1 Íderagua lumuti Wabungiute Salomón le liráü Dawidi lun lederebudagüdüni larúeihan, lau laganwoundagüdüni lubafu saragu. 2 Ábati lagúarun houn sun Ísüraelina:

Houn hábutigu súdara, houn furumiñetiña ichügünaü luma houn sun hábutigu iduheñu ha gamalalibaña Ísüraeli. 3 Aba lidin hau sun gürigia ha buga lóundaraguagüdübaña, tidoun sanduariu to Gabaónboun, lugundun ñeinñoun lan kianpu to lánina óundaruni luma Wabungiute, to bugaha ladügüboun Moisesi le lubúein Wabungiute lidan fulasu mageirawati. 4 Gama lumoun barǘ laaru bugaha Dawidi lubagüsina Wabungiute Kiriatü-hearimügiñe lidoun fulasu le laranserubei tubá, lugundun bunaguaali bugaha aban kianpu tubá uburugu Herusalén. 5 Latarü lauti buronse le bugaha ladügübei Besaléli le liráü Urí, le libari Uru, ñeinñein giñe Gabaón tigibugiñe likianpun Wabureme. Aba lubeiti lidin Salomón hau sun lílana fulasu ñein, álügüdaha luma Wabungiute.

6 Aba lamudeirun Salomón luagun latarü lauti buronse le liñúarübei Wabureme tigibugiñe lúbaanina óundaruni luma Wabungiute aba ladügüni ladagaragüdün ligibuagu latarü: Aba líchugun milu adagaragüdüni le gudawarügüti ligibuagu.

7 Áriebumeme ligía, aba lasaliragun Wabungiute lun Salomón, lariñaga lun:

—Amuriahabei le babusenrun numa, níchugubei bun.

8 Lariñaga Salomón lun Wabungiute:

—Wéiriti bugaha bareini lun Dawidi le núguchi, aba bíchugunina arúeiha leweñegua. 9 Guentó lubeiti Nabureme Bungiu, gúnfulibei le bariñagubei lun núguchi Dawidi, kei ru baadina lubéi urúeime houn gürigia gíbetiña ha, kei sagoun. 10 Amuriahatina lubeiti buma lun bíchugun lichú aau nun luma subudi lun nadundehaniña gürigia ha; lugundun kábagia gayara labuguruni bageira le, ítara lau hibe gürigia ha?

11 Lariñaga Wabungiute lun Salomón:

—Kei anihán lubéi babusenrubei, mamuriahantibu irisini ni uéiriguni, mamuriahan buguya lun hóunwegun báganiñu, ni ibagari migifeti bungua, aba bamuriahan lichú aau, luma subudi lun babuguruniña gürigia ha nánigu ha uágubaña níchigabu urúeime, 12 rútina lichú aau bun luma subudi, gama lumoun níchuguba giñe irisini luma uéiriguni bun le úagili urúei ibihiti libe, hádangiñe ha arúeihabaña bubaragiñe, ni me ha lúnbaña harúeihan bárigiñe.

13 Lárigiñe aba lagiribudun Salomón tídangiñe sanduariu to Gabaónboun lun uburugun Herusalén, lárigiñe lidin arihoun kianpu to lánina óundaruni luma Wabungiute, aba larúeihan Ísüraeli.

14 Aba lóundaraguagüdün Salomón karü to achawahóuarügütu hau gabayu, hama gagalufehatiña gabayu. Ñeinñoun milu-gádürü-san karü, hama duusu-milu gagalufehatiña gabayu, aba líchugun hádangiñe lidan burí uburugu, ha híbiri aba líchuguniña Herusalén. 15 Adügati urúei lun ñein lan saragu golu luma pülata Herusalén kei dübü, luma giñe lun ñein lan saragu fulansu le hibúari kei tiibe tídibu igu to áraabuna lidan fulasu mawübüriti. 16 Músurigiñe luma Silisiagiñe hanügǘwa gabayu lun Salomón, ñéingiñe hagañeihaña ha adaagubaña marasun tidan luban urúei. 17 Aban karü agañeihóutu Ehiptugiñe, sisi-san meha murusun pülata tebegibei, aban gabayu, san-dimí. Sunti meha urúeigu Étüna hama Síriana, hama lóunagülegu Salomón hóunaha agañeihaña.