1 Efeduha lumuti Hosíasi Luéyuri Esefuruni Herusalén lidan liri Wabureme: Weyu katorusu lidan furumiñeti hati lidan irumu, ligía ladagaragüdüniwa mudún lánina fedu. 2 Aba líchuguniña fádirigu lidan habara le ñein lubéi heseriwida tidan ténpulu, aba lemenehaniña lun hadügüni hawadigimari buidu. 3 Ariñagati giñe houn Lewitagu ha anuadirúabaña ani hameme arufudahabalin lilurudun Wabungiute houn sun Ísüraelina:

—Ru humóun bágüsi sagüráutu tidoun ténpulu to meha ladügüboun Salomón le liráü Dawidi lurúeite Ísüraeli. Manaahadigia humaarume hégewagu. Lunba Wabureme le Hubungiute heseriwida guentó luma lun Ísüraeli lageira Wabureme. 4 Óundaragua humá lun eseriwiduni sun ha gaduheñuguabaña lidan aban, según meha labürüdüni urúei Dawidi luma Salomón le liráü. 5 Redei hamá fiu Lewitagu sanduariurugu luagu kada hóundarun ha gaduheñuguatiña, keisi arufuduti hóundarun iduheñu Ísüraelina hagía. 6 Dagagüda huméi mudún le lánina Luéyuri Esefuruni, harumadaguagüda humá hungua ligibugiñe Wabungiute, aranse huméi le lunbei lemegeirúniwa, lun gayaraabei lan hagunfuliruni híbirigu le lariñagagüdübei Wabungiute lun Moisesi.

7 Ñéingiñe aba líchugun Hosíasi animaalugu hádangiñe libiñanigu houn sun lílana fulasu ha ñéinbaña lun hefeduhani Luéyuri Esefuruni: Mudún ñǘbürigiña hama gábara ñǘbürigiña, darandi-milu hachügü hama ǘrüwa-milu bágasu ñǘbürigiña. 8 Rútiña giñe ha awadigimaridubaña luma urúei edewehani houn lílana fulasu, houn fádirigu luma houn Lewitagu. Ilükíasi, Sakaríasi luma Heieli, ha arihubaña tau litenpulun Wabungiute, deregetiña bián-milu-sisi-san animaalugu houn fádirigu hama ǘrüwa-san bágasu ñǘbürigiña lun lefeduhóun Luéyuri Esefuruni; 9 Konaníasi, Semaíasi, Natanaéli luma giñe Asawíasi, Heieli, Hosabádü ha hábutigu Lewitagu, deregetiña seingü-milu animaalugu houn hama seingü-san bágasu ñǘbürigiña lun lefeduhóun Luéyuri Esefuruni.

10 Dan le aranseli sun katei lun fedu, aba hárügüdüni fádirigu habara, aba haranseragun Lewitagu houngua según lidaani heseriwidun, keisi buga lariñaguni urúei. 11 Ábati hadagaragüdüniña animaalugu ha lánina Luéyuri Esefuruni, añahati Lewitagu élehaña animaalugu, añaha fádirigu abahichaguei latarü lau hitaü le hásügüragüdübei Lewitagu houn. 12 Lárigiñe aba hadireiruni agülei le lunbei lagudún según liibe hóundarun ha gaduheñuguatiña ha lílana fulasu lun hadagaragüdüni lun Wabureme kei lariñawagún tidan liliburun Moisesi; ítarameme giñe hadüga hau bágasu ñǘbürigiña. 13 Lárigiñe aba hásürahaniña animaalugu lun lefeduhóun Luéyuri Esefuruni, kei le aubei labürüdǘwa, leti líbiri idewesei le sagüráuti, aba hábouguni lidan sóudieru, aba hafanreinhani furese furese hadan lílana fulasu. 14 Lárigiñe aba haranseruni Lewitagu le yuubei houn luma houn fádirigu, lugundun bereseguñanu fádirigu ha ladügawagun Aarón darí lumoun áriebu adagaragüda adagaragüdüni gudawarügüti luma agülei. Ligía gasu lubéi haranseruni Lewitagu le yuubei houn luma le yuubei houn fádirigu ha ladügawagun Aarón.

15 Eremuhatiñati, ha ladügawagun Asafü, lídanñanu giñe habara kei lariñaguni Dawidi, Asafü, Emán luma Hedutún, profeta ha eseriwidubaña lun urúei. Kada lúniri bena, luáguñein bena le yuubei lun lóunigiruni, úati ni aban hádangiñe ígiruti lubara lugundun aranse hamuti Lewitagu adagaragüdüni le yuubei houn, habá.

16 Ítara liña laranserúniwa sun eseriwiduni le lunti Wabungiute lidan weyu ligía lun lefeduhóun Luéyuri Esefuruni luma lun ladagarun adagaragüdüni gudawarügüti luagu latarü lani Wabungiute según bugaha lariñaguni urúei Hosíasi. 17 Efeduha hamuti Ísüraelina ha ñéinbaña lidan dan ligía Luéyuri Esefuruni luma sedü weyu le ñein lubéi teigua fein maganatu lébini. 18 Mefeduhóunñahagili bugaha aban Luéyuri Esefuruni libe lira Ísüraeli lúmagiñe lidaani profeta Samueli, úati ni aban hádangiñe lurúeitegu Ísüraeli efeduhati Luéyuri Esefuruni kei ladügüni Hosíasi hau fádirigu, Lewitagu hama lílana Hudá luma Herusalén ha ñéinbaña. 19 Lidan irumu disiwídü lidaaniwagu larúeihan Hosíasi lefeduhóua Luéyuri Esefuruni ligía.

20 Lárigiñe, dan le aranse laaru lubéi Hosíasi ténpulu, aba liabin Nekáu le lurúeite Ehiptu luagun duna Éufüratesi ageindagua lidan fulasu le gíribei Karükémisi. Aba láfuridun Hosíasi lubaroun; 21 gama lumoun aba lóunahan Nekáu ariñaga lun:

—Ígirabana darangilu lurúeite Hudá, mama niábiña ageindagua buma, niábiña ageindagua hama amu néchanigu. Ariñagaali Wabungiute nun lun nóufudahan; ítara liña lubeiti, mageindaguabá luma Wabungiute günringua liñalibu ladüga númagiñeñein.

22 Gama lumoun mabakürünti Hosíasi, busenrügü ligía lageindagun luma madügünga gasu lau leweridiruni Nekáu, eweridihani le lúmagiñebei Wabungiute guánarügü. Aba lubeiti, hageindagun lidan lani Megidu fulasu wayati, 23 ábati hǘnhürüni urúei Hosíasi tau gimara. Ábati lariñagun urúei houn lánigu:

—Sagá humana yáagiñe, miraguawaadina!

24 Aba hasagaruni tídangiñe karü lánina wuribu, aba hásügüragüdüni tidoun amu karü, aba hanügüni Herusaléun le ñein lubéi lounwe. Aba hábununi lidan hamúaha lagüchagu. Ayahuatiña sun lílana Herusalén luma Hudá lárigi Hosíasi. 25 Adügati Heremíasi aban úyanu lánina ábunahani lun. Chülǘ lumoun weyu le uguñe, haritaguagiña sun eremuhatiña luagu Hosíasi lidan burí heremun le lánina óunweni. Héchuaali luagu uremu burí ligía Ísüraeli, ani anihein bürüwañu tidan líburu to burí eremaagülei.

26 Le líbiri asusereduti luáguti Hosíasi, luma burí katei buiti le ladügübei, keisi labürüdün tidan liliburun lilurudun Wabungiute. 27 Luma katei le burí ladügübei lúmagiñe furumiñeti lumoun lagumuhóun, anihein bürüwañu tidan haliburun lurúeitegu Ísüraeli luma Hudá.