1 Aba ladimurehan Bungiu lun Moisesi luma lun Aarón, lariñaga houn:

2 —Ariñaga humá houn Ísüraelina luagu gayara lan heigin hádangiñe sun animaalu ha ubouagubaña 3 ha achaguhatiña heigin bián wéiyaasu ani bougua ligía lúbara hagudi, 4 gama lumoun añahán animaalu ha lúnbaña meigin hamaniña íbini achaguha hamani heigin bián wéiyaasu o bougua lan lúbara hagudi:

—Kameyu ladüga achaguha lumuti leigin bián wéiyaasu gama lumoun mabouchagunti lúbara lugudi. Lunti hanügüni keisi animaalu wíyeti.

5 —Másaraga, ladüga achaguha lumuti leigin bián wéiyaasu gama lumoun mabouchagunti lúbara lugudi. Lunti hanügüni keisi animaalu wíyeti.

6 —Liébüre, ladüga achaguha lumuti leigin bián wéiyaasu gama lumoun mabouchagunti lúbara lugudi. Lunti hanügüni keisi animaalu wíyeti.

7 —Buíruhu, ladüga bóuguati lúbara lugudi, gama lumoun lau sun ítara lan, machaguhan lumuti leigin bián wéiyaasu. Lunti hanügüni keisi animaalu wíyeti.

8 —Moun lumuti héigini hágürügü animaalu ha, ni íbini lun haguurun hawagu dan le hilaaña. Lunti hanügüniña keisi animaalugu wíyetiña.

9 —Hádangiñe animaalu ha dúnarugubaña o ha lan baranahabaña, hárügübaña garünabaña goura hagía, hagíarügübaña gayara héiginiña. 10 Ánhañati ha marünabaña, moura hagía, meigin hubaña, íbini dúnaruguna hamá o baranahana lan, ítara giñe animaalugu lan wéinamutiña o ha lan yebe ñǘbüritiña. 11 Moun lumuti héigini hágürügü, lunti hanügüniña keisi animaalugu mínsiñegutiña. Mínsiñegubei giñe hágubu lidan hilaaña, ladüga hanügübaña kei animaalugu wíyetiña. 12 Sun animaalugu dúnaruguna le marünati, moura ligía, lunti hanügüni keisi animaalu wíyeti.

13 —Añahán dunuru ha lúnbaña meigin humaniña; lubaragiñe lira barürügü hubaña keisi animaalugu mínsiñegutiña: Ágila, dunuru gáhalaheiti abun, ágila baranahana, 14 milanu, hama sun hawuyeri guriguri, 15 sun hawuyeri sanadi, 16 awesüturusu, duguyu, sáwarawara, sun hawuyeri kin, 17 garún, korumorán, íwisi, 18 sísüne, yalifu, wadubi, 19 sun hawuyeri yábura, abubíya luma búriri.

20 —Sun animaalugu ha mábutiña ha áhamahatiña o ha éibugutiña, lunti hanügüniña keisi animaalugu wíyetiña, 21 gama lumoun gayaraati heigin hádangiñe ha íbini áhamaha hamá o éibuga hamá lun gayada hamá fadagueina luma hagudi lun hachubahan luagu múa. 22 Añahán ha gayaraabei héiginiña hádangiñe: Sun hawuyeri chagagaru, hama sun hawuyeri diru. 23 Gama lumoun sun animaalugu ha mábutiña ha áhamahatiña ani éibuga hagía, lunti hanügüniña keisi animaalugu wíyetiña.

24 —Anihán burí katei le gayaraabei lawiyedagüdünün:

Furumiñeguarügü le aguuruti aban hádangiñe animaalugu ha le hilaali; lerederuba wíyeñu darí laguñeedun.

25 —Furumiñeguarügü le iñuraguti aban animaalu hilaali hádangiñe ha, gasu lachibunu ladaüragun ábame lerederun wíyeñu darí laguñeedun.

26 —Sun animaalu le gábarati lugudi gama lumoun mabouchagunti, ani machaguhanlei leigin bián wéiyaasu, lunti hanügüni keisi animaalu wíyeti ani furumiñeguarügü giñe le aguuruti luagu, lerederuba giñe wíyeñu.

27 —Furumiñeguarügü animaalu gádürügua tugudi, le adagaragüdüti lábugiñe lugudi múarugu lun léibugun, lunti hanügüni keisi animaalu wíyeti; ani furumiñeguarügüti le aguuruti luagu aban hádangiñe animaalu hagía le hilaali, lerederuba wíyeñu darí laguñeedun. 28 Le giñe iñuraguti aban animaalu hilaali hádangiñe ha, gasu lachibunu ladaüragun ani lerederuba wíyeñu darí lumoun laguñeedun, lunti hanügüniña animaalu hagía keisi wíyetiña.

29 —Hádangiñe animaalugu ha aduruuhabaña múarugu, añahán ha lúnbaña hanügüniña keisi wíyetiña: Komadüreha, garadun hama sun hawuyerigu animaalu ha aduruuharügütiña múarugu, 30 kei burí hinawüri, agare, kamalión, garangadili luma wagagan.

31 —Lunti hanügüniña sun animaalugu ha keisi wíyetiña. Furumiñeguarügü le aguuruti aban hádangiñe animaalugu ha le hilaali, lerederuba wíyeñu darí lumoun laguñeedun.

32 —Furumiñeguarügü giñe katei le uáguti ladagara aban hádangiñe animaalugu hagía le hilaali, lerederuba wíyeñu. Gayaraati aban lan katei le lauti wewe, o aban lan daüguaü, o aban lan katei lauti uraü, aban sagü o furumiñeguarügü katei lánina wadagimanu, gasu lachibúniwa lau duna ábame lerederun wíyeñu darí lumoun laguñeedun; lárigiñeme lira ábame larumadun.

33 —Anhein adagara lúgubu aban animaalu hilaali hádangiñe ha luagu aban sóudieru lauti múa, lerederuba sun le lídanbei sóudieru ligía wíyeñu, ani gásume labouchawagun sóudieru. 34 Sun éigini le uágunti láwiyura duna lídangiñe sóudieru ligía, lerederuba wíyeñu; sun giñe uniñein le lídanti, lerederuba giñe wíyeñu. 35 Sun le uágunti lábürüha aban animaalu hilaali hádangiñe ha, lerederuba wíyeñu; gayaraati aban lan régigi, gasu lagünrinchawagun. Gasu hanügüni keisi aban umegeni wíyeti.

36 —Lau sun lira, lísensen duna o fusu lan le ídangiñebei latúa duna, harumamémebei, gama lumoun le aguuruti aban animaalu hilaali hádangiñe ha, lerederuba wíyeñu.

37 —Anhein ábürüha aban animaalu hilaali hádangiñe ha luagun aban ilaü le lunti labunún, harumamémebei ilaü ligía, 38 gama lumoun anhein dǘdügüdawaali lubéi ilaü ligía, aba lábürühan aban animaalu hilaali hádangiñe ha luagun, gasu lanügǘn ilaü ligía keisi wíyeti.

39 —Lun hamuga lounwen aban animaalu le húmati lun yebe héigini, le aguuruti luagu animaalu hilaali ligía, lerederuba wíyeñu darí lumoun laguñeedun; 40 le éigiti lídangiñe animaalu óunweti ligía, gasu lachibunu ladaüragun, ani lerederuba wíyeñu darí lumoun laguñeedun; le giñe asagaruti animaalu hilaali ligía, gasu giñe lachibunu, ladaüragun ani lerederuba wíyeñu darí lumoun laguñeedun.

41 —Moun lumuti heigin ni aban animaalu le aduruuhati múarugu; animaalu wíyeti lira.

42 —Moun lumuti heigin ni aban hádangiñe animaalugu ha aduruuhabaña múarugu, ni hádangiñe ha éibugubaña lau haragei, ni ha éibugubaña lau gádürü hagudi lugundun animaalugu wíyetiña hara. 43 Mawiyedaguagüda humá hungua hau animaalugu ha aduruuhatiña múarugu, 44 lugundun au Aburemeibei le Hubungiute. Gasu harumadun sunsuinagubei ani sandu huguyame, lugundun sándutina. Mawiyedaguagüda humá hungua lau ni aban hádangiñe animaalugu ha aduruuharügübaña múarugu. 45 Au Aburemei le asagarubalün Ehiptugiñe lun Auba lan Hubungiute. Lunti lubeiti sandu humá, lugundun au, sándutina.

46 Anihán arufudahanibei habügürü animaalu, dunuru, sun animaalu ha aganóubaña dúnarugu, hama sun ha aduruuhabaña múarugu, 47 lun hasubudirúniwa ha harumabaña hamoun ha wíyebaña, ha geigúadibaña hamoun ha meigúadibaña.