1 Wein irumu lau Aasi dan le lagumeserunbei arúeiha, arúeihati disisi irumu Herusalén; gama lumoun mabuidunti bugaha lóuserun ligibugiñe Wabureme, mítaranti kei Dawidi le lagücha, 2 falarügüléi hagaburi lurúeitegu Ísüraeli, adaaguati giñe guáriua láutiña gürabu rǘrüguati ha liyawa Baali, 3 águdahati kupali lidan fulasu wayati le lani Ben-inomu, gudagüda lumutiña lirahüñü keisi adagaragüdüni ítara kei hóuserun néchanigu ha buga lachagarubaña Wabureme hagibugiñegiñe Ísüraelina. 4 Dagagüdati giñe águdaha ligía kupali tidan burí haligilisin gibe tubungiutegu, luagu burí wübü luma tábugiñe tídibu wewe hilumatu.

5 Ligía lébubei lederegeruni Wabureme le Lubungiute lúhaburugun lurúeite Siria, aba háfarahani Síriana, barǘ hagía saragu hádangiñe lánigu adaüra Damasüku. Derege lumuti giñe Wabureme lúhaburugun lurúeite Ísüraeli, 6 Ladüga Peka le liráü Remalíasi áfarati meha san-wein-milu wügüriña ganigitiña Hudá, luéigiñe hígiruni Wabureme le Habungiute hagüchagu. 7 Ítarameme giñe Sikürí aban wügüri le wuriburuguna le Éfürainna, áfara lumuti giñe Maseíasi, liráü urúei, áfaralei Asürikámü ábuti tidan luban urúei, áfaralei giñe Elikaná furumiñeti úfisi lúbiñe urúei.

8 Lanwoun lira barütiña súdaragu Ísüraelina bián-san-milu gürigia Hudaana adaürawagúa, hiñaruñu, wügüriña irahüñü, hama hiñaruñu irahüñü rédeitiña giñe labu saragu katei aba hanügüni lun Samarioun. 9 Ñeinñein métiha aban profeta le lani Wabureme, le gíribei Odedi, aba láfuridun habaroun súdaragu lídanbei hebelurun Samarioun aba lariñagun houn:

—Gáñiha Wabureme le Habungiute wagüchagu luma Hudá, ligía lederegerunbaliña húhaburugun. Gama lumoun huguya aba háfaraguniña lau aba lanarime igañi le aubei magundan lan Wabungiute. 10 Lanwoun lira eledeguaadün lun hanügüniña lílana Hudá hama lílana Herusalén hidamunme. Ibidiñeti funagia hun luagu afigouhaadün lan kóntüra Wabungiute le Hubungiute? 11 Adüga humá lubeiti gasu nau, giribugüda humaña adaürǘtiña ha hanügübaña, hameme híbirigu, lugundun wéiriti ligañi Wabureme huma.

12 Asaríasi le liráü Hoanán, Berekíasi le liráü Mesilemótu, Esekíasi le liráü Salumu luma Amasá le liráü Adülái ha meni ábutigu Éfürain, aba hararamun hagibugiñe ha ñǘbuinbaña wuriburugugiñe, 13 aba hariñagun ábutigu ha houn:

—Manüga humá adaürǘtiña ñahoun, gadurunwañein ligibugiñe Wabungiute. Lau Katei le habusenrubei hadügün, haganwoundagüdübei wafigoun luma wadurun, le gíbeelibei, ábame lagañidun Wabungiute lun Ísüraeli saragu.

14 Ábati hígiragüdüniña súdara adaürütiña, ígira haméi burí katei le buga hagidarubei hawéi hagibugiñe ábutigu, hama sun lílana fulasu. 15 Lárigiñe, gádürü bugá meni ábutigu hagüra aba hetenirun houn buga ha adaürǘbaña, tídangiñememe ílagu to buga hagidaruboun hawéi aba hasagarun daüguaü lun hadaüraguagüdüniña ha madaüragunbaña, daü hagía hasabadun, hóugüda hamaña guragüda hamaña, agaraniha hagía lun biti burí le hawagubei, aba hawariragüdüniña ha danimabaña hawagun burigü darí Herikó aba hígiruniña hama haduheñu, aba hagiribudun Samarioun.

16 Lidoun dan ligía, aba lóunahan urúei Aasi óunagülei amuriaha luma lurúeite Asiria lun líderaguni, 17 ladüga beluyaaña lan buga Edomuna hawagu, ani gañei hamaaña buga Hudaana, barǘ hagía fiu hádangiñe adaüra. 18 Asagaraha hamaali giñe buga Filistéana luburugute burí fulasu mawübüriti luma burí luburugute Négebü le lani Hudá; ragǘ hamaali bugaha Betü-sémesi, Ayalón luma Gederótu, luma giñe Sokó, Timüná luma Gimusó lau burí sun lirahüñü láüdüte, aba haganóun ñein. 19 Lugundun lǘnabudagüdüni Wabureme Hudá ladüga Aasi le lurúeite Hudá, ladüga ligía bugaha lébunabei laribadun Hudá, ani múaranti bugaha ligibugiñe Wabureme.

20 Aba liabin Tigülátü-Pileserü le lurúeite Asiria kóntüra Aasi, lubaragiñe hamugati líderaguni rúrügü ligía lidere dan lun. 21 Lau sun sagaláni Aasi katei burí le gebegiti litenpulunrugugiñe Wabureme, tídangiñe lani urúei palasiu luma hábiñegiñe ábutigu lun líchuguni keisi liseinsun gumadi lun lurúeite Asiria, míderagun lumuti lira lidan ni kata. 22 Gama lumoun lau sun lídanñein lan lénrengunga, máluahan lumuti Wabureme le tímatimaati. Ítara liña meha urúei Aasi! 23 Adagaragüdati houn lubungiutegu Damasüku, ha lébunabaña leferidirun. Laritagun yebe luagu anhein lan buga íderagua habaliña lubungiutegu Siria lurúeitegu ageiraü ligía, híderagubei lan giñe anhein adagaragüda houn. Gama lumoun hagía lébunabaña lagünrinchagun luma hagünrinchagun sun Ísüraelina. 24 Óundaragua lumuti sun ílagu le tídanbei litenpulun Wabungiute, aba lañaürüdaguni, aba ladouraguni tubenari ténpulu, aba ladügagüdün latarü lungua lidan kada kaaná Herusalén. 25 Bunaguati burí haligilisin gibe tubungiute lidan sun burí luburugute Hudá, lun lágudahan kupali houn amu búngiugu, agañidagüdei Wabureme le Habungiute wagüchagu.

26 Le líbiri asusereduti luma sun katei le ladügübei lúmagiñe furumiñeti darí lagumuhóun, anihein bürüwañu tidan haliburun lurúeitegu Hudá luma Ísüraeli. 27 Aba lounwen, aba hábununi haganagua binadu lagübürigu uburugu Herusalén, gama lumoun manügün hamuti lidoun hamúaha lurúeitegu Ísüraeli. Aba larúeihan Esekíasi le liráü leweñegua.