1 Aba lagumeseruni Salomón tábunawagun litenpulun Wabureme Herusalén, luagu wübü Moriá, le meha ñein lubéi lasaliragua Wabureme lun Dawidi le lúguchi, lidan fulasu le laranserubei Dawidi tubá ténpulu, le bugaha ñein lubéi léfereha Orunán le Hebusuna türigu. 2 Weyu biama lidan libiaman hati lidan ligadürün lirumudiri larúeihan, ligía lagumeserun ábunaguoun ténpulu.

3 Anihán luéinamun iderebugu burí le líchugubei Salomón: Wein-sedü méturu limigifen, nefu lidabuberen. 4 Néfuñein méturu limigifen furumiñeti rumu le ebelaagülei le tigibugiñebei ténpulu, kei tidabuberen ténpulu, nefu giñe méturu tiñun, furá lumuti Salomón rumu le ebelaagülei tidoun ténpulu lau golu múnadagiñe libiti, 5 aba lafuraruni túgubu muna turageirugugiñe lau fulansu le gudi, lárigiñe aba ladourawagun lau golu fínuti, aba hadügün tídibu burí yaraüwa luagu golu dibú hagía burí güringüri luagu, 6 aba hewendedagüdüni lau burí dübü buíduburiti. Golu le buídutimabei hayusurubei. 7 Aba lubeiti líchugun golu tuagu muna sun turageirugugiñe: Índanu, fudebu, touba muna luma burí bena, aba ladiburun kátaña burí garünatiña luagu burí touba muna.

8 Adüga lumutu giñe lasali to lídanboun Fulasu le Sándutimabei. Néfuñein méturu limigifen kei tidabuberen ténpulu, nefu giñe méturu tidabuberen. Lárigiñe aba ladouraguagüdünu lau golu fínuti, yúsutiña yarafa lun bián-wein-gádürü-milu líburu golu. 9 Seingü-san-dimí güramu lihürü kada aban gürabu le hayusurubei furá lumutu giñe rumu burí le lídanbei fuló le íñubei lau golu.

10 Óunahati adibura lau chíchili hayawa bián kátaña garünatiña lidan Fulasu le Sándutimabei, aba hafurarúniwa lau golu. 11 Limigifen biángubei harüna kátaña garünatiña hagía, nefu méturu; aban lídangiñe arünaü ligía, biama méturu luma wein-seingü sentimeturu luagu, dagati luagu touba muna, le aban arünaü ligiaméme limigifen, dagati luagu lígiri larüna le habiaman kátaña garünatiña hagía. 12 Ítarameme giñe, aban larüna le aban hádangiñe le ítarabei imigifen kei le líbiri, dagati giñe touba muna, le aban, le ítaramemebei imigifen, dagati luagu lígiri larüna le buga furumiñeti. 13 Kátaña garünatiña hagía, ha néfubei méturu luagu harüna, rara haña, lau hagibu lasaliragun. 14 Adüga lumutu giñe korutína tau gamisa to guchu, funatu, tuma linu, aba laborudaragüdün kátaña garünatiña tuagu.

15 Adügati Salomón bián wagabu le róunuti yarafa lun disedü méturu liñun, lun tigibugiñe ténpulu. Bián méturu wein-seingü sentimeturu luagu lani kapitéli. 16 Adügati giñe güringüri kéinaba iñari, aba líchuguni íñugiñe libiti wagabu róunuti ligía, adüga ligía san güranáda lun líchugunu luagu güringüri. 17 Aba líchuguni wagabu róunuti ligía tigibugiñegiñe ténpulu, aban luéigiñe kada oubaü. Aba líchugun Hakín lírime le luéigiñebei tóunwenren, Bóasi liri le luéigiñebei tubaünan.