1 —Anhein aguarúa luagu aban gürigia lun gefén lan luagu somu katei le larihin o laganbun, ani aba maha lan lariñaguni, lafigouhaña lau lira, ani gadurunbei.

2 —Anhein aguura aban gürigia somu katei le wíyeti, kei burí hamuga aban animaalu hilaali le wíyeti le áraabuna o le áüdübüna, o aban lan animaalu le aduruuharügüti múarugu le wíyeti, wíyebei giñe gürigia ligía, ani gadurunbei íbini ibidiñoun lan lun ladügei.

3 —Anhein aguura aban gürigia somu hawiye gürigia, furumiñeguarügü katei le gayaraati lawiyedagüdüni, gama lumoun mefenti luagu lidan oura ligía, anhein gefén luagu lárigiñegua gadurunbei.

4 —Anhein adüga aban gürigia aban áfiñuruni lau lóufudagun lun ladügün aban katei buiti o wuribati ítara burí kei lidan háfiñurun gürigia masaminarunga, gama lumoun mefenti luagu lidan oura ligía, anhein gefén luagu lárigiñe, gadurunbei luagu furumiñeguarügü lídangiñe katei le.

5 —Le asaliruti lau duru lidan furumiñeguarügü lídangiñe kesi le, gasu lagufeseruni figóu le ladügübei, 6 ani ábame lanügün aban animaalu würi hádangiñe libiñanigu lun ladagaragüdünu lun Wabureme luagu figóu le ladügübei, gayaraati ladagaragüdün aban mudún o aban lan gábara, lau adagaragüdüni ligía ábame libihini fádiri ferudun luagu lifigoun gürigia ligía.

7 —Anhein mebegi lubéi aban mudún ñǘraügili lun, lunti lanügün biama wagugua o biama lan harahüñü unhun lun Wabureme luagu figóu le ladügübei: Aban hádangiñe keisi adagaragüdüni luagu figóu, le aban keisi adagaragüdüni gudawarügüti. 8 Lunti lanügüni lun fádiri, ábame ladagaragüdüni fádiri le ichugúbei luagu figóu furumiñe, ábame laguribiduni ligiina gama lumoun magidarungalei lábulugu; 9 lárigiñeme ábame labahichaguni murusun lídangiñe lita adagaragüdüni luagun aban louba latarü, ábame láwiyuruni líbiri hitaü lugudina latarü, lugundun adagaragüdüni lan luagu figóu lira. 10 Ladügame aban adagaragüdüni gudawarügüti lau libiaman animaalu keisi igaburi; ítara luba libihini fádiri ferudun luagu lifigoun gürigia ligía, ábame ferudunawa lan lun.

11 —Anhein ua lubéi luma ni lun lagañeihan bián wagugua o bián lan harahüñü unhun, lunti lanügün gádürü líburu dimí fulúaru to tubuidun-agei fulúaru keisi idewesei luagu lifigoun. Moun lumuti líchugun garaba tidoun, míchugun ligíame kupali tigibuagu, lugundun idewesei tura luagu figóu. 12 Ábame lanügünu lun fádiri, ábame lanügün fádiri murusun tídangiñe keisi aritawaguagülei, ábame lágudunu lurugabu latarü úara luma burí idewesei le agudúbei lun Wabureme, aban idewesei lira luagu figóu 13 lun libihini fádiri ferudun luagu furumiñeguarügü figóu le ladügübei gürigia ligía, ábame ferudunawa lan lifigoun. Le ígiragubei, lánibei fádiri, ítara kei lidan idewesei le fulúaruauti.

14 Aba lariñagun Wabureme lun Moisesi:

15 —Gürigia le afigouhati mabusenrunga, aba lasalirun lau duru luagu ladügün le mámagu ligía lau katei sagüráuti le lani Wabureme, gasu lanügün aban mudún le úati mégeiti luagu hádangiñe libiñanigu lun Wabureme keisi adagaragüdüni luagu lidurun. Gasu lichugúniwa lebegi mudún ligía según igaburi le aubei ladügǘwa sanduariurugu. Aban idewesei luagu duru animaalu ligía. 16 Gasu lafayeirun gürigia ligía luagu wuribati le ladügübei lau burí katei anuadirúati lúmaya aban seingü lídangiñe san, ábame lederegeruni lun fádiri. Lárigiñe ábame ladagarawagüdün mudún luagu duru, ábame libihini fádiri ferudun luagu lifigoun gürigia ligía, ábame ferudunawa lan lifigoun.

17 —Anhein afigouha aban gürigia lau ladüraaguni lugumadin Wabureme, íbini mefén lan luagu, gadurunbei ani lunti labeichún luagu duru ligía. 18 Ligía lubeiti lunti lubéi lanügün aban mudún le úati mégeiti luagu hádangiñe libiñanigu, ábame badandiahani lebegi, ábame lanügǘn lun fádiri keisi adagaragüdüni luagu duru, lun libihini ferudun luagu figóu le ladügübei gürigia ligía mabusenrunga. Ani ábame ferudunawa lan figóu ligía. 19 Aban adagaragüdüni lira luagu duru, lugundun gadurunti gürigia ligía ligibugiñe Wabureme.