1 Ábati hanügüni sun lílana Hudá Osiasi, aba híchuguni urúeime leweñegua Amasíasi le lúguchi. Disisi irumu lau Osiasi dan ligía, 2 ligía bugaha araramagüdübalinya uburugu Elatü lárigiñe lounwen lúguchi, ábaya lárügüdüni lárigoun lun Hudá.

3 Disisi irumu lau Osiasi dan le lagumeserunbei arúeiha, arúeihati dimí-san-biama irumu Herusalén. Hekolíasi bugaha tíribei lúguchu, Herusalénna.

4 Buiti bugaha lóuserun Osiasi ligibugiñe Wabungiute kei meha Amasíasi le lúguchi. 5 Áfaaguati láluahani Wabungiute sun wínwanñu lan Sakaríasi, le arufudahabalin lineben Wabungiute lun. Ani sunti dan le láluahanbalin Wabungiute, ruti Wabungiute lubuidun dan lun.

6 Ageindaguati Osiasi hama Filistéana, aba láguruni lubarieirun Gatü, Hábünia luma Asüdódu, aba liñuragun uburugu lumúanrugu Asüdódu haganagua Filistéana. 7 Íderagua lumuti Wabungiute kóntüra Filistéana, kóntüra Arawiana ha bugaha aganóubaña Guru-baali luma kóntüra Amonna. 8 Afayeihatiña bugaha Amonna seinsu lun Osiasi keisi liseinsuna arúeihani, díseti laganbahoun luagu Osiasi, chülǘ lumoun láfadaragun Ehiptu lugundun gánwounhali bugaha lubafu saragu.

9 Bunaguati giñe wáyelesi Herusalén, lurugabu Lubenari Kaaná, lurugabu Lubenari Fulasu Wayati luma luagu kaaná aba líchugun liderebugu. 10 Bunaguati giñe wáyelesi lidan fulasu mageirawati, chigá ligía burí fusu, lugundun gíbetiña bugaha ibiñani luma dandu luagu fulasu wayati kei luagu fulasu mawübüriti. Gawügüriñati bugaha giñe nadagimeintiña áraabu luma lidan lubeibein-agei le áraabubei, luma burí lidan lichari, ladüga hínsiñeti meha tábunawagun nadü lun.

11 Ñéinñanu bugaha súdara aranseñu lun wuribu luma Osiasi, ábaha háfuridun ageindagua según labürühaniña Heieli le abürühabei lun urúei luma Masíasi le úfisi lábugiñe lugumadin Ananíasi, aban hádangiñe lani urúei gumadan. 12 Bián-míluñanu-sisi-san wuriburuguna ganigitiña. 13 Lábugiñe hagumadin, ñéinñanu ǘrüwa-san-sedü-milu-seingü-san súdara aranseñu lun wuribu, aban erei gabafuti le gayaraabei líderaguni urúei lidan luwuribun. 14 Aransehati Osiasi idaüdinaü le hadáü ageindagutiña houn sun lumutuniña, eféin, bunidi, chagidi lautu gürabu, gimara tuma chilinchádi. 15 Adügati giñe burí máhina lánina wuribu Herusalén lun líchuguni luagu burí wáyelesi luma luagu burí liñun-agei baríeiru, lun lǘnhürahan gimara luma dübü wéinamuti ñéingiñe. Díseti bugaha laganbahoun luagu liri, lugundun íderagua lumuti bugaha Wabungiute lidan aban igaburi le hanarimeti darí lun laweiridun lubafu. 16 Aba lanaagun lungua, ligíati katei ligía agünrinchagubalin. Afigouhati ligibugiñe Wabureme le Lubungiute, beluti litenpulunrugun Wabungiute águdaha kupali luagu latarü le ñein lubéi lágudahoua kupali. 17 Gama lumoun aba lebelurun fádiri Asaríasi lárigi hau gádürü-wein fádirigu ganigitiña ha lufadirinigu Wabureme, 18 aba hagagibudagun luma urúei, aba hariñagun lun:

—Urúei Osiasi, úati yu lan bun lun bágudahan kupali lun Wabureme, fádirigu ha ladügawagun Aarón ha anuadirúaañabaña lun hadügüni, houn yu lan lun hadügüni. Furiba ligilisirugugiñe lugundun adügaadibu aban katei le múaranti lun Wabungiute le Wabureme, ani míchubei Wabungiute uéiriguni bun luagu lira.

19 Anihánti buga aban lagei kupali lúhaburugu Osiasi lun lágudahan kupali, aba lagañidun houn fádirigu lidan oura ligía aba ladagarun lépüra lereberugu ñein guánarügü tidan litenpulun Wabureme, lurugabu latarü le ñein lubéi lágudahoua kupali, hañúarü fádirigu. 20 Dan larihinbei Asaríasi le fádiri le íñugutimabei hama híbiri fádirigu luagun, aba harihin luagu anihein lan lépüra lereberugu aba hasagaruni ñéingiñe furese; ani ligía guánarügü busenhali yebe giñe láfuridun ñéingiñe furese, ladüga labeichuni Wabureme.

21 Rédeiti urúei Osiasi lau lépüra darí weyu le lóunwenbei, wínwanti lubeiti urúei keisi láutiña lépüra, dise tuéi luban, ábati lamaharúniwa lun lebelurun ténpulurugun, ábati lagumadihan Hotamü le liráü fulasurugu.

22 Le líbiri luáguti Osiasi lúmagiñe furumiñeti lumoun lagumuhóun, abürüha lumuti profeta Isaíasi le liráü Amosu. 23 Dan lóunwenbei Osiasi, aba hábununi hamoun lagüchagu lidan hagabusandun urúeigu, ladüga anihein lan buga lépüra luagu. Lárigiñe aba larúeihan Hotamü le liráü leweñegua.