1 Aba lariñagun Wabureme lun Moisesi:

2 —Ariñagabéi katei le houn Ísüraelina: Sandu humá, lugundun sándutina au le Aburemei le Hubungiute.

3 —Inebe hamá lagübürigu kada aban lun.

—Inebelá giñe luéyuri emeraaguni hun. Au Aburemeibei le Hubungiute.

4 —Midin humá hárigi guáriua, madügün huguyame hubungiutegu ha láutiña gürabu. Au Aburemeibei le Hubungiute.

5 —Danme híchugun adagaragüdüni le lánina arandaruni nun, adüga huméi lidan aban igaburi le hínsiñeti nun. Au le Aburemei le Hubungiute. 6 Animaalu le adagarawagüdübei, gasu héigini lídanmeme weyu ligía, gayaraati giñe héigini larugan, gama lumoun le ígiraguti lubá lǘrüwan weyu, gasu lagudúniwa. 7 Anhein eigúa idewesei ligía luagu lǘrüwan weyu lanügǘba kei wíyeti, ani meresibirun lubéi Bungiu, 8 ani gürigia le éigibalin, lanügübei wuribani luouguoun ani lagidarúba hádangiñe líbirigu ladüga lawiyeduni le anuadirúaalibei lun Wabureme.

9 —Danme lachülürün lidaani alubahani, mabudabá darí lumoun lagumuhóun ilaü bicharirugu máluahanbeime le erederuti. 10 Mabudahabóun sun beibei to bichariruguboun, mabudahanbounme to éiguadutu; ígiraboun habá gudemetiña hama terencha. Au Aburemeibei le Hubungiute.

11 —Míweruha humá, meyeeha humá, meyeeragun humañame híbirigu.

12 —Madüga humá füramasei le málati lidan niri, lugundun lau lira, hawiyeduñein liri Hubungiute. Au Aburemeibei.

13 —Marofuda humá lun gürigia híledi, mabayurun humeime lumegen luéi.

—Meredera huméi lafayeiruaha le nadagimeinbei húmagua lubá le aban weyu.

14 —Míñaragua huméi dáühali.

—Míchiga humá lébuna chugeguaü lémerirugu marihinti. Arufuda huméi hinebenehabu lun Aburemei. Au Aburemeibei.

15 —Richagualá haguseragüdün danme hasiadihan; midin humá lúmagiñe le débilibei, ni lúmagiñe le gabafubei. Ragǘ humá luéigiñe irichaü danme hasiadihan.

16 —Madimureha humá marasualugu hadan híbirigu.

—Mádaragua humá hungua lidan lafarúniwa gürigia híledi hilagubei. Au Aburemeibei.

17 —Mareida humá iyereehabúni tidan hanigi lubá híbiri.

—Erereha humá lun gürigia híledi dan le lunti lan hererehan lun. Maramudagua humá lau lifigoun.

18 —Máguyugüda humá wuribani luagu wuribani, mariban tuguyame hanigi houn gürigia híledigu. Hínsiñehabu humá houn gürigia híledigu, ladüga ítara haña kéigubeirügü huguya. Au Aburemeibei.

19 —Adüga huméi le lubeibei nilurudun.

—Mamigisiragua humá aban hawuyeri hibiñanigu hama amu hawuyeri animaalugu.

—Mábunagua humá ámuñegueinarügü luwuyeri lila nadü hicharirugu.

—Madaüra humá daüguaü to tautu ámuñegueinarügü tuwuyeri gamisa.

20 —Anhein arounra aban wügüri tuma aban würi idamuni, to lidamun amu wügüri, anhein magañeihóungiru lubéi o mígirawagüdüngiru lan, gasu lafayeihan wügüri le aganóubei tuma, gama lumoun masiadirúnwabaña lun óunweni, lugundun gaburemetu würi tuguya. 21 Ábame líchugun wügüri ligía aban gábara keisi adagaragüdüni luagu duru lun Wabureme, ábame lanügüni tubenarin kianpu lánina óundaruni. 22 Lau mudún ligía keisi adagaragüdüni luagu duru, lamuriahaba fádiri luma Wabureme lun feruduna lani lifigoun wügüri ligía, ábame ferudunawa lan lifigoun.

23 —Danme hebelurun fulasurugún, bunagua huguyame nadü to geigúaditu tin, moun lumuti hátühanu ni héiginu tin luagu ǘrüwa irumu. 24 Luágume ligadürün irumu, lanuadirúba sun lin hinadürigu lun Bungiu lidan aban fedu, 25 luágume liseingün irumu, gayaraahalime héigini lin hinadürigu. Ítara luba gíntima lan hinadürigu. Au Aburemeibei le Hubungiute.

26 —Meiga humá ni kata le hátati.

—Maríaagüda humá, mouchun huguyame hariñaguni le lunbei lasuseredun.

27 —Másara huméi hídiburi rounu, míbugun humeime lígirugu hídiuma.

28 —Míbaagua humá hungua luéigiñe hilaali. Madibuha humá ni kata luagu hura. Au Aburemeibei.

29 —Mǘnabudaguagüdaboun biráü lau badügün lun tahoruhan. Maribadagüdabéi fulasu lau salufuri.

30 —Inebelá luéyuri emeraaguni hun inebetá nisanduariun hun. Au Aburemeibei.

31 —Midin humá álügüdaha hama garíaahatiña. Mawiyedaguagüda humá hungua lau hálügüdüniña. Au Aburemeibei le Hubungiute.

32 —Ráramaba arufuda báamugei binebenehabu houn wéiyaaña mutu. Arufudabéi lineben Bubungiute bun. Au Aburemeibei.

33 —Masufuriragüda huméi terencha le aganóuti haganagua. 34 Óusera huméi keisi aban hídangiñe, hínsiñela hun, ladüga ítara liña kei huguya. Terencha meha giñe huguya Ehiptu. Au Aburemeibei le Hubungiute.

35 —Míweruha humá lidan hamisurahan somu katei ni lidan imigifeni ni lidan ihürü. 36 Lunti hayusurun balansu úaraguati. Au Aburemeibei le Hubungiute, le asagarubalün Ehiptugiñe.

37 —Adüga huméi lubeiti le lubeibei nilurudun; gúnfuli huméi. Au Aburemeibei.