1 Aba lounwen Abiamü, aba hábununi luburuguterugu Dawidi. Aba larúeihan Asá le liráü leweñegua. Lidan lidaani larúeihan, ñeinñein darangilaü fulasurugu luagu diisi irumu.

2 Buiti bugaha ligaburi Asá ligibugiñe Wabureme le Lubungiute. 3 Gidá lumuti burí hani búngiugu terencha latarü, tuma burí hatenpulun gibe tubungiutegu to burí luáguboun fulasu íñuti; abouha lumuti burí dübü anuadirúati tuma burí liyawa Asera. 4 Ariñaga ligía houn Hudaana lun háluahani Wabureme, le Habungiute hagüchagu, luma lun hagunfuliruni lúrudu luma gumadi. 5 Gidá lumutu burí sun ténpulu luma burí latarü le lídanbei fulasu íñuburiti luburuguterugugiñe Hudá. Ñeinñein darangilaü lidan larúeihan.

6 Lidoun buriti dan ligía le anihein lubéi darangilaü fulasurugu, úati wuribu ladüga líchugun Wabungiute darangilaü, aba lábunagun Asá uburugu burí le baríeiruati Hudá. 7 Lariñaga houn lílana Hudá:

—Héregüda waméi uburugu burí le, ru wamá baríeiru geyegua lau, wáyelesi, bena luma burí lidaünda le gürabu sun anihagua lan ageiraü lábugiñe wabafu. Lugundun áluaha wamaali Bungiu le Wabungiute, rúhali darangilaü woun hama sun wabesinanigu.

Aba lubeiti hadügüni bunaguaü lau lubuidun.

8 Ǘrüwa-san-míluñanu bugaha súdara Hudaana luma Asá, lau idaüdinaü le hadáü ageindagutiña, eféin tuma gimara, hama bián-san-gádürü-wein-milu lánigu Benhamín, lau giñe idaüdinaü le hadáü ageindagutiña tuma gimara. Súdaragu ganigitiña sun hagía. 9 Aba lidin Sera le Etiopíana awuribuha hama hau aban míñunu wügüriña tuma ǘrüwa-san karü lánina wuribu, aba lachülürün darí Maresá. 10 Ábati láfuridun Asá lubaroun, aba lesetirun lun wuribu hau luwügüriñan luagu fulasu wayati lumúanrugu Sefata, lubadu Maresá. 11 Aba lagúaruni Asá Wabungiute le Lubungiute, lariñaga:

—Wabungiute, ligiaméme bun, lun bíderaguni le hérebei kei le mérebei. Íderaguabawa lubeiti, Wabungiute Wabureme, ladüga hemenigitiwa buagu, ani lidan biri wayabin awuribuha hama gürigia ha! Wabureme, buguya Wabungiutebei, arufudabéi luagu ua lan ni aban lun gayara lan lageindagun buma!

12 Ábati lagañeiragüdüni Wabungiute wuribu lun Asá luma Hudá kóntüra Etiopíana, aba lubeiti hanurahan. 13 Gama lumoun aba léibaahaniña Asá hama lánigu darí Gerarü, aba háfarawaguniwa Etiopíana darí lun merede lan ni aban hádangiñe wínwanñu, günringua lumutiña Wabungiute hama lisudaranigu, ha anügübaña saragu katei le buga hani háganiñu. 14 Lárigiñe aba hageindagun luma sun uburugu le geyegubei lau Gerarü, ladüga hanufudedun sun lílana uburugu burí ligía luéi Wabungiute. Aba hasagarahani lílana Hudá uburugu burí ligía kei ñeinñein lubéi saragu irisini. 15 Ábürühatiña giñe tuagun burí kianpu-agei to ñein habéi ibiñani, aba hanügün saragu mudún hama kameyu ñéingiñe aba hagiribudun Herusaléun.