1 Aba lariñagun Wabureme lun Moisesi:

2 —Anihán burí arufudahani libügürü larumadun aban gürigia le gawaguti lépüra: Lanügǘba sánditi ligía lumoun fádiri, 3 ábame láfuridun bóugudin tuéi kianpu-agei lun larihini. Anhein ariha fádiri luagu areidagua lan lugumeina lépüra le luágubei sánditi ligía, 4 ábame lanügagüdün lun le arumadubei bián harahüñü dunuru wínwangiña ha harumatiña, fulansu le hibúari, gamisa funatu luma isopu. 5 Ábame láfaragüdün aban hádangiñe bián harahüñü dunuru hagía ligibuagu aban sóudieru lauti múa le aniheinti duna le lídangiñeti lísensen duna lidan, 6 lanügeime dunuru le wínwangilibei, fulansu le hibúari, gamisa funatu luma isopu, ábame ladüdüragüdüni sun katei le luma dunuru le wínwangilibei lau lita dunuru le hilaalibei buga ligibuagun duna le lídanbei sóudieru. 7 Lárigiñe ábame labahichaguni sánditi le lunbei larumadun sedü wéiyaasu lau hitaü ligía, ábame líchuguni keisi harumati. Ábame lígiragüdüni liraüraü dunuru le wínwangilibei.

8 —Le arumadubei, gasu lachibunu ladaüragun, chibagua ligíame lungua, sagua ligíame lun lerederun harumañu. Lárigiñe gayaraahalime lebelurun tidoun kianpu-agei, lau sun lerederuba lan aganawa bóugudi tuéi likianpun luagu sedü weyu. 9 Lárigiñe sedü weyu ligía, ábame lásaruni lábulugu helú helú, ságualeime lídiuma, líseguse luma sun liyu lura, ábame lachibunu ladaüragun, chibagua ligíame lungua, ábame lerederun harumañu. 10 Luágume liwidün weyu ábame lanügün bián harahüñü mudún ha úati mégeiti hawagu, tuma aban tiraüraü mudún to ábanti irumu tau, to giñe úati mégeiti tuagu, katorusu líburu fulúaru to tubuidun-agei lun aban idewesei le fulúaruauti añoundawagutu lau garaba, luma lǘrüwan fánreinti lídangiñe aban líturu garaba. 11 Fádiri le lunbei ladügüni arumadagüdüni, lunti lanügüni gürigia le lunbei larumadun lau sun lílagu tubenarin kianpu lánina óundaruni ligibugiñoun Wabureme; 12 lárigiñe ábame lanügün aban hádangiñe harahüñü mudún ábame ladagaragüdüni úara luma lǘrüwan fánreinti lídangiñe aban líturu garaba, keisi adagaragüdüni luagu figóu, efeduhei échuni le lánina arufudúni ligibugiñe Wabureme. 13 Lunti láfaruni mudún ligía lidan fulasu le anuadirúabei lun libigúniwa hagiina animaalu lun adagaragüdüni luagu figóu luma adagaragüdüni gudawarügüti. Adagaragüdüni le luáguti duru, lunbei fádiri kéigubeirügü adagaragüdüni luagu figóu, lugundun aban katei sándutimati lira.

14 —Lárigiñe ábame lanügün fádiri murusun lídangiñe lita adagaragüdüni luagu duru, ábame láhuruduni luagu le arumadubei ǘnabu libiti larigei le lóunwenren, luagu lúguchi lifinga lúhabu le lóunwenren luma luagu lúguchi lifinga lugudi le lóunwenren. 15 Lárigiñe ábame lanügün fádiri murusun garaba ábame líchuguni lurageirugu lúhabu le lubaünan; 16 ábameti ladüdüragüdüni lifinga le lóunwenren lidan garaba le lúhaburugubei, ábame labahichagun garaba laumeme lifinga ligía sedü wéiyaasu ligibugiñe Wabureme. 17 Lídangiñe garaba le erederubei lúhaburugu fádiri, ábame lanügün murusun lun láhuruduni ǘnabugiñe libiti larigei le arumadubei, le lóunwenren, luagu lúguchi lifinga lúhabu le lóunwenren luma luagu lúguchi lifinga lugudi le lóunwenren, ligibuagu lita adagaragüdüni luagu duru, 18 Le líbiri garaba ábame láhuruduni lábulugu le arumadubei. Ítara luba libihini fádiri ferudun lúmagiñe Wabureme luagu lifigoun gürigia ligía. 19 Lárigiñe ábame líchuguni fádiri adagaragüdüni luagu figóu, lun larumaduba lan le wíyebei, lárigiñe ábame láfaruni animaalu le lunbei ladagarun keisi adagaragüdüni gudawarügüti, 20 ábame ladagaragüdüni ligibuagu latarü úara luma idewesei le fulúaruauti ítara luba libihini fádiri ferudun luagu lifigoun gürigia ligía, ábame larumadun.

21 —Anhein gudeme lubéi gürigia le sándibei, ani maseinsunti lun lagañeihani sun le amuriahóubei luma, ábame lanügün aban tiraüraü mudún keisi adagaragüdüni luagu duru, ábame líchuguni keisi idewesei buíduti lun libihini ferudun luagu lifigoun, túmaya bián kilu ani murusunraüya fulúaru tídangiñe to tubuidun-agei, to añoundawagutu lau garaba keisi idewesei le fulúaruauti, luma lǘrüwan fánreinti lídangiñe aban líturu garaba, 22 hama bián wagugua o bián lan harahüñü unhun, según le liyaraati, aban keisi adagaragüdüni luagu figóu, to aban keisi adagaragüdüni gudawarügüti. 23 Ábame lanügüni sun le lun fádiri luagu liwidün weyu lun larumadawagüdün; ábame lederegeruni ligibugiñe Wabureme tubenari kianpu lánina óundaruni. 24 Ábame lanügüni fádiri liraüraü mudún le adagaragüdüni luagu duru, luma lǘrüwan fánreinti lídangiñe aban líturu garaba, ábame ladagaragüdüni ligibugiñe Wabureme keisi idewesei buíduti; 25 ábame líbuguni ligiina liraüraü mudún le adagarawagüdübei luagu duru, ábame lanügün murusun lídangiñe lita, ábame láhuruduni luagu le arumadubei, ǘnabu libiti larigei le lóunwenren, luagu lúguchi lúhabu le lóunwenren luma luagu lúguchi lifinga lugudi le lóunwenren; 26 lárigiñe ábame líchugun murusun garaba lurageirugun lúhabu le lubaünan, 27 ábame labahichaguni garaba le lúhaburugubei lau lifinga sedü wéiyaasu ligibugiñe Wabureme. 28 Ábame giñe láhurudagun luagu le arumadubei, murusun garaba ǘnabugiñe libiti larigei le lóunwenren, luagu lúguchi lifinga lúhabu le lóunwenren, luma luagu lúguchi lifinga lugudi le lóunwenren, lememe ñein lubéi líchigei lita adagaragüdüni luagu duru. 29 Ábame láhurudaguni fádiri le líbiri garaba lábulugu le arumadubei lun libihini ferudun luagu lifigoun. 30 Lárigiñe ábame ladagaragüdün fádiri aban hádangiñe wagugua o aban lan hádangiñe harahüñü unhun, según le liyaraabei le arumadubei íchiga. 31 Aban hádangiñe dunuru hagía keisi adagaragüdüni luagu figóu, to aban keisi adagaragüdüni gudawarügüti, bóugudin luéi idewesei le fulúaruauti. Ítara luba libihini fádiri ferudun lun le arumadubei.

32 Ligía burí arufudahanibei habügürü láutiña lugumeina lépüra, ha siñabei híchugun aban idewesei wéiritimati luagu harumadun.

33 Aba lariñagun Wabureme lun Moisesi luma lun Aarón:

34 —Danme le hachülürün Ísüraelina lidoun lumúan Kanán, fulasu le níchugubei hun hánime, danme nóunahan lépüra tuagun aban muna to ñeintu hageira, 35 lunti lidin tabureme muna tuguya lumoun fádiri, lariñagame lun: "Laganóun nun kamá anihein aban sandi núbiñe".

36 —Lubaragiñe lebelurun fádiri tidoun muna tuguya, lunti lariñagun lun lasagarúniwa sun le tídanbei luéi lerederun sun le tídanbei wíyeñu. Lásurun, ábame lebelurun arihei sandi.

37 —Anhein ariha fádiri luagu anihein lan burí dáseiti huliliti koloru wurigili o funayumati le huliliti tóubawagu muna tuguya, 38 lunti láfuridun tídangiñe muna, ábame lariñagun lun terederun darugu luagu sedü weyu. 39 Luagu lisedün weyu, ábayame larihinu fádiri, ánheinti wéiriguaali lubéi sandi ligía luagu touba muna, 40 ábame lariñagun lun lagidarawagun dübü le gawagubalin dáseiti ligía, ábame lachagarún lidoun aban fulasu wíyeti bóugudin luéi uburugu. 41 Lariñaguba giñe lun láhiachun sun turageirugu muna tuguya, ábame lachagarún kaliki le ahiechúbei lidoun aban fulasu wíyeti bóugudi luéi uburugu. 42 Ábame lichugún amu dübü leweñegua le agidarúbei, luma amu iseri múa lun tabüdürühoun muna.

43 —Ánheinya asaliragua sandi ligía tidan muna tuguya lárigiñe lagidarúniwa dübü, hiewa ligía touba abüdürühóuaya tuguya, 44 ábame lebelurun fádiri arihoun. Anhein wéiriguaali lubéi lépüra ligía tidan muna tuguya, lépüragubeiñein le wuribatimabei lira, ani wíyetu giñe muna tuguya. 45 Gásuti tagünrinchawagun muna tuguya, ábame tachagarúniwa lidoun aban fulasu wíyeti bóugudi luéi uburugu. 46 Furumiñeguarügü le ebeluruti tidoun muna tuguya lárigiñe lariñagun fádiri lun daruguboun lan, lanügǘba keisi wíyeti darí lumoun laguñeedun. 47 Furumiñeguarügü le éigiti o le lan arumuguti tidan muna tuguya, gasu lachibunu ladaüragun lun larumadagüdünu.

48 —Dan le lebelurun fádiri arihoun muna, anhein ariha luagu maweiridagun lan sandi lárigiñeya labüdürühoun fulasu le ñein lubéi dáseiti, lunti líchugunu keisi muna harumatu, ladüga gumuha lan sandi tídangiñe. 49 Lun larumadagüdünu muna, lanügüba bián harahüñü dunuru, fulansu le hibúari, gamisa funatu luma isopu. 50 Ábame láfarun aban hádangiñe dunuru ligibuagu aban sóudieru múa le gálati duna le lídangiñeti lísensen duna. 51 Lárigiñe ábame lanügüni hibúari, isopu, gamisa funatu luma dunuru le wínwangilibei, ábame ladüdüragüdüni sun le lau lita dunuru le hilaalibei luma duna le lídangiñebei lísensen duna, ábame labahichagunu muna sedü wéiyaasu lau. 52 Ítara luba larumadagüdünu muna tuguya lau lita dunuru, luma duna lídangiñeti lísensen duna, dunuru le wínwangilibei, hibúari, isopu tuma gamisa funatu. 53 Lárigiñe ábame lígiragüdüni dunuru le wínwanbei bóugudi libiti uburugu, ítara luba lagunfulirun lau le lunbei ladügǘn lun tarumadun muna.

54 Ligía burí arufudahanibei libügürü furumiñeguarügü sandi lánina lépüra luma tiña, 55 lépüra tuáguti daüguaü luma tuagu muna, 56 le lani ilu lánina budunbudun luagu uraü, luma dáseiti, 57 lun gayara lan larihín le harumabei lumoun le wíyebei. Ya lagumucha arufudahani libügürü lépüra.