1 Ábati lariñagun urúei Daríu lun láluahoun ñein lubéi tareidahóua burí gárada to gebegitu uburugu Babilónia; 2 Aba tadarirún aba líburu tidan lani Ekübatána palasiu, to Médiaboun, lariñahare tidan líburu tuguya:

3 «Lidan furumiñeti lirumudiri larúeihan urúei Siru, ariñagati:

"Tibügürü litenpulun Bungiu uburugu Herusalén: Rualá tiderebugu, ráramayata muna, lun ladügǘn adagaragüdüni ñein. Wein-sédübei méturu tiñun, wein-sedü tidabuberen;

4 lau ǘrüwa fíleiti buloke le lauti dübü luma aban lauti wewe le iserigili. Lídangiñeba liseinsuna arúeihani lafayeirúa ebegi. 5 Ánheinti tumegegu litenpulun Bungiu, le meha lasagarubei Nabukodonosoru tídangiñe ténpulu Herusalén anüga Babilónioun, barüwalá lárigoun Herusaléun, rualá lárigoun lidoun lubara tidan litenpulun Bungiu" ».

6 Ábati lariñagun urúei Daríu lun Tatenái le agumadihabei lidan fulasu le luéigiñebei oubaü le ñeinhin lubéi lálüda weyu libiti duna Éufüratesi, luma lun Setarü-bosunái hau hapanaagu hameme úfisigu lidan fulasu ligía:

«Dise humá Herusaléngiñe, 7 ígira humá lun larihin agumadihati hama ábutigu lau tararamunya litenpulun Bungiu lidan tubara. 8 Anihán nererun libügürü ida luba lan híderawagun huríu ha arihubaña lau tábunawagunya litenpulun Bungiu: Lun leseriwidun seinsu le libihubei urúei lídangiñe fulasu le luéigiñebei oubaü le ñéingiñe lubéi lálüda weyu libiti duna Éufüratesi lun lafayeihóun ebegi lidan dan, mararamagua láamuga wadagimanu. 9 Lun giñe sagü lan weyu lederegerun sun le hemegeirubei fádirigu Herusalénna houn: Bágasu, gábara o mudún lun adagaragüdüni gudawarügüti lun Bungiu le siélubei; o salu, türigu, diwéin o garaba, 10 lun hadagaragüdün katei le auti lagundaara Bungiu le siélubei luma giñe lun hayumuragun lun Bungiu luagu libagari urúei luma habagari lirahüñü. 11 Le adüraaguti lúrudu le, gidawalá aban índanu tuéigiñe luban lun lacharún luagun, ábame tárigirügaali lan luban eredera.* 12 Lun giñe lagünrinchaguni Bungiu le anúadirubalin Herusalén keisi luban liri furumiñeguarügü urúei o néchani le áluguti ladügün wuribani tun litenpulun Bungiu to Herusalénboun! Au, Daríu ariñagubalin le. Gúnfuliwala keisi lubudubu».

13 Ábati lagunfuliruni Tatenái le agumadihabei lidan fulasu le luéigiñebei oubaü le ñeinhin lubéi lálüda weyu libiti duna Éufüratesi luma Setarü-bosunái hama hapanaagu dimurei le líchugubei urúei Daríu lidan lubudubu. 14 Ítara liña gayara lan hasigiruni ábutigu huríu hábunagun, ítara kei hariñaguni profetagu Ahéu luma Sakaríasi le liráü Idó. Aba lagumuchun ábunaguni kei lariñaguni Lubungiute Ísüraeli, luma según hererun Siru, Daríu luma Árütaherühesi, lurúeitegu Pérüsia. 15 Weyu ǘrüwa lidan lihatina Adarü, lidan lisisin lirumudiri larúeihan Daríu le lurúeite Pérüsia ligía lásurun tábunawagun ténpulu.

16 Ísüraelina, fádirigu hama Lewitagu hama híbiri ha meha asagarúbaña hageiragiñe, aba hefeduhan lau ugundani dan le tederegerúnbei ténpulu, to litenpulun Bungiu. 17 Lidan dan ligía, aba hadagaragüdün san bágasu bián-san mudún hama gádürü-san harahüñü mudún, duusu harahüñü gábara, aban hawagu kada türibu Ísüraelina keisi idewesei luagu lifigoun sun Ísüraeli. 18 Lárigiñe aba híchuguniña fádirigu kada aban lidan lidaani heseriwidun, Lewitagu lidan habara lun lani Bungiu kultu uburugu Herusalén, keisi labürüdǘn tidan liliburun Moisesi.

19 Ha agiribudubaña Babilóniagiñe, efeduha hamuti giñe Luéyuri Esefuruni weyu katorusu lidan furumiñeti hati. 20 Harumadaguagüdaañati buga fádirigu hama Lewitagu houngua. Ábati hadügüni adagaragüdüni le lani Luéyuri Esefuruni hawagu sun ha bóugudiñahabaña luéi hageira, hawagu hapanaagu ha fádirigu luma hawougua guánarügü. 21 Sun Ísüraelina ha ñǘbuinbaña Babilóniagiñe hóutiña lidan Luéyuri Esefuruni úara hama sun ha adisedubaña luéi hawiye néchanigu gibe tubungiutegu, lun hóundaragun hamoun eseriwida lun Aburemei le Lubungiute Ísüraeli. 22 Sédüñein weyu hau efeduhei tufedun fein maganatu lébini lau ugundani, ladüga buíngüda laaña buga Bungiu lau ugundani lau ladügün lun fuleseilani lurúeite Pérüsia, ani íderagualaña lidan tábunawagun litenpulun Aburemei le Lubungiute Ísüraeli.