1 Añahán hábutigu iduheñu ha agiribudubaña luma Ésüdürasi Babilóniagiñe lidan lidaani larúeihan Árütaherühesi: 2,3 Gerüsón, hádangiñe ladügawagun Finesi; Danieli, hádangiñe ladügawagun Itamárü, Atusu le liráü Sekaníasi, hádangiñe ladügawagun Dawidi, Sakaríasi, hádangiñe ladügawagun Parosu, hau san-dimí wügüriña ha bürüwañubaña úara luma;

4 Elioenái, le liráü Seraíasi, hádangiñe ladügawagun Paatü-moabü, hau bián-san wügüriña úara luma;

5 Sekaníasi, liráü Haasieli, hádangiñe ladügawagun Satú, hau ǘrüwa-san wügüriña úara luma;

6 Éwedi, liráü Yónatan, hádangiñe ladügawagun Adín, hau dimí-san wügüriña úara luma.

7 Isaíasi, liráü Atalíasi hádangiñe ladügawagun Elamü, hau ǘrüwa-wein-diisi wügüriña luma.

8 Sewadíasi, liráü Mikaeli, hádangiñe ladügawagun Sefatíasi, hau gádürü-wein wügüriña luma.

9 Abüdíasi, liráü Heieli, hádangiñe ladügawagun Hoabü hau bián-san-disiwídü wügüriña luma.

10 Selomitü, liráü Hosifíasi, hádangiñe ladügawagun Baní, hau san-ǘrüwa-wein wügüriña luma.

11 Sakaríasi, liráü Bebái, hádangiñe ladügawagun Bebái, hau wein-widü wügüriña luma.

12 Hoanán, liráü Akatán, hádangiñe ladügawagun Asügádü, hau san-diisi wügüriña luma.

13 Eliféletü, Heieli, luma Semaíasi, hagumuhóun ladügawagun Adonikámü, hau ǘrüwa-wein wügüriña hama.

14 Utái luma Sabudu, hádangiñe ladügawagun Bigüwái hau ǘrüwa-wein-diisi wügüriña hama.

15 Au, Ésüdürasi, aba nóundaruniña sun hagía lubadu duna le éibaagubei lidoun uburugu Aawá, aba werederagun ǘrüwa weyu ñein. Dan le náluahanbei hadan gürigia hama fádirigu, madaritina ni aban lewita. 16 Ábati nóunahan agúara luagu Elieserü, Arieli, Semaíasi, Elünatán, Haribü, Elünatán, Natán, Sakaríasi luma Mesulámü, gürigia wéirigutiña ani hulili ligía hafurendeirun, hama giñe máisturugu Hoyaríbü luma Elünatán, 17 lun houdin bisidei Idó, le lábuti fulasu le gíribei Kasifiá, aba nariñaguni sun le lunbei hariñaguni lun Idó hama líbirigu ha eseriwidubaña ténpulurugu Kasifiá houn, lun hanügün gürigia woun lun híderaguniwa tidan litenpulun Wabungiute. 18 Keiti buga labiniruñadiwa lan Bungiu aba hóunahan aban wügüri subuditi woun gíriti Serewíasi aban lewita hádangiñeti liduheñu Malí, hadan lirahüñü hama líbirigu ha ñǘbuinbaña luma disiwídüñanu. 19 Barǘ hamuti giñe Asawíasi luma Isaíasi ha ladügawagun Merarí woun hau sun hasaanigu hama hábirigu; wéinñanu gürigia hadan.

20 Hadan eseriwidutiña ténpulurugu ha líchugubaña Dawidi hama ábutigu ha eseriwidutiña houn Lewitagu, bián-sánñanu-wein gürigia.

21 Lárigiñe aba namuriahan lun wayunarun laru duna Aawá, lun wǘnabudaguagüdün woungua arufudei wafigoun ligibugiñe Bungiu luma lun wamuriahan luma lun lanügüniwa lau magadiñein, wagía hama waduheñu luma wálagu. 22 Lugundun nibusigaritina namuriahan súdaragu hawagutiña gabayu luma urúei lun hóunigiruniwa luagu üma hawéi áganiñu, kei ariñagaadiwa lan buga lun urúei luagu góunigi lániña Bungiu sun ha áluahabalin, gama lumoun rariguagüdalani lere luma ligañi hawagun sun ha ígiruti. 23 Aba lubeiti wayunarun, aba wayumuragun lun Bungiu luagu sun katei le, aba lóunabuniwa.

24 Aba nadireirun duusu hábutigu fádirigu: Serewíasi, Asawíasi hama diisi hapanaagu, 25 aba namisurahani pülata, golu luma ílagu le ledewehabei urúei, lani eweridihatiña, úfisigu hama sun Ísüraelina ha ñéinbaña dan ligía tun litenpulun Wabungiute, aba nederegeruni houn hábutigu fádirigu. 26 Aba namisurahani, bián-wein-sedü-milu-san-gádürü-wein-diisi líburu pülata, san umegeguni le pülata luma sedü-milu-bián-san-ǘrüwa-wein líburu golu; 27 wein kopu lauti golu disedü líburu lihürü, bián weru lauti buronse le buiti kamá hamuga golu, aba nederegeruni houn.

28 Lárigiñe aba nariñagun houn:

—Huguya, anuadirúatün lun Bungiu anuadirúati giñe umegeni le pülata luma golu lun Aburemei le Habungiute wagüchagu. 29 Góunigi humá, areida huméi darime harihini lihürü hagibugiñe hábutigu fádirigu hama Lewitagu hama hábutigu iduheñu Ísüraelina tidan lani Bungiu ténpulu uburugu Herusalén.

30 Ábati heresibiruni fádirigu hama Lewitagu pülata, golu luma umegeni le buga amisurahóuaalibei, aba hanügüni Herusaléun tidoun lani Wabungiute ténpulu.

31 Weyu duusu lidan furumiñeti hati, ligía wígiruni duna Aawá lun woudin Herusaléun. Íderagua lumutiwa Wabungiute, lau lesefuruniwa hawéi áganiñu hama híwerutiña luagu üma. 32 Dan wachülürünbei Herusalén, aba wemeraagun ǘrüwa weyu. 33 Luagu ligadürün weyu, aba lamisurahóun pülata, golu luma umegeni litenpulunrugu Wabungiute, aba lederegerun súngubei lun fádiri Meremótu, le liráü Uríasi. Ñéinñanuti luma Eleasárü le liráü Finesi, hama Lewitagu Hosabádü, le liráü Hosué, luma Noadíasi, le liráü Binúi. 34 Weyuméme ligía amisurahóuati abahüdǘwa ligía súngubei, aba labürüdǘn.

35 Lárigiñe, ha agiribudubaña lídangiñe hadaürǘniwa aba hederegerun duusu bágasu, gádürü-wein-disisi mudún, ǘrüwa-wein-disedü harahüñü mudún hama duusu gábara ñǘbürigiña lidan hiri sun Ísüraelina, lun adagaragüdüni le gudawarügüti lun Lubungiute Ísüraeli, luma lun idewesei luagu figóu. Aba lagudún súngubei lidan liri Bungiu. 36 Lárigiñe aba hederegeruni lilurudun urúei houn gumadimatiña lidan arúeihani ha loubafurugubaña duna Éufüratesi, ha fuleseihabubaña houn gürigia luma tun litenpulun Bungiu.