1 Aba hanügüni lílana fulasu Hoakasi le liráü Hosíasi, aba híchuguni urúeime Herusalén leweñegua lúguchi. 2 Wein-ǘrüwa irumu lau Hoakasi dan le lagumeserunbei arúeiha, arúeihati ǘrüwa hati Herusalén. 3 Aba lagidaruni lurúeite Ehiptu Hoakasi luéigiñe lálana arúeihani Herusalén, fáyeigüdalei fulasu sedü-milu-bián-san-ǘrüwa-wein líburu pülata luma ǘrüwa-wein-duusu líburu golu. 4 Aba líchuguni lurúeite Ehiptu Eliakímü le lamulen Hoakasi urúeime Hudá luma Herusalén, aba lasansiruni liri aba líchugun Hoakimü luagu, ánheinti Hoakasi, aba lanügüni Ehiptun.

5 Wein-gádürü irumu lau Hoakimü dan ligía, arúeihati unsu irumu Herusalén. Gama lumoun wuribati bugaha lóuserun ligibugiñe Wabureme le Lubungiute. 6 Aba lageindagun Nabukodonosoru lurúeite Babilónia, kóntüra Hoakimü aba lagañeiruni wuribu aba lagürawagúniwa Hoakimü lau güringüri le lauti buronse lun lanügüni Babilónioun. 7 Barüti giñe Nabukodonosoru lídangiñe ílagu le ayusurúbei litenpulunrugu Wabungiute lun Babilónioun, aba líchuguni tidan litenpulun.

8 Le líbiri asusereduti luáguti Hoakimü, luma burí lagübüri lóuserun, luma le asuseredubei lun, anihein bürüwañu tidan haliburun lurúeitegu Ísüraeli luma Hudá. Aba larúeihan Hoakín le liráü leweñegua.

9 Disiwídü irumu lau Hoakín dan le lagumeserunbei arúeiha, arúeihati ǘrüwa hati diisi weyu Herusalén. Gama lumoun wuribati bugaha lóuserun ligibugiñe Wabureme.

10 Irumubei lárigiñe, aba lóunahan Nabukodonosoru le lurúeite Babilónia anügagüdei Babilónioun úara luma ílagu burí le sérutimabei litenpulunrugu Wabureme, aba líchuguni Sedekíasi le liduhe Hoakín urúeime Herusalén luma Hudá.

11 Wein-aban irumu lau Sedekíasi dan le lagumeserunbei arúeiha, arúeihati unsu irumu Herusalén. 12 Gama lumoun wuribati bugaha lóuserun ligibugiñe Lubungiute. Mǘnabudaguagüdünti lungua ligibugiñe profeta Heremíasi le meha ariñagubei dimurei lun le lúmagiñeti Wabureme. 13 Bóugudin luéi lira, iñuraguati lungua kóntüra Nabukodonosoru, le bugaha áfiñuragüdübalin luagu liri Wabungiute luagu lúmagiñebei lan, ani aban lábunagun lidan lueirin libidiounigan aau lun magiribudúnbei lan lun Wabureme le Lubungiute Ísüraeli.

14 Arufuda hamuti giñe sun lábutigu Hudá, fádirigu hama lílana fulasu hafigoun lau hafalaruni lagübüri burí katei le hadaagubei néchanigu gibe tubungiutegu luma lau híchugun uéiriguni houn guáriua. Lau lira aba híchugun mabahüdüni tun litenpulun Wabungiute, to buga lanúadiruboun keisi lani sanduariu Herusalén. 15 Wéridi lumutiña Wabureme le Habungiute hagüchagu saragu wéiyaasu hádangiñe lóunagülegu, lugundun yebe lugudemehabu houn lumutuniña luma lun fulasu le ñein lubéi laganawa. 16 Éheraharügü hagía hau lóunagüle Wabungiute, meberesegúntiña lau le hariñagubei houn, adaagua hagía bula hau lani Wabungiute profetagu, darí lun lagañidun Wabungiute kóntüra lumutuniña aba úaali lan árani.

17 Ábati lóunahani Wabungiute harúeite Babilóniana hawagun, aba láfaraguniña wügüriña ñǘbürigiña ténpulurugu, magudemehabuti houn wügüriña nibureingiña ni houn würiña ñǘbürigiña, ni hau wéiyaaña mutu ni houn danimatiña. Derege lumutiña Wabungiute súngubei lun. 18 Sun tumegeguna litenpulun Wabungiute, wéinamuti luma le burí ñǘbüriraüti luma burí tirisin ténpulu, le lani urúei luma le hani burí ha awadigimaridubaña luma. Barǘ lumutiña harúeite Babilóniana súngubei Babilónioun. 19 Gudá hamutu giñe litenpulun Wabungiute, fui haméi lubarieirun Herusalén, gudá hamóun burí lani palasiu, günringua haméi sun katei gebegiti le ñeinbei.

20 Lárigiñe sun ha erederubaña wínwanñu lárigiñe áfarawaguni aba lanügüniña lau éregu lun Babilónioun le ñein lubéi ladügaña lidamunme luma hadamunme lirahüñü darí lagumeserun larúeihan Pérüsia Babilónia, 21 lun lagunfulirun le buga lariñagagüdübei Wabungiute lun profeta Heremíasi. Ítara luba buga lun gayara lan ladariruni ageiraü lemeraagun, ladüga emeraaguati lidan sun dan le günringuañu lubéi, darí lásügürün ǘrüwa-wein-diisi irumu.

22 Lidan furumiñeti lirumudiri larúeihan Siru, le lurúeite Pérüsia, ani lun lagunfulirun le lubalintibei Wabureme libügürü le lariñagubei profeta Heremíasi, aba ládaruni Wabungiute Siru lun buga lasubudiragüdüni lau dimurei luma bürüwarügü lidan sun fulasu le ñein lubéi larúeiha, lariñaga: 23 «Lariñahare Siru le lurúeite Pérüsia: Ru laali Aburemei, le Lubungiute sielu sun arúeihani le ubouagubei núhaburugun, ani ariñagaali nun lun nábunagun aban ténpulu lun Herusalén, le lóubawagubei Hudá. Furumiñeguarügü lubeiti hídangiñe, ha hádangiñetiña lumutuniña Aburemei, íderagualei Bungiu, leiba Herusalén».