1 Aba ladimurehan Wabureme lun Moisesi luagu luwübüri Sinaí, lariñaga lun:

2 —Ariñagabéi katei le houn Ísüraelina: Danme beluhadün lidoun múa le lunbei níchuguni hun, gasu lemeraagun múa lidan liri Wabureme. 3 Gayaraabei hábunaguni hichari sisi irumu. Gayaraabei giñe hatirimuhanu hinadüri beibei budá humounme tin, 4 gama lumoun lidan lisedün irumu, lemeraaguba múa lidan liri Wabureme; mábunagun hubéi hichari lidan irumu ligía, matirimuhan humeime hinadürigu beibei. 5 Mátühan hubéi giñe türigu le áhüchüti lungua lárigiñe lagumuhóun alubahani mabudahan beibei tídangiñe hinadüri to matirimuhóunboun, gasu lemeraagun múa sunsuinagubei. 6 Le lunbei labouchun lungua lidan lemeraagun múa, buídurügübei hun lun heigin, huguya, humusuniña, hama nadagimeintiña hama terencha ha húbiñebaña, 7 hibiñanigu hama animaalugu gáñitiña ha fulasurugubaña. Sun le lunbei líchuguni múa, leseriwiduba hun lun heigin.

8 —Gasu habahüdün sedü dimaasu lídangiñe burí irumu, sedü wéiyaasu sedü irumu, líchuguba bián-wein-nefu irumu, 9 wéyumeti diisi lidan lisedün hati, le luéyuri ferudun, ábame hínwinruni liganchun mudún fulasurugu. 10 Irumu dimí-san, hanügübei keisi irumu sánduti; ábanbei irumu lánina esefuruni houn sun lílana ageiraü. Sun wügüriña hagiribuduba hamoun haduheñu, ibiha hameime hamúan lárigoun. 11 Irumu dimí-san, irumubei lánina esefuruni hun, mábunagunbadün nadü lidan irumu ligía, mátühan türigu le áhüchüti lungua, matirimuhan tídibu beibei mabudahan beibei, 12 lugundun irumu sánduti ani irumu ligía lánina esefuruni hun. Lérügüba líchugun múa lúnguarügü heiga.

13 —Lídanme irumu ligía le lánina esefuruni, sun huguya hibihayabei humúan lárigoun. 14 Anhein alugura o agañeiha aban gürigia aban fulasu luma amu, mouchalá laguburahan lóugiñe lebegi; 15 le agañeihabei lunti lafayeihan según dan le sügühalibei lárigiñe irumu lánina esefuruni, le alugurahabei lunti laguburahan según dan lánina alubahani le mégeigilibei: 16 Ítara kei liibe lidaani alubahani le mégeigilibei, ítara luba giñe luéirintima lebegi; anhein míbeeli lubéi irumu mégeiti lun alubahani ǘnabutimabei lebegi, lugundun liibe alubahani ligía alugurúbei. 17 Manügalá gürigia chansi lau amu. Arihualá hinebenehabu lun Bungiu, au Aburemeibei le Hubungiute.

18 —Gúnfuli huméi nilurudun, adüga huméi le lubeibei nugumadin, gúnfuli huméi ábame habagaridun darangilu hageira; 19 líchugubei múa lin, ábame habagaridun darangilu, hou huguyame lídangiñe lin hinadürigu darí hakimuledun.

20 —Háfuga álügüdaguatün hungua ariñaga: «Kábati weiga lidan lisedün irumu, anhein siñabei lubéi wábunagun ni walubahan?» 21 Nóunahabei nabinirun hun lidan lisisin irumu, ani buídurügübei le halubahabei lun ǘrüwa irumu, 22 ítara luba heigin lídangiñe le areidúañubei lubaarügü hábunagunya lidan liwidün irumu, darí lumoun linefun irumu gayaraabei heigin lídangiñe le areidúañubei lubaarügü lachülürün lidaani alubahani.

23 —Moun lumuti haluguruni múa lun sun dan: Nani múa, furedeirügü numuti hun, huguya hebeluharügüña. 24 Ítara liña lubeiti, furumiñeguarügü múa le hani, gasu híchugun irichaü houn binadu laburiña lun gayaraaya lan hagañeihani.

25 —Anhein agudemeda aban bupaisanun, aba lalugurun aban lídangiñe lufulasun bun, gayaraabei liabin aban liduhe lun lesefuruni le lalugurubei liduhe.

26 —Anhein maduhe lubéi aban gürigia lun lesefuruni lumegen, gama lumoun aba lóundarun gürigia ligía seinsu lun lesefuruni lungua, 27 ábame labahüdüni dan le ásügürübei lúmagiñe laluguruni, ábame láguyugüdüni seinsu le luágubei lufulesein le buga agañeihabalin, ábayame lerederun lau lumegen. 28 Gama lumoun anhein madari lóundarun seinsu lun lesefuruni, ábame lerederun lun le agañeihabalin darí irumu le lánina esefuruni, le lidaani láguyugüdüniwa umegeni lárigoun, ábayame libihini le buga alugurubalin lárigoun.

29 —Anhein alugura aban gürigia aban muna lidan aban uburugu ayarawaguati lau dübü, garichabei lunya lagañeihanu aban irumu lárigiñe lalugurunu. 30 Gama lumoun anhoun mesefurúniwa muna tuguya lidan aban irumu, terederuba lun sun dan lun le agañeihabarun luma houn ladügawagun. Mesefurúnboun ni lidan irumu lánina esefuruni. 31 Ánhounti muna to lídantu aüdü mabarieirúnti, ítara luba tanügǘniwa kei ichari, gayaraabei tesefurúniwa, séfua tuguyame lidan irumu le lánina esefuruni.

32 —Garichabaña lewitagu súnwandan lunya hagañeihanu muna burí to lurageirugutu haburugute. 33 Anhein aban lubéi lewita le lunbei lesefurunu muna tuguya, gasu láfuridun tídangiñe muna tuguya lidan irumu le lánina esefuruni ábame lidin lidoun uburugu le ñein lubéi lumegen, lugundun hábanrügüñon lewitagu to haburuguteruguboun hamegen haganagua Ísüraelina. 34 Múa lánina hágurahoun animaalugu le burí haburuguterugubei lewitagu, siñabei lalugurúniwa, lugundun ligía hamegenbei lun sun dan.

35 —Anhein agudemeda aban hádangiñe bupaisanun leredera maseinsunga aba liabin bumoun, lunti bíderaguni kei aban terencha le ásügürüti, ábame bíchugun ubaraü lun búbiñe. 36 Magidarabá ni kata luéi maguburahanbeime lóugiñe le bafuredeirubei lun; lubaragiñe lira, arihualá binebenehabu lun Bungiu, ruba ubaraü lun bupaisanun búbiñe. 37 Maguburahabéi lóugiñe seinsu le bafuredeirun lun, miñurunbeime lebegi éigini le bíchugun lun. 38 Au Aburemeibei le Hubungiute, le asagarubalün Ehiptugiñe lun níchuguni Kanán hun luma lun Hubungiute nan.

39 —Anhein agudemeda aban hádangiñe bupaisanun dan le búmañein lan ani leredera maseinsunga, aba laluguragun lungua bun, mawadigimaridagüdabéi kei idamuni; 40 óuserabei keisi aban nadagimeinti o keisi lan aban aganóuti búbiñe. Luadigimariba bun darí lumoun irumu le lidaani esefuruni, 41 lárigiñeme gayaraahalime láfuridun búbiñegiñe hau sun lirahüñü lunya lagiribudun hamoun lani türibu luma lidoun hafulasun liduheñu; 42 lugundun eseriwidutiña nun hagía; au asagarubaliña Ehiptugiñe, ani moun lumuti halugurúniwa keisi idamuni. 43 Móuserabaña lau lidere óuseruni; lubaragiñe lira, arufudabéi inebe lan Bungiu bun.

44 —Anhein busén bubéi bidamun, agañeihabá hámagiñe amu néchanigu ha geyegubaña bau. 45 Gayaraati giñe bagañeihaniña gürigia terencha ha aganóubaña haganagua, hama hasaanigu ha águrahoutiña hageira, gayaraati hagañeihaniña hánime, 46 ábame hígiruniña keisi alagan houn hisaanigu danme hóunwegun; gayaraabei heseriwidun houn súnwandan. Gama lumoun ni aban hídangiñe huguya Ísüraelina, moun lumuti hóuserun aban hupaisanun lau ufasinin.

47 —Anhein arisida aban terencha le aganóuti bumúanrugu, gama lumoun aba lagudemedun aban bupaisanun le lubesinan terencha, aba laluguragun lungua lun terencha ligía, o lun lan amu terencha, 48 garichabei lun lagañeihóun lesefurun íbini lárigiñe laluguragun lungua. Gayaraabei lesefuruni aban hádangiñe líbirigu, 49 o aban lan liyaurite, lipürimun o furumiñeguarügü liduhe le yarafagili; gayaraabei giñe lesefuragun lungua anhein gabafu lubéi lun ladügüni, 50 ábame labahüdüni dan luma le agañeihabalin lúmagiñe laluguragun lungua lumoun irumu le lidaani esefuruni: Según átiri lan irumu luma dan le luadigimaribei, ítara luba lafayeirun, según ligaburi hafayeirun nadagimeintiña. 51 Anhein gíbegili lubéi irumu, mégeiti, ítara kei liibe ítara luba líchugun lídangiñe seinsu le libihubei luagu laluguragun lungua danme lafayeihan lun láfuridun; 52 gama lumoun anhein míbeeli lubéi dan mégeiti lubá irumu le lidaani esefuruni, lafayeirubei lebegi dan le mégeigilibei luagu láfuridun. 53 Lunti lóuserun keisi aban nadagimeinti le úmati ladügǘwa daradu luagu aban irumu; mígiraba lun louserúniwa wuriba.

54 —Ánheindügü mesefurun lidan dan ligía, láfuriduba lidan lidaani esefuruni úara hama lirahüñü, 55 lugundun nubúeingu Ísüraelina; nasagarun Ehiptugiñe au Aburemeibei le Habungiute.