1 Duusu irumu lau Manasési dan le lagumeserunbei arúeiha, ani arúeihati giñe dimí-san-seingü irumu Herusalén. 2 Gama lumoun wuribati lóuserun Manasési ligibugiñe Wabungiute, lememe meha lagübüri katei le meha hadügübei néchanigu ha meha lachagarubaña Wabungiute fulasurugugiñe hagibugiñegiñe Ísüraelina, ligía giñe ladügübei; 3 ráramagüda lumutu burí hasanduariun gibe tubungiutegu to meha lagünrinchaguboun Esekíasi le lúguchi; adügati burí latarü tun liyawa Baali, adaagua ligía liyawa Asera; huduguati giñe, adüga ligía kultu houn sun waruguma ha siélubaña, 4 adaagua ligía latarü litenpulunrugu Wabureme, to uáguboun lariñaga Wabureme luagu lúbanboun lan liri lun súnwandan Herusalén. 5 Adügati ámuya burí latarü lidan biángubei tibürürün litenpulun Wabureme lun lichugúniwa uéiriguni houn sun waruguma ha siélubaña.

6 Gudagüda lumutiña giñe lirahüñü keisi adagaragüdüni lidan fulasu wayati le Ben-inomu, álügüdahati garíaahatiña hama burú, adaagua lumuti hálügüdahoun buyei luma abiñarahani. Wéiriti bugaha luriban lóuserun ligibugiñe Wabungiute darí lun lagañidagüdüni saragu. 7 Ru lumuti giñe guáriua le ladügübei litenpulunrugun Wabungiute, ténpulu to bugaha uáguboun lariñaga Wabungiute lun Dawidi luma lun Salomón le liráü Dawidi: «Ténpulu to, to Herusalénboun, to nanúadiruboun hádangiñe sun lani Ísüraeli türibu, tuguyaba luban niri lun súnwandan. 8 Masagadigia naaña Ísüraelina lídangiñe fulasu le ñein lubéi meha níchigaña hagüchagu, gúnfulirügaaña ligía lau sun le nariñagubei houn, lau sun narufudahan luma nilurudun luma nugumadin le níchigagüdübei lun Moisesi houn».

9 Gama lumoun adügati Manasési lun hasigirun Hudá hama sun lílana Herusalén lidan lagübüri üma, luma lun hóuserun wuriba kei meha hóuserun néchanigu ha meha láfaragubaña Wabureme hagibugiñe Ísüraelina. 10 Adimurehati Wabureme lun Manasési luma houn lumutuniña gama lumoun madügüntiña gasu lau. 11 Ligía lébubei lanügüniña Wabureme hábutigu lumutuniña lurúeite Siria hawagun, aba hadaürüni Manasési lau ganchu, güragua haméi lau güringüri le buronse, aba hanügüni Babilónioun.

12 Gama lumoun dan lasandiragunbei lungua lidan lidere dan, aba lagúaruni Wabureme le Lubungiute lau ǘnabugubuni le Habungiute lagüchagu. 13 Aba laganbuni Wabungiute lafurieidun, aba ladügün lun lagiribudun Herusaléun lunya lárügüdüni larúeihan. Ábati gunfurandalani Manasési luagu Wabureme lan Búngiubei.

14 Lárigiñe katei le, aba ladügün Manasési aban baríeiru luagu luburugute Dawidi luéigiñe oubaü le ñeinhin lubéi lálüda weyu libiti Gión; baríeiru ligía bóugudigiñeñein libiti uburugu, sügüti luéigiñe liraüraü duna le achülürübei luagu Habenari Úduraü, lubá legeyedagun lau Ofeli. Íñuti ladügüni. Ruti giñe gumadan milidarugu lidan sun luburugute Hudá le ederebudawagüdübei lau baríeiru. 15 Gidá lumutiña giñe búngiugu terencha hama guáriuagu litenpulunrugugiñe Wabureme, gidá sun hani gibe tubungiutegu latarü le meha ladügübei luagu tuwübüri ténpulu to Herusalénboun, aba lachagaruni bóugudin luéi uburugu. 16 Lárigiñe aba laranseruni lani Wabureme latarü, aba ladügün adagaragüdüni lánina arandaruni luma eteingiruni luagu, ariñaga ligía houn Hudaana lun hadügün kultu lun Wabureme le Lubungiute Ísüraeli. 17 Lau sun lira, dagagüdamemetiña lílana fulasu adagaragüdüni luagu burí latarü le hani gibe tubungiutegu lau sun lun lan Wabureme le Habungiute hadügei.

18 Le líbiri asusereduti luáguti Manasési, luma lafurieidun lun Wabungiute, luma burí ñunsu le hariñagubei profetagu lun lúmagiñe Wabureme le Lubungiute Ísüraeli, anihein tidan haliburun lurúeitegu Ísüraeli. 19 Lafurieidun luma óunabuni le libihubei, sun le luáguti lifigoun luma múaran lan, luáguti fulasu burí le ñein lubéi tadügǘwa hani gibe tubungiutegu sanduariu luma le ñein lubéi líchigaña liyawa Asera hama guáriua lubaragiñe lǘnabudaguagüdün lungua ligibugiñe Wabungiute, anihein bürüwañu tidan haliburun profetagu. 20 Danbei le lounwen, aba hábununi lidan tufulurin-agei lani palasiu. Aba larúeihan Amón le liráü leweñegua.

21 Wein-biama irumu lau Amón dan le lagumeserunbei arúeiha, arúeihati bián irumu Herusalén. 22 Gama lumoun wuribati bugaha lóuserun ligibugiñe Wabureme kei Manasési le lúguchi. Adagaragüdati, adüga ligía kultu houn sun guáriua ha meha ladügübaña Manasési le lúguchi. 23 Gama lumoun mǘnabudaguagüdünti lungua ligibugiñe Wabureme kei ladügüni Manasési le lúguchi, gánwoungueinarügüti lidurun.

24 Aba heledegun lani úfisigu lubá, aba háfaruni tidan lani palasiu. 25 Gama lumoun áfaragua hamutiña lílana fulasu ha áfarubalin urúei Amón, aba harúeigüdüni Hosíasi le liráü leweñegua.