1 Sun anihán lan Ésüdürasi afurieida luma agufesera layahuña, ani hudugu ligía tigibugiñe litenpulun Bungiu, aba hayabin fiu Ísüraelina, wügüriña, würiña hama irahüñü ayahuaheina giñe aba hadamuridagun geyegua lau. 2 Ábati ladimurehan Sekaníasi, le liráü Heieli ladügawagun Elamü, aba lariñagun lun Ésüdürasi:

—Wagía magunfuliruntiwa luma Wabungiute, lugundun maríeihadiwa hama würiña terencha lílana néchani ha gíbebaña ubungiutegu; lau sun lira, aniheingua emenigini lun Ísüraeli. 3 Füramase wamá luagu wabugaaña lan sun wámarigu ha terencha wawariua hau sun hasaanigu, lun wagunfuliruni lúrudu, ítara kei bariñaguni woun, buguya hama ha inebehabubaña lun lilurudun Bungiu. 4 Saraba, ladüga buguya lunbei badügüni; wagíameti lun wíderagunibu. Gaguraasunbá, adügabéi.

5 Ábati lararamun Ésüdürasi, aba layanuhan houn lun füramasegüda lániña hábutigu fádirigu, hábutigu Lewitagu hama sun Ísüraelina, lun hagunfuliruni hadaradun, aba hóunabun ariñaga luagu hagunfulirubei lan. 6 Lárigiñe aba lidin Ésüdürasi litenpulunrugugiñe Bungiu, aba lidin lirumunrugun Hoanán, le liráü Eliasíbü, ñein lásügürei áriebu méiginga, ani mátunga ni kata, ladüga híruti saragu luagu hagaburi ha agiribudubaña lídangiñe hadaürǘniwa.

7 Lárigiñe aba lagúarun hawagu sun ha agiribudubaña lídangiñe hadaürǘniwa, ha Hudaabaña hama ha Herusalénbaña lun hóundaragun uburugu Herusalén. 8 Aba hariñagun ábutigu hama eweridihatiña luagu sun lan ha machülütiña lidan ǘrüwa weyu, lagidarúba lan le hámati hawéi, bugawagua hagíame lídangiñe fulasu le ichugúbei houn ha agiribudubaña lídangiñe hadaürǘniwa. 9 Aba lubeiti hóundaragun sun wügüriña ha Hudaana hama ha ladügawagun Benhamín uburugu Herusalén, weyu wein lidan linefun hati luagu ǘrüwa weyu. Aba hañuurun sun hagía lidan tibürürün litenpulun Bungiu, lau adadagaruni luagu katei ligía, luma luagu huya le áhuyubei. 10 Ábati lararamun fádiri Ésüdürasi, aba lariñagun houn:

—Afigouhaadün lau hamarieidun hama würiña terencha, aganwoundagüdei lidurun Ísüraeli. 11 Anha humá lubeiti, ya, ligibugiñe Aburemei le Habungiute hagübürigu luagu gadurun humá, ábame híchaagun hungua lun hagunfuliruni lugundan Bungiu. Dise humá hawéi gürigia ha ibidiñehabutiña lun Bungiu luma hawéi húmarigu ha terencha.

12 Aba hariñagun súngubei lau umalali héreti:

—Wadügübei le bubeibei woun. 13 Gama lumoun gíbetiwa, ani meredeti láhuyun huya le; siñatiti werederun bóugudi, lugundun mama lánina aban ni bián weyu katei le lunbei wafansehani ani gíbetiña wádangiñe adügüti figóu le. 14 Buítimati hamuga lun herederun wábutigu ya weweñegua, ábame liridún aban weyu lun sun lan wagía le aganóubei waburuguterugu ha maríeibaña hama würiña terencha lun hayabin lidan weyu ligía úara hama gumadimatiña hama aguseragüdütiña waburuguterugugiñe darime lagumuchun lanarime ligañi Wabungiute luéigiñe katei le.

15,16 Gúndaatiña sun ha agiribudubaña lídangiñe hadaürǘniwa lun ítara lan, luéidigia Yónatan, le liráü Asaeli, luma Haasíasi, le liráü Tiküwá, aba houdin Mesulámü luma Sabütái le lewita hámagiñe. Ábati lanúadirun fádiri Ésüdürasi fiu wügüriña ha hábutigu iduheñu, aba hóundaragun wügüriña hagía weyu furumiñe lidan lidiisin hati lun haturiahani kesi le. 17 Weyu furumiñe lidan furumiñeti hati ligía hásurun lau sun kesi hawaguti wügüriña ha buga amarieidubaña hama würiña terencha.

18 Anihán hiri fádirigu ha adarirúbaña maríeiñu hama würiña terencha:

Hádangiñe ladügawagun Hosué, le liráü Hosadákü, luma hádangiñe liduheñu: Maseíasi, Elieserü, Haribü luma Gedalíasi, 19 ha íchugubaña füramasei dǘgüdati luagu hígiraaña lan hámarigu, aba hadagaragüdün aban gábara keisi idewesei luagu hafigoun.

20 Hádangiñe ladügawagun Imerü: Ananí luma Sewadíasi.

21 Hádangiñe ladügawagun Harimü: Maseíasi, Elíasi, Semaíasi, Heieli luma Osiasi.

22 Hádangiñe ladügawagun Pasuru: Elioenái, Maseíasi, Ísümaeli, Natanaéli, Hosabádü luma Elasá.

23 Hádangiñe hadügawagun Lewitagu: Hosabádü, Simí, Kelaíasi (lememe Kelitá) Petaíasi, Hudá luma Elieserü.

24 Hádangiñe eremuhatiña: Eliasíbü.

Hádangiñe óunigirutiña bena: Salumu, Télemü luma Urí.

25 Híbiri Ísüraelina ha lídanbaña kesiméme le:

Hádangiñe ladügawagun Parosu: Ramiasi, Hesíasi, Malükíasi, Mihamín, Eleasárü, Malükíasi luma Benaíasi.

26 Hádangiñe ladügawagun Elamü: Mataníasi, Sakaríasi, Heieli, Abüdí, Heremótu luma Elíasi.

27 Hádangiñe ladügawagun Satú: Elioenái, Eliasíbü, Mataníasi, Heremótu, Sawadü luma Asisá.

28 Hádangiñe ladügawagun Bebái: Hoanán, Ananíasi, Sawái luma Atülái.

29 Hádangiñe ladügawagun Baní: Mesulámü, Maluku, Adaíasi, Hasubu, Sealü luma Ramotu.

30 Hádangiñe ladügawagun Paatü-moabü; Adüná, Kelali, Benaíasi, Maseíasi, Mataníasi, Besaléli, Binúi luma Manasési.

31 Hádangiñe ladügawagun Harimü: Elieserü, Isíasi, Malükíasi, Semaíasi, Simeón,

32 Benhamín, Maluku luma Semaríasi.

33 Hádangiñe ladügawagun Hasumu: Matenái, Matatá, Sawadü, Eliféletü, Heremái, Manasési luma Simí.

34 Hádangiñe ladügawagun Baní: Madái, Amürámü, Ueli,

35 Benaíasi, Bedíasi, Keluhú,

36 Waníasi, Meremótu, Eliasíbü,

37 Mataníasi, Matenái, Haasái.

38 Hádangiñe ladügawagun Binúi: Simí,

39 Selemíasi, Natán, Adaíasi,

40 Makünadübái, Sasái, Sarái,

41 Asaréli, Selemíasi, Semaríasi,

42 Salumu, Amaríasi luma Hosé.

43 Hádangiñe ladügawagun Nebu: Heieli, Matatíasi, Sawadü, Sebiná, Hadáu, Hoeli luma Benaíasi.

44 Súngubei ha, maríeitiña hama würiña terencha, gama lumoun aba hígiruniña, aba hóunahaniña hau sun hasaanigu.