1 Dan lachülürünbei lisedün hati, dan le aranseguaaña Ísüraelina houngua hageira, aba hóundaragun súngubei uburugu Herusalén. 2 Ábati lagumeserun Hosué, le liráü Hosadákü hama lánigu ha fádirigu, Sorobaweli, le liráü Salatiéli hama haduheñu adügei lani Lubungiute Ísüraeli latarü, lun ladagarawagüdün adagaragüdüni gudawarügüti le lariñagubei lilurudun Moisesi le luwügürin Bungiu ligibuagu. 3 Kei hanufude habéi hawéi lílana fulasu ligía ábaya hadügüni latarü derebugu lídanmeme fulasu le ñein lubéi meha, ságüti binaafin luma sagü rábounweyu hadagaragüdün adagaragüdüni gudawarügüti luagu latarü lidan liri Bungiu. 4 Efeduha hamuti giñe tufedun dibasein ítara keisi labürüdǘn lidan lúrudu, ábaha híchuguni adagaragüdüni gudawarügüti le lánina kada aban weyu ítara kei ibei le ichugúti sagü weyu, 5 ítara kei adagaragüdüni gudawarügüti le lánina sagü weyu, luma le lánina iseri hati, le lánina burí lufedun Bungiu le sagüráubei, luma burí le híchugubei gürigia lau hagundan lun Bungiu. 6 Lúmagiñe furumiñeti weyu lidan lisedün hati, aba hagumeserun adagaragüda lun Bungiu lau sun magumeserungiña lan adügoun litenpulun. 7 Lárigiñe aba híchugun seinsu houn ábunagutiña muna luma houn sarafangei, éigini, uniñein luma garaba houn gürigia ha Tíruna hama Sidonna lun hanügün wewe le hibúari houn lúmagiñe Líwanugiñe darí Hope, según líchugun Siru le lurúeite Pérüsia üma houn.

8 Aba liabin Sorobaweli le liráü Salatiéli, luma Hosué le liráü Hosadákü, úara hama híbirigu ha fádirigu, Lewitagu hama sun abugútiña ha agiribudubaña Herusaléun, aba hagumeserun ábunaguounya litenpulun Bungiu lidan libiaman hati lidan libiaman irumu lúmagiñe hachülürün Herusaléun, aba híchuguniña Lewitagu ha barühaña sügǘ lau wein irumu lun hagía lan ariha lau wadagimanu. 9 Aba lóundaragun Hosué hau lirahüñü hama líbirigu luma Kadümiéli hau lirahüñü ha ladügawagun Hudá luma hama ladügawagun Enadádü, lirahüñü hama líbirigu ha Lewitagu lun hagía lan adundehaña ha nadagimeinbaña tuagu litenpulun Bungiu.

10 Dan le hábununbalin ábunagutiña tugudina litenpulun Bungiu, aba hararamun fádirigu tau hadaüragun to hadaürüboun lubá dan ligía, luma tau burí fidu. Barütiña Lewitagu ha ladügawagun Asafü pülatíyu lun heremuhan lun Bungiu, kei buga lariñaguni Dawidi le lurúeite Ísüraeli. 11 Híbiri eremuha híbiri óunabaha:

«Ru humá eteingiruni lun Aburemei ladüga buiti,

ani magumuchaditi línsiñehabu lun Ísüraeli».

Aba hagúaragun sun gürigia lau ugundani, aba heremuhan lun Aburemei ladüga gumeseeli lan tábunawagunya litenpulun. 12 Saragu hádangiñe fádirigu, Lewitagu hama hábutigu iduheñu ha wéiyaaña ha meha arihubarun furumiñetu ténpulu, aba hagúarahan ayahua lau harihin lagumeserun tábunawagun iseri ténpulu to. Híbiri aba hagúarahan lau ugundani. 13 Siñati lasubudirun agúarahani lau ugundani lumoun ayahuni, lugundun hanarimeti hareinchun darí lun laganbún dise luéi fulasu.