1 Aba lariñagun Wabureme lun Moisesi:

2 —Ariñagabéi katei le houn Ísüraelina: Danme tadageinadun aban würi, lun tagaraüdün aban wügüri irahü, terederuba wíyeñu luagu sedü weyu, kei dan le lauñoun lan tidaani. 3 Lichugúba seini tuagu lóustarun tiráü luagu liwidün weyu lárigiñe lágurahoun. 4 Ánhounti úguchuru terederamémeba arumada lídangiñe hitaü luagu darandi-ǘrüwa weyu, siñabei taguurun ni kata le anuadirúati, siñá ligíame tebelurun tidoun sanduariu darí lagunfulirun lidaani tarumadun. 5 Gama lumoun anhein aban lubéi würi irahü tagaraüdüboun, terederuba wíyeñu luagu bián dimaasu, kei dan le lauñoun lan tidaani, ábame terederun arumada lídangiñe hitaü luagu ǘrüwa-wein-sisi weyu.

6 —Danme gúnfulihali lidaani tarumadun würi lárigiñe tágurahan wügüri yebe irahü o würi yebe, lunti tanügün aban liraüraü mudún le ábanti irumu lau tubenarin kianpu lánina óundaruni lun tadagaragüdüni keisi adagaragüdüni gudawarügüti, tuma aban tiraüraü unhun o aban lan wagugua keisi adagaragüdüni luagu figóu. 7 Ábame tíchuguniña lun fádiri, ábame ladagaragüdüniña fádiri ligibugiñe Wabureme lun lamuriahan ferudun tuagu; ítara luba tarumadun lídangiñe lésehan hitaü tídangiñe.

Ligía burí arufudahóunibei libügürü hagaraüdǘniwa irahüñü. 8 Anhein lougua lubéi túmati úguchuru lun tagañeihan aban liraüraü mudún, gayaraabei tanügün bián wagugua o bián lan harahüñü unhun, aban lun tedewehani keisi adagaragüdüni gudawarügüti, le aban keisi adagaragüdüni luagu figóu; ábameti lamuriahan fádiri ferudun tuagu, ábame tarumadun.