1 Aba lóunahan Esekíasi awisaha lidan sun Ísüraeli luma Hudá, óunaha ligía gárada houn lílana Éfürain luma Manasési, amisurahaña lun houdin litenpulunrugu Wabureme uburugu Herusalén efeduhei lani Wabureme le Lubungiute Ísüraeli Luéyuri Esefuruni. 2 Lárigiñe lálügüdagun urúei lungua hama lánigu luma hama sun lílana Herusalén, aba hariñagun lun hefeduhani Luéyuri Esefuruni lidan libiaman hati, 3 kei siñá lan buga lefeduhani lidan lidaani lugundun lougua hamá fádirigu ha arumadaguagüdütiña houngua ligibugiñe Wabungiute, móundaragun hagía lílana fulasu Herusalén. 4 Keiti dandu lubéi urúei kei sun lílana fulasu gúndaatiña lun ítara luba lan, 5 aba hadügün lun haburuchaguagüdüni ñunsu houn sun lílana Ísüraeli lúmagiñe Bérüsewagiñe darí Dan, lun houdin Herusalén efeduhei lani Wabureme le Lubungiute Ísüraeli Luéyuri Esefuruni. Lugundun mefeduhan hamutiñaha hau saragu gürigia kei bugaha labürüdüni ítara luba lan lefeduhóuniwa.

6 Ábati háfuridun láutiña uganu lidoun sun Ísüraeli luma Hudá tau gárada lúmagiñetu urúei hama lánigu lun lagidenehoun lererun urúei:

«Ísüraelina: Giribu humá lun Wabungiute le Lubungiute Abüraámü, Isaakü luma Hakobu, ábame giñe lagiribudun hun, huguya ha esefurubaña háhaburugugiñe lurúeitegu Asiria. 7 Mítaran humá kei hagüchagu luma kei híbirigu ha bugaha lederegerubaña Wabungiute lun hagünrinchawagun, ladüga múaran lan hóuserun ligibugiñe Wabungiute le Habungiute hagüchagu. 8 Mamaganbadi humá lubeiti kei meha hagüchagu; tulé huméi húhabu lun Wabureme lun hiseridagüdüni daradu, ñübuin humá tidoun litenpulun to lanúadiruboun lun súnwandan. Seriwi humá lun Wabureme le Hubungiute ábame lerederun lagañidun hun. 9 Anhaün agiribuda lun Wabureme hagudemeduba híbirigu hama hirahüñü houn áganiñu ha gámabaliña adaürǘwa ábame hígiragüdüniña lun hagiribudun lidoun ageiraü le, lugundun Wabureme le Hubungiute, buiti ani gudemehabu ligía, ani mamahanbei leresibirunün anhaün agiribuda lun».

10 Éibuga hamuti láutiña uganu sun lumúan Éfürain luma Manasési lídangiñe aban uburugu lun lidoun aban darí hachülürün Sabulón. Gama lumoun ábaha héherahan mutu hau, adaagua hagía bula hau. 11 Gama lumoun ñéinñanu fiu wügüriña hádangiñe lani Aserü, Manasési luma Sabulón türibu aba hǘnabudaguagüdün houngua ligibugiñe Wabungiute, aba houdin Herusalén. 12 Ru lumuti giñe Wabungiute tidoun hanigi lílana Hudá lun húaraduba lan lun hagunfuliruni lererun urúei hama lúrudugu, según le lariñagubei Wabureme.

13 Aba lubeiti lóundaragun aban óunwenbu adamurini Herusalén lidan libiaman hati lun hefeduhani tufedun fein maganatu lébini. 14 Aba hagumeserun lau hagidahani sun latarü luma burí fulasu le lágudaagüle kupali le Herusalénbei, aba hachagaruni lidoun lidunari Sedurón. 15 Weyu katorusu lidan libiaman hati ligía háfaruni mudún le lánina Luéyuri Esefuruni. Aba habusigaridagun fádirigu habu Lewitagu hámawagua, ligía harumadaguagüdünbei houngua, aba hanügün animaalugu lun adagaragüdüni gudawarügüti litenpulunrugun Wabungiute. 16 Lárigiñe aba hárügüdüni habara tidan ténpulu según larufudun lidan lilurudun Moisesi le luwügürin Wabungiute. Ábaha habahichaguni fádirigu hitaü le hederegerubei Lewitagu houn. 17 Ñéinñanu saragu gürigia ha marumadaguagüdüngiña houngua ligibugiñe Wabungiute, ligía lubeiti háfarunbaliña Lewitagu mudún ha hadewese sun gürigia ha marumadaguagüdüngiñabaña houngua lidan Luéyuri Esefuruni, lun hederegeruniña lun Wabungiute. 18 Saragu haña lubeiti gürigia lílana Éfürain, Manasési, Isakárü luma Sabulón gadan lumutiña leigín léigina Luéyuri Esefuruni gama lumoun mama lau úarani luma lubudubu lugundun marumadaguagüdüntiña houngua ligibugiñe Wabungiute. Gama lumoun furíeiti Esekíasi hawagu, lariñaga:

—Wabungiute areidati, ferudunabaña sun ha áluahabalibu tau sun hanigi, 19 Wabureme, Habungiute wagüchagu, ferudunabaña lau sun marumadaguagüdün hamá houngua kei lariñaguni tilurudun ténpulu.

20 Aba laganbuni Wabungiute lafurieidun Esekíasi, aba feruduna lániña. 21 Ítara liña lubeiti, lidan sedü weyu, efeduha hamuti Ísüraelina ha Herusalénbaña tufedun fein maganatu lébini, lau saragu ugundani. Sagü weyu heremuhan fádirigu hama Lewitagu lun Wabungiute lau katei burí lánina íñaahani luma áfaruni le sagüráuburibei. 22 Aba ladimurehan Esekíasi buidu houn Lewitagu luagu lubuidun hadundehani kultu lánina lalawahóun Wabungiute.

Lárigiñeti heigin lidan éigini lánina fedu luagu sedü weyu, dagagüda hagía adagaragüdüni lánina arandaruni, eremuha hagía lun Wabungiute le Habungiute hagüchagu, 23 aba hachawaraguni sun lílana fulasu fedu luáguya sedü weyu, le hadügübei lau saragu ugundani; 24 lugundun edewehati Esekíasi le lurúeite Hudá milu bágasu wügüriña ha ñǘbürigiña hama sedü-milu mudún houn, edeweha hagía lúrudugu milu bágasu wügüriña ñǘbürigiña hama diisi-milu mudún houn lílana fulasu. Saragu haña fádirigu arumadaguagüdütiña houngua ligibugiñe Wabungiute. 25 Gúndaatiña sun lílana Hudá, dandu fádirigu, Lewitagu hama sun gürigia ha ñǘbuinbaña Ísüraeligiñe, hama terencha ha ñǘbuinbaña lumúanrugugiñe Ísüraeli o ha lan aganóubaña Hudá. 26 Ñeinñein lubeiti saragu ugundani Herusalén, lugundun lúmagiñe bugaha lidaani urúei Salomón le liráü Dawidi, masuseredunti katei líbeina le ñein. 27 Lárigiñe rara hagía fádirigu hama Lewitagu, aba habiniruniña lílana fulasu, ani aganba lumutiña Wabungiute, chülüti hafurieidun sielu le ñein lubéi laganawa Wabungiute le Sándubei.