürüni. Ruti giñe lidere dan houn fiu lílana fulasu ligía.

11 Anihein luáguti Asá bürüwañu lúmagiñe lagumeseha darí lumoun lagumuhóun tidan líburu to hawagutu lurúeitegu Hudá luma Ísüraeli. 12 Lidan irumu darandi-nefu lidan larúeihan Asá, aba ladagarun aban sandi hanarimeti luagu lugudi; gama lumoun máluahan lumuti Wabungiute lidan lisandi láluaharüga surusia. 13 Aba lounwen lidan irumu bián-wein aban lirumudiri larúeihan, 14 aba hábununi lidan umúahaü le bugaha ladaagüdübei luburuguterugu Dawidi. Aba harounragüdüni tidan aban gabana buin lau ibiñein luma sun luwuyeri ibiñein le aranserúati buidu. Lárigiñe aba háfuragun watu lidan liri.