1 Aba taganbun lurúeite Sabá ladimurehoun buidu luagu Salomón, aba tidin Herusalén lun tóuchaguni lau álügüdahani burí le hénrenguti lounabún, tachülüra geyegu lau lanarime uéiriguni, hau kameyu barüina ibiñein, luma saragu golu luma dübü buíduburiti. Dan tachülürünbei lumoun Salomón, aba tálügüdahan libügürü sun le uágubei taritagua tálügüdüni, 2 aba lóunabunu Salomón luagu sun le uágubei tálügüdaha, úati ni aban álügüdahani lásiñarun óunaba. 3 Dan tarihinbalin lurúeite Sabá lichú lau Salomón, tuma palasiu to lábunaguboun, 4 éigini le luágubei lidabulan, haban burí lani úfisigu, ida haña lan lumusuniña, ha eseriwihatiña diwéin lau burí tuenden hadaüragun luma ida liña lan esütépu le uéigiñebei lamudeirúa ténpulurugun, aba terederun lau óunwenbu tueirin anigi, 5 aba tariñagun lun urúei:

—Inarüni le naganbubei buagu nageira; 6 gama lumoun láuhali narihini guenlé nafiñera. Mabahüdawagunti ni luagu lamidan lichú bau nun, chuti bau sügǘ lau le uágubei naganba. 7 Mosu weiri lan hagundan búmarigu, óunwenbu funa giñe hagundan ha eseriwidubaña bun, luagu bubaduñanu lan súnwandan, aganbahei lichú lau bererun! 8 Biniwalá Aburemei le Bubungiute, le arihubalibu lau ugundani, aba líchugunibu urúeime! Ru laadibu línsiñehabu Bubungiute lun Ísüraeli lurúeiteme, lun barúeihan lau irichaü!

9 Lárigiñe aba tederegerun widü-milu-sedü-san-duusu líburu golu lun urúei luma saragu ibiñein luma dübü buíduburiti. Machülügili meha ibiñein gíbeti ítara uburugun Ísüraeli kei le tedewehabei lurúeite Sabá lun urúei Salomón.

10 Wügüriña ha eseriwidubalin Iramü hama ha eseriwidubalin Salomón, ha anügübaña golu Ofirügiñe, barütiña giñe fulansu wéndeburiti, luma dübü buíduburiti yétegiñe. 11 Lau fulansu wéndeburiti ligía aba ladügüni urúei tubaranda litenpulun Wabungiute luma tubaranda lani urúei palasiu, adüga ligía sun tuwuyerigu árüpa houn áfarutiña. Marihínñahagili meha katei líbeina lira lumúanrugu Hudá. 12 Ru lumuti urúei Salomón sun le tamuriahabei lurúeite Sabá luma tun, lumoun sun le líchugubei tun leweñegua le tanügübei lun. Lárigiñe aba tagiribudun urúei tageiroun úara hama tubúeingu.

13 Bián-weinñein-widü-milu-gádürü-san líburu golu libihin Salomón sagü irumu 14 bóugudin luéi seinsu le hafayeihabei adaagutiña marasun lun hama gaweiyasuntiña. Sun giñe lurúeitegu Arawia hama agumadihatiña fulasurugu barütiñaha golu luma pülata lun Salomón. 15 Adügagüdati urúei Salomón bián-san idaüdinaü le wéinamuti le lauti golu badiwati, tareisi líburu golu luagu kada aban. 16 Adügagüdati giñe ǘrüwa-san idaüdinaü ñǘbüritimati, lóugiñeraü sedü líburu golu badiwati luagu kada aban, aba líchuguni tidoun palasiu to gíriboun «Dabíara Líwanuna». 17 Adügagüdati giñe aban óunwenbu lálana arúeihani le lauti marüfíli, aba lafuraragüdüni lau golu. 18 Sísiñein esütépu lun lawarirúniwa luagun lálana arúeihani ligía, luma aban fulasu íñuguati lauti golu, lálana arúeihani ligía biámañein larüna aban luéigiñe kada oubaü, luagu kada arünaü ligía ñeinñein aban liñún rara. 19 Ñéinñanu giñe hayawa duusu liñún, aban lóubagiñe kada esütépu luéigiñe kada oubaü. Madügǘnwañahagili líbeina lira lidan amu arúeihani! 20 Golu giñe sun luerun urúei, kéigubeirügü giñe sun ágeidinaü le tídanbei palasiu to gíriboun «Dabíara Líwanuna». Úati ni kata lauti pülata ñein, lugundun mebegiti meha pülata lidaaniwagu Salomón, 21 kei ñüdün tubéi burí meha waporu to lugune urúei uburugu Tárüsisi hau lumusuniña Iramü, aba tiabin sagü ǘrüwa irumu barüina golu, pülata, marüfíli, babunu hama figaga.

22 Wéiriguti meha urúei Salomón hawéi híbiri urúeigu ubouagu lidan irisini luma lichú aau. 23 Sun urúeigu ha ubouagubaña busentiña meha harihini lun haganbuni lichú aau le líchugubei Wabungiute lun, 24 sunti hagía barütiña edewehani lun sagü irumu: Katei le burí lauti pülata, le lauti golu, idáü, áruma, ibiñein, gabayu hama mile.

25 Ñeinñein gádürü-milu fárüga luma Salomón houn lilügüniña gabayu tuma burí likarün, hama duusu-milu awarihatiña gabayu, ha lígirubaña tidan muna to ñein lubéi tareidahóua karü to lánina wuribu, luma tun muna to ñein habéi lúniri urúei Herusalén. 26 Salomón agumadirubaliña sun urúeigu ha lúmagiñebaña duna Éufüratesi darí hageira Filistéana chülǘ fadaguaü luma Ehiptu. 27 Adügati urúei Salomón lun lagibedagun pülata Herusalén kei dübü; luma lun lagibedagun hibúari kei tídibu igu áraabuna lidan fulasu mawübüriti. 28 Uburugugiñe Músuri hayabin gabayu lun Salomón luma lídangiñe sun burí líbiri ageiraü.

29 Le líbiri luáguti Salomón, lúmagiñe lagumeseha darí lagumuhóun, anihein bürüwañu tidan liliburun profeta Natán to lánina asusereduti, tidan lani Aíasi le Silona profesía, luma lidan le lariñagubei profeta Idó libügürü Heroboamü le liráü Nabatü. 30 Bián-weinñein irumu larúeihan Salomón Herusalén lidan sun Ísüraeli. 31 Dan lóunwenbei, aba hábununi luburuguterugu Dawidi le lúguchi. Aba larúeihan Roboamü le liráü leweñegua.