1 —Madüga humá guáriua ni iyawaü, míchugun huguyame dübü burí anuadirúati ni dübü burí féindiwati hageira lun háhuduragun ligibugiñe, lugundun au Aburemeibei le Hubungiute. 2 Inebelá luéyuri emeraaguni hun, inebetá nisanduariun hun, au Aburemeibei.

3 —Anhein hadüga le lubeibei nilurudun, gúnfuli humeime nugumadin, 4 nóunahaba huya hun lidan dan, ábame lagindun hinadürigu hicharirugu; 5 ñeinboun türigu huma darí talubahóun beibei, anuhame beibei darí lumoun lidaani bunaguaü; héigiba fein darí hakimuledun, darangilubadün hageira. 6 Níchuguba lubuidun dan hun hageira, harumuguba darangilu lugundun nesefurubei hageira hawéi animaalu gáñitiña luma luéi wuribu. 7 Héibaaguagüdübaña háganiñu, áfarawagua hagíame tau eféin higibugiñe, 8 hanurahaba san hawéi seingü hídangiñe, éibaagua hagíame diisi milu hawéi san hídangiñe, háfarawaguba háganiñu tau eféin higibugiñe. 9 Nóunigirubadün, nagibedaguagüdübadün, nagunfulirubei nidaradun huma. 10 Héigiba lídangiñe türigu le areidúañubei huma lúmagiñe binarü, darime lun hasagaruni lun hareiduni iseri türigu.

11 —Naganóuba haganagua, mágurun nubadün; 12 haganaguabadina súnwandan, auba Hubungiute huguyame nageira. 13 Au Aburemeibei le Hubungiute, le asagarubalün Ehiptugiñe, lun mámaadün lan hadamun Ehiptuna; halagua numuti ihürü le meha huágubei, aba néibugagüdünün iñurañu herebe.

14 —Gama lumoun ánhana maganbun humá magunfulirun huméi nugumadin, 15 lun meresibirun humani ani meberesen huguya lau nilurudun ani magunfulirun huguya ni aban lídangiñe nugumadin, adüraaguei nidaradun ítara 16 nadügübei giñe katei le hau: Nóunahabei nanufuna huagun, sandi gáfarahati, abiruaü, lisandi aguu, luma débili, úabei hu lan hun lun hábunagun nadü, lugundun halubahabei háganiñu. 17 Mámabadina húmagiñe, háfarahabadün háganiñu, háfarahabadün ha iyereehabúbaña hun, hanurahaba úouga éibaahatün.

18 —Ánhana maganbun humá lau sun lira, nabeichayabadün sedü wéiyaasu luagu hifigoun. 19 Nagünrinchagubei hupantan; nadügüba lun michu lan sielu huya hun marandarun ligíame múa hun. 20 Hewesirubei here luagu ni kata, lugundun marandarunbei múa hun, magindun ligíame burí tídibu wewe le áraabubei.

21 —Anhaün ítarameme eledegua nun, nabeichayabadün sédüya wéiyaasu lanwoun según hifigoun. 22 Nóunahaba animaalugu gáñitiña huagun lun hígirunün marahüñüga, lun háfaraguniña hibiñanigu luma lun háfaragun hídangiñe darime lun úaaña lan éibugutiña hémerirugu.

23 —Anhaün meberesen lau sun lira ani aba hasigirun eledegua nubá, 24 ábame giñe neledegun hubá ábayame nabeichagunün sedü wéiyaasu lanwoun luagu hifigoun. 25 Nóunahaba aban eféin huagun lun tafayeiragüdünün luagu nidaradun; héibaaguba aramudagua hageira, gama lumoun nóunahaba sandi hárigi ábame hábürühan labun habafu háganiñu.

26 —Danme nagumuchaguagüdüni heigin, hásürahaboun diisi würiña heigan fein lidan ábanrügü régigi, ani wéiribei hamurusuhanu darí lun héigiba lan, gama lumoun makimuledunbadün.

27 —Anhaün meberesen nau lau sun lira, ani aba hasigirun eledegua nubá, 28 neledeguba giñe hubá, ani lau nigañi ábayame nabeichagunün sédüya wéiyaasu lanwoun luagu hifigoun. 29 Wéiribei ilamaü darime lun héiginiña hirahüñü guánarügü. 30 Nagünrinchaguboun burí hisanduariun to wíyeboun bóuguaneime burí hani latarü, le ñein lubéi kupali lidan bián murusun ábame nóundaraguni húgubu danme hilaguaadün ligibuagun hágubu higuariuan ha mabagaribaña, ábame narufudun mebereseni hau; 31 nagünrinchagubei burí huburugute tuma burí hisanduariun, magundaarúndigiaadiname lau lubuidun líhemen hibiñe.

32 —Nagünrinchagubei hageira, taweiriduba hanigi háganiñu ha ñǘbuintiña aganawa ñein. 33 Nachagaragubadün haganagua néchanigu, néibaahabadün tau nefeinte, lerederuba hageira kei aban fulasu mageirawati luma huburugute lidan agadeiruni. 34 Ábameti lerederun múa darangilu sun dan le lunbei lerederun málouga, danme aünha lan hageira háganiñu; ítara luba lemeraagun luagu buga dan le memeraagun lubéi. 35 Sun dan le lunbei lerederun múa málouga lemeraagubei le meha memeraagun lubéi dan le meha ligibuaguñadün lan.

36 —Hame erederutiña wínwanñu hídangiñe lumúanrugu ágani, nádaruba saragu anufudei hadoun darime lun héibaagun láurügü liréin aban ubanaü dan le lábürühan; héibaaguba kamá hamuga héibaahouña tau eféin, hábürühaba úouga éibaahatiña. 37 Hachugeraguba hawougua kamá hamuga héibaaguña wuriburugugiñe íbini méibaahoun hamá; úabei ni aban hídangiñe araramuti ligibugiñe lágani! 38 Hagünrinchawaguba hadan néchanigu, lagumuchuba hageira háganiñu hau; 39 hámeti erederutiña wínwanñu hamúanrugu háganiñu, hóunweguba luagu hariban; hóunweguba úara hama hagübürigu luagu hariban hagübürigu!

40 —Íbini hánharun lun huriban luma hariban hagübürigu luma múaran humá, labu heledegun nun, 41 neledeguba giñe hubá ábame nanügünün hageiroun háganiñu; larariruba mafiñeradi le huágubei, ábame hafayeihan ñein luagu hifigoun. 42 Ábameti naritagun luagun daradu le nadügübei luma Hakobu, Isaakü luma Abüraámü, haritagua aume luagun múa, 43 le lunbei hígiruni ábame lemeraaguni sun burí dan ligía lídanme maganóun humá ñein, ábame hafayeirun luagu huriban ladüga híchugun mebereseni lau nilurudun luma lau nugumadin;

44 —Lau sun lira, íbinime hageirañadün lan háganiñu, mágurun nubadün; mígirun naünme máfaragun naünme, madüraagun nubéi giñe daradu le nadügübei hama hagüchagu, lugundun au Aburemeibei le Hubungiute. 45 Lubaragiñe lira haritaguarügübadina luagu daradu le nadügübei hama dan le nasagarunbaliña Ehiptugiñe aríagu néchanigu lun, lun Habungiutebadina lan. Au Aburemeibei.

46 Anihán burí lúrudu, dimurei luma arufudahani le líchigagüdübei Bungiu lun Moisesi houn Ísüraelina luagu wübü Sinaí.