1 Ibihati Hosafátü saragu irisini luma uéiriguni, chülüti giñe lun gaduheñuguabei lan luma Aabü lau lamarieidun liráü tuma liráü Aabü.

2 Átiri irumu lárigiñe, aba lidin Hosafátü Samaria ebeluha lumoun Aabü, aba láfarun Aabü saragu mudún hama bágasu lau lachülürün Hosafátü hama ha úarabaña luma, aba labimehani Aabü Hosafátü lun lábürühan luagun Ramotu le lani Galaadü. 3 Lariñaga Aabü le lurúeite Ísüraeli lun Hosafátü le lurúeite Hudá. Bídiba numa lun wageindagun luma Ramotu le lani Galaadü?

Lariñaga Hosafátü lun:

—Au, hau sun nuwügüriñanigu, búmañadiwa luma hama bumutuniña lun woudin awuribuha. 4 Gama lumoun furumiñe, álügüdahaba anhein ligía lubéi lugundanbei Wabungiute.

5 Aba lóundaraguniña lurúeite Ísüraeli profetagu, gádürü-san wügüriña, aba lálügüdüniña, lariñaga houn:

—Lunti san wábürühan luagun Ramotu le lani Galaadü, odi moun lumuti wadügüni?

Hariñaga lun:

—Ábürühaba luagun, lederegerubei Wabungiute bun.

6 Gama lumoun aba lariñagun Hosafátü:

—Úati san ábanya lani Wabungiute profeta ya, le giñe gayaraati wálügüdüni?

7 Lariñaga lurúeite Ísüraeli lun Hosafátü:

—Anihein aban le gayaraabei wálügüdahan lídangiñe. Mikaíasi le liráü Imülá. Gama lumoun iyereeguti nun, lugundun mariñagaditi katei buiti nun nuougua luéidigia katei wuribati.

Gama lumoun aba lariñagun Hosafátü lun:

—Mariñagabá ítara.

8 Lárigiñe aba lagúarun lurúeite Ísüraeli lun aban úfisi, aba lariñagun lun:

—Barübei Mikaíasi le liráü Imülá nun ñahoun furese!

9 Dandu lurúeite Ísüraeli kei Hosafátü le lurúeite Hudá, táuñanu hadaüragun to lánina wuribu, luáguñanu hala le lálana harúeihan luagu lebelaagüle Samaria, sunti profetagu aba hagumeserun ayanuha uganu lúmagiñeti Bungiu. 10 Adügati Sedekíasi le liráü Kenaaná ganchu lauti gürabu, aba lagúarahan ariñaga:

—Ítara liña lariñagun Bungiu: "Lauba ganchu le báfaraguaña Síriana darí bagumuchun hau!"

11 Ligiaméme giñe hariñaga sun profetagu. Hariñaga lun urúei:

—Ábürühaba luagun Ramotu le lani Galaadü, bagañeirubei wuribu, lederegerubei Aburemei uburugu ligía bun.

12 Lariñaga óunagülei le buga ñǘdünbei ougei Mikaíasi:

—Sun profetagu óunaba hamaali urúei keisi labusenrun. Ayumuraguatina lubeiti bun lun giñe bariñaguni le fuleseihabubei lun urúei kei hadüga sun hagía.

13 Lariñaga Mikaíasi lun:

—Fiñutina luagu Wabungiute luagu lérügüba lan lariñagun Nubungiute nun lun nariñaguni nariñaga.

14 Lárigiñe aba lidin lumoun urúei, aba lálügüdüni urúei, lariñaga lun:

—Mikaíasi, lunti san wábürühan luagun Ramotu le lani Galaadü odi moun lumuti?

Lariñaga Mikaíasi lun:

—Ábürühaba luagun, bagañeiruba, líchugubei Wabungiute bun.

15 Gama lumoun aba lariñagun urúei lun:

—Átirihali san wéiyaasu nariñagun bun lau fiñún lun inarünirügü lan bariñaga nun lidan liri Wabungiute.

16 Ábati lariñagun Mikaíasi:

«Ariha naaña sun Ísüraelina

chagagu luagu burí wübü

kei mudún móuniritiña.

Ani ariñagaali Wabungiute:

"Maburemetiña ha;

giribu hamá kada aban hábiñoun lau darangilaü" ».

17 Aba lariñagun lurúeite Ísüraeli lun Hosafátü:

—Ma buga nan bun luagu mariñagadi lan wügüri le katei fuleseihabúti nun, luéidigia lan katei wuribati?

18 Ábaya lasigirun Mikaíasi ariñaga:

—Ariha numuti Wabungiute ñun luagu lálana larúeihan, sun súdaragu ha siélubaña rara lubadu, híbiri luéigiñe lóunwenren, híbiri luéigiñe lubaünan. 19 Ábati lálügüdahan Wabungiute: kaba ñüdün ínchahei Aabü le lurúeite Ísüraeli lun lábürühan luagun Ramotu le lani Galaadü hilá láamuga ñein? Híbiri ariñaga aban katei, híbiri ariñaga amu. 20 Gama lumoun aba liabin aban sífiri ligibugiñoun Wabungiute aba lariñagun lun: "Auba eyeedei Aabü".

Aba lálügüdüni Wabungiute: «Ida luba badügüni?» 21 Aba lariñagun sífiri ligía: «Nadüga lun hariñagun lani Aabü profeta iyeeni. Ábati lariñagun Wabungiute lun luagu leyeedubaña lan ítara, lun lan lidin adügei». 22 Subudi baali lubeiti guentó luagu rúhali lan Wabungiute aban sífiri yeeti hayumulugun bani profetagu ha, ani ítara luba lan bagünrinchawagun.

23 Ábati layarafadun Sedekíasi le liráü Kenaaná lun Mikaíasi aba labouchuni ligibu, lariñaga:

—Halíagiñe lidin lani Wabungiute Sífiri nuéi lun ladimurehan bun?

24 Lariñaga Mikaíasi lun:

—Basubudirubei wéyume le berederun aramudaguañaha tídangiñe aban muna lun tidoun amu.

25 Ábati lariñagun lurúeite Ísüraeli:

—Ragǘ huméi Mikaíasi, barǘ huméi adaüra ligibugiñe Amón le gumadimati luma ligibugiñe Hoasi le niráü! 26 Ariñaga humá houn luagu nariñahare lan lun lan hádaruni furisunrugun, híchigame murusunrügü fein luma duna lun, darí nagiribudun lau magadiñein.

27 Ariñagayagili Mikaíasi:

«Ánhabu agiribuda lau magadiñein,

mama Wabungiute adimurehabei nídangiñe».

28 Aba lubeiti lidin lurúeite Ísüraeli luma lurúeite Hudá lun hageindagun luma Ramotu le lani Galaadü. 29 Aba lariñagun lurúeite Ísüraeli lun Hosafátü:

—Nebelura wuriburugun tau amu tuwuyeri daüguaü ábame badaürünu nadaüragun.

Aba lubeiti ladaürün lurúeite Ísüraeli amu tuwuyeri daüguaü, aba hebelurun biángubei hagía wuriburugun. 30 Gama lumoun ariñagaali buga lurúeite Siria houn ha abugahabarun burí karü to lánina wuribu, lun lan mageindagun hamá ni ka uma luéidigia luma lurúeite Ísüraeli. 31 Dan le harihinbalin abugahatiña karü Hosafátü, sun hanügüni luagu lurúeite lan Ísüraeli aba hegeyedaguni lun háfaruni. Ábati lagúarahan Hosafátü amuriaha íderawaguni, aba líderaguni Wabungiute. Aba ladisedagüdüniña Wabungiute láganiñu luéi. 32 Dan le harihinbei luagu mama lan lurúeite Ísüraeli, aba lerederun héibaahani. 33 Gama lumoun aba lachüürünu aba súdara ligimaran ibidiñoun lun, aba tadagarun luagun lurúeite Ísüraeli tabadinaguagiñe ladaüragun to lánina wuribu. Ábati lariñagun lun le abugahabarun likarün:

—Gararaguabá, sagabana wuriburugugiñe lugundun mirawaguaadina.

34 Wéiriti lidere wuribu weyu ligía, gasu lerederun urúei rara tidan likarün ageindagua hama Síriana darí rábounweyu, aba lounwen dan le lálüdünbei weyu.