1 Lidan furumiñeti lirumudiri larúeihan Siru, le lurúeite Pérüsia, lun giñe lagunfulirúniwa Lererun Bungiu le buga lariñagubei Heremíasi, aba ládahani Bungiu Siru lun lasubudiragüdüni gumadi le lidan sun larúeihan lau dimurei luma bürüwañu: 2 «Anihán nariñagun au Siru, le lurúeite Pérüsia: Ru laali Bungiu le siélubei sun arúeihani le ubouagubei núhaburugun, ani ariñagaali nun lun nábunagun aban ténpulu lun, uburugu Herusalén le lídanbei Hudá. 3 Furumiñeguarügü lubeiti hídangiñe, le lánigu Bungiu, íderagualei Bungiu, ábame lidin uburugun Herusalén le lídanbei Hudá ábunaguoun litenpulun Aburemei, le Lubungiute Ísüraeli, Bungiu le aganóubei Herusalén. 4 Lunti híderaguniña habesinanigu Ísüraelina lau le hemegeirun lun hagiribudun hageiroun, lunti híchugun pülata houn, golu, ílagu hama ibiñanigu, bóugudin luéi idewesei le lunbei híchuguni tun litenpulun Bungiu uburugu Herusalén».

5 Aba haranserun hábutigu liduheñu Hudá luma Benhamín, fádirigu hama Lewitagu sun ha lagagudubaña Bungiu lun katei le, aba houdin Herusaléun lun hararamagüdünuya litenpulun Aburemei. 6 Aba híderaguniña habesinanigu lau pülata, golu, ílagu, bágasu luma burí katei gebegiti, bóugudin luéi sun luwuyeri edewehani le híchugubei lau hagundan. 7 Aba lederegeruni urúei Siru sun ílagu le tani ténpulu le buga lanügübei Nabukodonosoru Herusaléngiñe tidoun hatenpulun lubungiutegu. 8 Aba láguyugüdüni, aba líchuguni lun Mitürídatesi le ágüdahabalin seinsu, lárigiñe labahüdüni Mitürídatesi, aba lederegeruni lun Sésibasarü, le agumadihabei Hudá. 9 Darandiñein kopu wéinamuti lauti golu, milu kopu wéinamuti lauti pülata, wein-nefu gusiñu, 10 darandi kopu lauti golu, gádürü-san-diisi kopu lauti pülata le ǘnabutimati lebegi, luma milu amu burí luwuyeri katei. 11 Lidan súngubei, séingüñein-milu-gádürü-san ílagu lauti golu luma pülata. Aba lanügüni Sésibasarü sun katei le lárigoun Herusaléun, dan le lagiribudunbei Babilóniagiñe hau ha meha anaawagúbaña hageiragiñe.