1 Lárigiñe sun katei le luma úaraguni le, aba liabin Senakeríbü le lurúeite Asiria, aba lebelurun lau erei luburuguterugun Hudá, aba legeyedaguni uburugu burí le derebugubei áluga lárügüdüni.

2 Dan larihinbei Esekíasi luagu liábiña lan Senakeríbü aranseñu lun lageindagun luma Herusalén, 3 aba lálügüdagun lungua hama ábutigu ha mámabaña súdaragu hama milidaru ha lúmabaña, aba lariñagun houn ángubei lan hamuga funa lun hámuñachuni lísensen duna le burí bóugudibei luéi uburugu, aba húaradun luma. 4 Ábati hóundaragun saragu gürigia aba hámuñachuni sun lísensen duna, dandu giñe chanili le lábugiñebei múa, lun danme lan hayabin lurúeitegu Asiria lun madarirun hamá gíbeti duna.

5 Aba lárügüdün Esekíasi anigi, aba laranseruni baríeiru adüga ligía burí wáyelesi ligibuagu, luma ábanya baríeiru geyegu lau le gawagubalin wáyelesi. Héregüda lumuti giñe Milu luburuguterugu Dawidi, adaagua ligía saragu eféin luma idaüdinaü. 6 Lárigiñe aba líchugun úfisigu hau gürigia lábugiñe hagumadin, aba lóundaraguniña lubenari uburugu, aba líchugun gurasu houn, ariñageina:

7 —Here humá ganigi huguyame! Manufudeda humá meferidirun humeime huguraasun ligibugiñe lurúeite Asiria hama lumutuniña ha gíbebaña, lugundun gíbetiña wama luéi. 8 Ligía, luagu here wügüriña lemenigida, ánheinti wagía anihein Wabureme le Wabungiute wama lun líderaguniwa ageindaguei wawuribun.

Dan haganbuni gürigia lererun urúei Esekíasi, aba hárügüdün gürigia gurasu.

9 Lárigiñe dan anihán lubéi Senakeríbü le lurúeite Asiria ageindagua luma Lákisi hau sun lumutuniña, aba lóunahan fiu lani úfisigu Herusalén lun lariñagun lun Esekíasi le lurúeite Hudá luma houn sun lílana Herusalén:

10 «Lóunahaña Senakeríbü le lurúeite Asiria ariñaga hun: "Ka san uagu luéirinbei hachoururagun hungua, herederunbei Herusalén lau sun geyewaguaadün lan? 11 Anhein ariñaga Esekíasi hun luagu lesefurubadün lan Aburemei le Lubungiute núhaburugugiñe, leyeeduñadün, lígiruñadün lun láfaragunün ilamaü luma mágürabu. 12 Ma funagia gidá lumuti Esekíasi fulasu burí le lubara kultu luma burí lani Bungiu ligía latarü, aba lariñagun houn lílana Hudá luma Herusalén lun luágurügü lan aban latarü hadüga kultu lun, águdaha hagíame kupali lun? 13 Ibidiñeti san hun ka lan meha nadügübei au hama nagüchagu hau lílana amu burí ageiraü? Sefu hamutiña funagia habungiutegu néchanigu hagía lábugiñegiñe nubafu? 14 Ka hádangiñe habungiutegu néchanigu ha hagünrinchagubaña binadu nagübürigu, asalbarubalin hageira lábugiñegiñe nubafu? Ka uagu hasaminara lesefurubadün lan Hubungiute? 15 Mígiraguagüda humá lubeiti hungua lun leyeedunün Esekíasi, mafiñera humá lun, lugundun anhein ua lubéi ni aban bungiu le habungiute ni aban néchani esefurutiña lumutuniña lábugiñegiñe nubafu luma lábugiñegiñe habafu nagüchagu, gúbudigiame liyaraün Hubungiute esefuraün lábugiñegiñe nubafu!" »

16 Ligía burí katei le hariñagubei lani lurúeite Asiria úfisi kóntüra Wabungiute luma kóntüra Esekíasi le lubúein Wabureme. 17 Abürühati giñe Senakeríbü gárada burí to ídanboun lanabei Wabureme le Lubungiute Ísüraeli, lariñaga tidan gárada burí tuguya: «Ítara kei siñá hamaniña bugaha habungiutegu amu gürigia ha lílana burí amu ageiraü hánigu esefura lábugiñegiñe nubafu, siñá lubaña giñe Lubungiute Esekíasi lánigu esefura lábugiñegiñe nubafu».

18 Aba hagúaragun lani Senakeríbü úfisigu houn lílana Herusalén ha luágubaña baríeiru here lidan ebüréu lun hanufudedaguagüdüniña ítara, lun gayaraabei lan hárügüdüni uburugu. 19 Hadimurehan luagu Lubungiute Herusalén kei ligaburi hadimurehan hawagu habungiutegu amu néchanigu ubouagu, búngiugu ha hadüga wügüriña.

20 Ábati lafurieidun urúei Esekíasi luma profeta Isaíasi le liráü Amosu amuriaha ídemuei siélugiñe. 21 Ábati lóunahan Wabungiute aban ánheli aba lagumuchun hau súdaragu, ábutigu hama gumadan ha tídanbaña likianpun-agei lurúeite Asiria, aba lagiribudun lageiroun lau busiganu. Danti lebelurunbei litenpulunrugun lubungiute, ñein háfarei lirahüñü guánarügü.

22 Ítara liña lesefuruni Wabungiute Esekíasi hama lílana Herusalén luéi lubafu Senakeríbü le lurúeite Asiria, luma luéi habafu sun ha híbiri, aba líchugun darangilaü houn hama sun habesinanigu. 23 Saraguhañati anügütiña idewesei lun Wabungiute Herusaléun, luma burí edewehani gebegiti lun Esekíasi le lurúeite Hudá. Lúmagiñeti dan ligía, ábatima laweirigudun Esekíasi hagibugiñe híbiri néchanigu.

24 Lidoun dan ligía aba lábürühan Esekíasi lau sandi lánina óunweni; gama lumoun aba lafurieidun lun Wabureme, aba lóunabuni lau aban seini lauti milaguru. 25 Gama lumoun lau sun buiti le libihubei Esekíasi, meteingirunti, buínrügü ligía lau pantaü, aba lubéi lagañidun Wabureme lun, lun Hudá luma lun Herusalén.

26 Gama lumoun lau sun lanaagun Esekíasi lungua, ǘnabuguagüdati lungua ligibugiñe Wabungiute, ligía hau sun lílana Herusalén, aba marariragüdünlani Wabureme ligañi hawagun sun wínwanñu lubéi Esekíasi.

27 Abagaridati bugaha Esekíasi lidan óunwenbu irisini luma uéiriguni, chülüti óundaragua saragu pülata, golu, dübü buíduburiti, ibiñein, idaüdinaü luma sun luwuyeri katei gebegiti. 28 Bunaguati giñe rumu lun lareidahan ilaü, diwéin, garaba, adüga ligía fárüga houn sun hawuyeri ibiñanigu, luma fárüga houn mudún. 29 Bunaguagüdati giñe uburugu, gíbetiña bugaha libiñanigu lugundun ruti Wabungiute saragu buiti lun.

30 Esekíasi bugaha giñe ámuñachagüdübalin lésehan duna íñugiñe libiti lísensen duna le gíribei Gión, aba lachigini ǘnabun luagun oubaü le ñeinhin lubéi lálüda weyu libiti luburugute Dawidi. Buiti lubeiti lidin lun Esekíasi lidan sun le ladügübei.

31 Ítara liña giñe lasuseredun dan le hóunahanbei lúrudugu Babilóniana arihei, lun habahüdagun lun luagu milaguru le asuseredubei fulasurugu. Ígira lumuti Wabungiute Esekíasi lábugua lun lóuchaguni lun lasubudiruni lilulin-agei laritagun.

32 Le líbiri luáguti Esekíasi luma lugudemehabu anihein bürüwañu tidan lani Isaíasi le liráü Amosu profesía, luma tidan haliburun lurúeitegu Hudá luma Ísüraeli. 33 Danbei lounwen Esekíasi, aba hábununi íñugiñe libiti hamúaha liduheñu Dawidi. Ruti sun Hudá hama lílana Herusalén uéiriguni lun. Aba larúeihan Manasési le liráü leweñegua.