1 Dan lagumuchunbei sun fedu, sun Ísüraelina ha Herusalénbaña aba houdin luburuguterugun burí Hudá, aba habouhaniña guáriua ha rara umutiña, bougua hamoun burí liyawa Asera fui hamóun burí sanduariu lidan burí fulasu íñuti darí hagumuchun lau sun burí katei le lidan sun Hudá luma Benhamín, luma giñe lidan Éfürain luma Manasési. Lárigiñe aba hagiribudun sun Ísüraelina haburuguterugun, kada aban lúbiñoun.

2 Lárigiñe aba lafanreinhaniña Esekíasi fádirigu hama Lewitagu luagu lidaani eseriwiduni, lun kada lan aban según lifisiute, ladagaragüdün adagaragüdüni gudawarügüti luma adagaragüdüni lánina arandaruni, lun híchugun eteingiruni luma lun halawahani Wabungiute, luma lun heseriwidun tubenari ténpulu. 3 Ruti giñe urúei lídangiñe le lani lun adagaragüdüni gudawarügüti le lánina binaafin luma le lánina rábounweyu, lun burí adagaragüdüni gudawarügüti lánina samudi, lun fedu le lánina iseri hati, luma burí lun fedu le wéiriguti, ítara kei labürüdǘniwa lidan lilurudun Wabureme. 4 Ariñagati giñe houn gürigia ha awinwandubaña Herusalén lun hederegeruni ídehani le lunbei híchuguni houn fádirigu luma houn Lewitagu lun gayaraabei lan hetenirun lau sun hawara agunfulirei lilurudun Wabureme. 5 Dan le laburuchagunbei lúrudu le, aba híchugun Ísüraelina lau tubuidun hanigi tídangiñe tubuidun-agei hatürigun, to halubahaboun, diwéin, garaba, sírudu luma sun luwuyerigu éigini le áraabugiñeti. Barǘ hamuti giñe lidiisin lídangiñe san, lídangiñe sun halubahan lau liibe.

6 Dandu giñe lílana Ísüraeli hama burí ha aganóubaña lidan amu burí luburugute Hudá, ru hamuti giñe hadiisin hádangiñe san habiñanigu luma lidiisin murusun lídangiñe burí katei le anuadirúabei lun Wabungiute. 7 Lidan lǘrüwan hati ligía hagumeserun óundaraguei burí katei ligía, hagumucha lidan lisedün hati. 8 Danti le lídinbei Esekíasi hama lúrudugu arihei le oundarúbei, aba habiniruni Wabungiute hau sun lumutuniña ha Ísüraelina. 9 Ábati lálügüdüniña Esekíasi fádirigu hama Lewitagu libügürü óundarawaguti ligía, 10 aba lóunabun Asaríasi, fádiri le íñugutimabei le hádangiñebei liduheñu Sadoku, lariñaga lun:

—Lúmagiñebei hagumeserun anüga ídemuei litenpulunrugun Wabungiute, memegeiruntiwa ni kata lun weigin, ani ígiraguati saragu; anihán sun le ígiragubei, lugundun biní laaña Wabungiute lumutuniña.

11 Ligía lébubei ladügagüdün Esekíasi lagei éigini litenpulunrugu Wabungiute. Lásurun hadügünu, 12 aba hádaruni ídemuei tidoun, lidiisin murusun lídangiñe san le buga hederegerubei luma burí katei le anuadirúabei lun Wabungiute. Aba híchuguni Konaníasi luma Simí le lamulen lun harihin lau burí katei le. 13 Aba líchuguniña urúei Esekíasi luma Asaríasi le furumiñeti tábuti litenpulun Wabungiute, Heieli, Asasíasi, Naatü, Asaeli, Herimótu, Hosabádü, Elieli, Isümakíasi, Maatü luma Benaíasi keisi óunigihatiña lábugiñe lugumadin Konaníasi luma Simí le lamulen. 14 Koré, le lewita, le liráü Imüná, le lúniri bena le luéigiñebei oubaü le ñéingiñe lubéi láfuacha weyu, ligía arihubei lau idewesei le hadügün gürigia lau hagundan lun Wabungiute luma lun lafanreinhani ídemuei luma katei le anuadirúabei lun Wabungiute. 15 Íderagua hamuti Koré haburuguterugu fádirigu, Edén, Minhamín, Hesusu, Semaíasi, Amaríasi luma Sekaníasi, lidan lafanreinhóun sun katei hadan fádirigu háledigu. Hadügüniha keisi larufuduni lidaani heseriwidun, dandu houn íbugañanu kei houn amulenu, 16 houn sun ha góudidadibaña ténpulurugu lun hadügüni hawadigimari le lánina sagü weyu, según lidaani heseriwidun luma hafisiute, añaheinrügaaña ligía bürüwañu tidan garudia to ñein habéi giñe sun ha ǘrüwati irumu hau lun iñun. 17 Según haduheñu fádirigu habürüdǘwa, ánhaña Lewitagu ha wéintiña irumu hau lun iñun, según lidaani heseriwidun luma hafisiute. 18 Tidan garudia to ñein lubéi habürühóua abahüdǘwatiña sun irahüñü ñǘbürigiña, úmarigu hama isaanigu, sun gürigia, lugundun anuadirúatiña lun Wabungiute ladüga fisiu le ichugúbei houn lun hadügüni. 19 Lidan sun burí uburugu, ñéinñanu wügüriña íchugutiña lun hafanreinhani fánreinti lun kada wügüri hadan fádirigu ha ladügawagun Aarón, luma houn sun Lewitagu ha bürüwañubaña, ha aganóubaña haburuguterugu fádirigu luma lidan burí áraabu le geyegubei lau, ábatiha líchugun éigini houn Lewitagu ha bürüwañubaña tidan garudia.

20 Ítara liña ladügüni Esekíasi lidan sun Hudá. Buiti bugaha lóuserun, úaragua ani haruma ligibugiñe Wabureme le Lubungiute. 21 Sun le ladügübei lun leseriwidun litenpulunrugu Wabungiute libügürü lúrudu, luma gumadi, adüga lumuti áfaagueina láluahani Wabungiute tau sun lanigi, ligía lasalirunbei sun le ladügübei lun buidu.