1 Dan lagumuchunbei katei le, aba hayarafadun ábutigu nun, aba hariñagun nun:

—Márügüdaguntiña Ísüraelina houngua, ni fádirigu, hama Lewitagu, hawéi lílana fulasu, ha Kananna, Étüna, Féresüna, Hebusuna, Amonna, Moábüna, Ehiptuna, hama Amoruna, lábugiñe sun liyereehabu hagaburi le burí áhuduraguni houn guáriua. 2 Saragu hádangiñe maríeihaña hama hasaanigu gürigia ha; mígisiguaali lubeiti lageira Bungiu lungua hama amu hawuyeri gürigia. Ani ábutigu hama gumadimatiña, hagía furumiñebaña adügei figóu le.

3 Dan naganbunbalin katei le, aba naheiridagunu nadaüragun nuougua, aba náhulahani nídiuma luma nídiburi arufudei nigarigu, aba nañuurun lau saragu igarigu tidan nanigi. 4 Sun ha hanufudebaña luéi labeihan Lubungiute Ísüraeli luéigiñe figóu, hádangiñe ha agiribudubaña lídangiñe hadaürǘniwa, aba hayabin numoun; gama lumoun au, aba nasigirun ñun lau igarigu tidan nanigi, darí lidaani adagaragüdüni le lánina rábounweyu. 5 Oura ligía, ligía nárügüdagun nungua, ítara tau nadaüragun héiriguañu, aba nagumeserun afurieida lun Nabureme le Nubungiute, 6 nariñaga:

—Nubungiute, Nubungiute, wéiriti nibusigari darí lun ibidiñe lan nun ida luba lan nadimurehan bun. Gíbeyaali wadurun, chülühali dagá sielun. 7 Lǘhadiwa abagarida lidan lanarime figóu chülǘ lumoun dan le, deregewaadiwa houn lurúeitegu amu fulasu ladüga wafigoun, dandu wagía kei wafadirinigu hama warúeitegu. Buleseiwaadiwa, sagawa wageiragiñe, íweruhoua, barüwa wagía kei ni kata, ani ítarameme waña chülǘ lumoun dan le. 8 Gama lumoun guentó, Wabureme ani Wabungiute, adügaali bareini lun ñéinbaña lan fiu wádangiñe séfuñu ani rúa ligía woun lun wadügünu waban lidan múa le sándubei; rúhadibu iseri lanpu lun wagu, rúhadibu murusun awaraguni woun labadinagua wamudirawagúniwa. 9 Lau sun idamuni wamá, mígirun bágidiwa lidan wamudirawagúniwa; arufuda baali bareini woun hagibugiñe lurúeitegu Pérüsia, rúhadibu ibagari woun lunya wararamagüdünu bitenpulun lídangiñe günringuaü areida báadiwa uburugu Hudá luma Herusalén!

10 —Gama lumoun guentó, Wabungiute, kábagia wariñaga lárigiñe sun le adüga wamaalibei? Magunfulirun wamagili gumadi 11 le bíchugubei hádangiñe profetagu, ha eseriwidubalibu. Wéridi bumutiwa luagu fulasu lan le ñéinhinba lubéi webelura lun waganóun ñein, wuriba lan hóuserun gürigia ha ñéinbaña, luagu buíngüda hamaali lan lau iwiyei lau lagübüri hóuserun le hóuserun gibe tubungiutegu. 12 Ariñagatibu giñe woun lun mamarieidagüdün wamaniña wasaanigu ha würiña hama hasaanigu, maha wagíame lun hamarieidun hasaanigu ha würiña hama wasaanigu, ni lun wáluahan darangilaü luma ubuidumehabuni hama gürigia ha, lun gayaraabei lan here wamá súnwandan, lun wabagariduni lareini fulasu, lun wígiruni houn wadügawagun keisi halagante lun sun dan.

13 —Lárigiñe sun le susereelibei woun ladüga wariban luma lueirin wadurun, lau sun mabeichunbániwa kei yebe le wadünabei ladüga wafigoun, rúrügü buguya esefuruni woun, 14 gayaraayabei funagia wadüraaguni bugumadin lunya wamigisiragun hama gürigia wuriba tóuserun ha? Ma funagia bagañiduña hamuga wama, aba hamuga bagünrinchaguniwa darí bagumuchun wau súngubei wagía?

15 —Nabureme, Lubungiute Ísüraeli, richatibu wama súnwandan; ígiraadibu lun habagaridun fiu wádangiñe keisi larihíniwa uguñe weyu. Ani wagía, gaduruntiwa bigibugiñe le tímatimaati; ligía lásiñarunbei werederun biñuarü.