1 Aba lariñagun Wabureme lun Moisesi:

2 —Ariñagabéi katei le houn Ísüraelina: Anihán burí dan le ichugúbei lun Wabungiute, le lunbei hagúaruni óundaraguni sánduti.

3 —Buadigimariba sisi weyu, ánheinti lidan lisedün weyu moun lumuti badügün ni aban wadagimanu; luéyuribei emeraaguni weyu ligía, ñeinbei óundaraguni sánduti. Le ñein lumuti haganawa luéyuribei emeraaguni weyu ligía lidan liri Wabureme.

4 —Anihán burí dan le lunbei ladügün óundaraguni sánduti lun Wabureme, ligíaba hóundaragun:

5 —Weyu katorusu lidan furumiñeti hati rábounweyu, ligíaba lefeduhóun Luéyuri Esefuruni lidan liri Wabureme.

6 —Weyu keinsi lídanmeme hati ligía, ligíaba lefeduhóun tufedun fein maganatu lébini lidan liri Wabureme. Teigiba fein maganatu lébini luagu sedü weyu. 7 Ladügǘba aban óundaraguni sánduti lidan furumiñeti weyu. Madügünbadün ni aban luwuyeri wadagimanu hǘrüti weyu ligía. 8 Gasu hágudahan idewesei lun Wabureme luagu sedü weyu, luágume lisedün weyu, ábame hadügün aban óundaraguni sánduti. Madügünbadün ni aban luwuyeri wadagimanu.

9 Aba lariñagun Wabureme lun Moisesi:

10 —Ariñagabéi katei le houn Ísüraelina: Danme beluhadün lidoun fulasu le lunbei níchuguni hun, alubaha humeime furumiñeti hinadüri türigu, gasu hanügüni furumiñeti güraguati halubahan lun fádiri. 11 Laruganme luéigiñe luéyuri emeraaguni ábame lanügüni fádiri lun Wabureme keisi idewesei buídutimati, lun gayaraabei lan leresibirun. 12 Weyuméme le híchuguni güraguati türigu, híchuguba giñe aban mudún le ábanti irumu lau, le úati mégeiti luagu keisi adagaragüdüni gudawarügüti lun Wabureme. 13 Hanügüba giñe nefu líburu dimí tídangiñe tubuidun-agei fulúaru to añoundawagutu lau garaba lun híchugunu lun Wabureme keisi idewesei gudawarügüti le buiti líhemen. Gasu hanügün aban líturu diwéin keisi idewesei lun láwiyurun. 14 Darime weyu le hanügüni hidewese lun Wabureme, moun lumuti heigin fein, ni türigu to sarawaaru o to másarahoungiru. Aban lúrudu le, le lunti ladurarun sun dan, lunti hariñaguni agübürigu houn isaanigu le ñein lumuti haganawa.

15 —Lúmagiñeme weyu le hanügüni güraguati türigu keisi idewesei buídutimati, lememe larugan luéigiñe luéyuri emeraaguni, gasu habahüdün sedü dimaasu dayarüti. 16 Láumeti weyu le larugan lárigiñe lisedün luéyuri emeraaguni, ábame lóustarun dimí-san weyu. Ábameti hanügüni hidewese le iseri türigu lun Wabungiute, 17 hanügame húbiñegiñe, bián fein to tautu tubuidun-agei fulúaru to gaganatu lébini to hǘrütu kei burí widü líburu dimí keisi idewesei lánina furumiñeti lin nadü lun Wabungiute. 18 Úara tuma fein, hanügüba sedü harahüñü mudún ha ábanti irumu hau ha úati mégeiti hawagu, aban bágasu ñǘraügili, hama bián gábara, keisi adagaragüdüni gudawarügüti lun Wabureme, idewesei gudawarügüti le buiti líhemen lun, bóugudin luéi hidewese le fulúaruauti tuma diwéin.

19 —Híchuguba giñe aban liraüraü gábara keisi adagaragüdüni luagu figóu, hama bián harahüñü mudún ha ábanti irumu hau keisi adagaragüdüni lánina arandaruni. 20 Ábame ladagaragüdüniña fádiri animaalugu hagía keisi idewesei buídutimatiña ligibugiñe Bungiu, úara tuma fein to lídangiñetu furumiñeti lin nadü hama bián harahüñü mudún. Aban idewesei sagüráuti le yuuti houn fádirigu lira.

21 —Weyuméme ligía, gasu hadügün aban óundaraguni le sánduti, madügünbadün ni murusun wadagimanu hǘrüti weyu ligía. Laduraruba lúrudu le sun dan, lásügürüba hámagiñe agübürigu hamoun isaanigu furumiñeguarügü fulasu le ñein lumuti haganawa.

22 —Danme lachülürün lidaani alubahani, mabudabéi darí lumoun lagumuhóun ilaü bicharirugu, máluahanbeime sun uburébu le erederubei. Ígirabei habá gudemetiña hama terencha. Au Aburemeibei le Hubungiute.

23 Aba lariñagun Wabureme lun Moisesi:

24 —Ariñagabéi katei le houn Ísüraelina weyu furumiñeti lidan lisedün hati, ábame hefeduhan aban luéyuri emeraaguni luma aban óundaraguni sánduti le aritaguagülei lau tamuri fidu. 25 Gasu hágudun aban idewesei lun Bungiu, madügünbadün ni murusun wadagimanu le hǘrüti.

26 Aba lariñagun Wabureme lun Moisesi:

27 —Weyu diisi lídanmeme lisedün hati, ligíaba luéyuri ferudun. Gasu hadügün aban óundaraguni sánduti, ayunara huguyame weyu ligía, gudá huguyame aban idewesei lun Wabureme. 28 Madüga humá ni murusun wadagimanu weyu ligía, lugundun luéyuri ferudun, ligíaba weyu hibihini ferudun ligibugiñe Wabureme le Wabungiute. 29 Furumiñeguarügü le manügün lumuti weyu ligía lun ayunaruni, lagidarúba hádangiñe lumutuniña Bungiu. 30 Furumiñeguarügü giñe le awadigimariduti weyu ligía, nagumuchaguagüdübei.

31 —Madügünbadün ni aban wadagimanu. Laduraruba lúrudu le lun sun dan, lásügürüba hámagiñe agübürigu hamoun isaanigu lidan furumiñeguarügü fulasu le ñein lumuti haganawa. 32 Ábanbei luéyuri emeraaguni luma ayunaruni weyu ligía hun, habahüdübei lúmagiñe weyu nefu, rábounweyu lidan hati ligía, darí le aban weyu rábounweyu.

33 Aba lariñagun Wabureme lun Moisesi:

34 —Ariñagabéi katei le houn Ísüraelina: Lefeduhóuba tufedun dibasein weyu keinsi lídanmeme sedü hati luagu sedü weyu, 35 lau aban óundaraguni sánduti furumiñeti weyu, madüga humá ni aban wadagimanu hǘrüti weyu ligía. 36 Luagu sedü weyu le, gasu hágudun idewesei lun Wabureme, luagu liwidün weyu hadügüba aban óundaraguni sánduti gasu giñe hágudun aban idewesei lun Wabureme. Aban weyu lánina fedu, ani moun lumuti hadügün ni aban luwuyeri wadagimanu le hǘrüti.

37 —Anihán burí dan le areidúbei lun Wabureme, ligía burí dan le lunbei hadügün óundaraguni sánduti le ñeinba lubéi hadagaragüda idewesei gudawarügüti lun Bungiu, adagaragüdüni gudawarügüti, idewesei le fulúaruauti, adagaragüdüni luma idewesei tauti diwéin, según weyu le yuubei lun, 38 bóugudin luéi burí luéyuri emeraaguni lidan liri Wabureme luma burí edewehani luma idewesei le füramase hubéi o le lan híchugun ladüga habusenrun híchuguni.

39 —Wéyume keinsi lidan lisedün hati danme alubahaadün, ábame hadügün aban fedu le sédüti weyu lidan liri Wabureme, lau emeraaguni lidan furumiñeti luma liwidün weyu. 40 Lídanme furumiñeti weyu ábame hanügün lin lubuidun-agei tídibu wewe, tubana yaraüwa luma tubana tídibu wewe hilumatu luma álamu dúnaruguna, ábame hagundaarun luagu sedü weyu ligibugiñe Wabureme le Hubungiute. 41 Ságüme irumu lidan lisedün hati ábame hadügün aban fedu le sédüti weyu lidan liri Wabureme. Laduraruba lúrudu le lun sun dan, hásügüragüdübei agübürigu houn hasaanigu. 42 Lídanme sun sedü weyu ligía, sun huguya ha Ísüraelina le tímatimaati, tídanba dibasein haganawa, 43 Subudi hamaamugei sun hadügawagun luagu dan lan le nasagarunbaliña Ísüraelina Ehiptugiñe aganawagüda numutiña lan tidan dibasein. Au Aburemei le Hubungiute.

44 Ítara liña lasubudiraguagüdüniña Moisesi Ísüraelina houngua libügürü burí dan le areidúti lun Wabureme.