1 Aba híchuguni lílana Herusalén Okosíasi le amuleñein hádangiñe lirahüñü Horamü urúeime leweñegua, lugundun híwerutiña ha buga ebelurubaña tidoun kianpu-agei to úara hama Arawiana, áfaragua hamutiña bugaha sun lirahüñü Horamü le lurúeite Hudá ha íbugañanu. Aba lubeiti lagumeserun Okosíasi le liráü Horamü arúeiha. 2 Wein-biama irumu lau dan le lagumeserunbei arúeiha, arúeihati aban irumu Herusalén. Atalía bugaha tíribei lúguchu, ladügawagun Omurí. 3,4 Falá lumuti giñe Okosíasi ligaburi Aabü luma hagaburi lánigu, lugundun rutu meha burí lúguchu lagübüri eweridihani lun, ladüga giñe ládaragun lungua hadoun liduheñu Aabü, wuribati bugaha lóuserun ligibugiñe Wabungiute. Lidan linarün katei, hagía bugaha lánibaña eweridihatiña lárigiñe lounwen lúguchi, aba hanügüni lidoun günringuaü.

5 Ladüga lafalaruni heweridihan, aba lúaradun Okosíasi luma Horamü le liráü Aabü le lurúeite Ísüraeli, lun hageindagun luma Asaeli, le lurúeite Siria uburugu Ramotu le lani Galaadü. Gama lumoun aba hímiraguni Síriana Horamü, 6 aba lagiribudun uburugun Hesüreeli lun lagaranihóun lun lárigi límirawagun lidan wuribu luma Asaeli, le lurúeite Siria. Keiti buga sándiñein lubéi Horamü, aba lidin Okosíasi uburugu Hesüreeli arihei.

7 Aranse láaliti buga Wabungiute lun lóunweba lan Okosíasi danme le lidin arihei Horamü. Kei lachülürün, aba láfuridun luma Horamü aba houdin lun hadunragun luma Heú le liráü Nimüsí. Gama lumoun anúadira laali buga Wabungiute Heú lun láfaraguniña liduheñu Aabü. 8 Dan le ladügüña lubéi Heú irichaü kóntüra liduheñu Aabü, aba ladariruniña lábutigu Hudá hama liduheñu Okosíasi ha lábugiñebaña lagumadihan Okosíasi, aba láfaraguniña hilagubei. 9 Óunahati giñe áluahei Okosíasi, le buga aramudagubei Samaria, aba hárügüdüni aba hanügüni lun Heú, aba háfaruni hilagubei. Gama lumoun aba hábununi kei liráü lubéi Hosafátü, le bugaha áluahabalin Wabungiute lau sun linarün. Meredeti lubeiti ni aban hádangiñe liduheñu Okosíasi le gayaraati lárügüdüni arúeihani lárigoun.

10 Dan tasubudirunbalin Atalía to lúguchu Okosíasi luagu hilá lan tiráü, aba tidin aba táfaraguniña sun liduheñu urúei Hudá. 11 Gama lumoun aba tanügüni Hosewa liráü urúei Horamü Hoasi le liráü Okosíasi hádangiñe híbiri lirahüñü urúei ha áfarawagubaña, aba taramuduni tuéi Atalía luma lúyawa sóunburugun. Mafarúnti lubeiti. Hosewa adügübalin katei le, to liráü urúei Horamü, litu Okosíasi, lúmari fádiri Hoyadá. 12 Aba lerederun Hoasi hama aramudañu litenpulunrugu Wabureme. Sunti dan le, aba tagumadihan Atalía fulasurugu.