1 Aba lariñagun Wabureme lun Moisesi:

2 —Ariñagabá houn Ísüraelina luagu au lan Aburemeibei le Habungiute ani nóunahaña lan ariñaga houn: 3 Mafalara huméi hagaburi Ehiptuna, ha lílana fulasu le ñein lubéi meha haganawa.

Mafalara huméi igaburi le Kananbei, fulasu le ñéinhinba lubéi nanügaün, mabagaridun huguyame úaragua luma halurudun.

4 —Gúnfuli huméi nugumadin; adüga huméi le nubeibei, abagarida humá úaragua luma nilurudun. Au Aburemeibei le Hubungiute.

5 —Gúnfuli huméi nilurudun, le agunfuliruti, labagariduba. Au Aburemeibei.

6 —Moun lumuti lagamaridunu aban wügüri würi to hádangiñetu liduheñu. Au Aburemeibei.

7 —Mǘnabudaguagüdabei búguchi lau bagamaridunu búguchu; ladüga tuguya búguchuboun ani moun lumuti badügüni.

8 —Mǘnabudaguagüdabei búguchi lau bagamaridunu lúmari.

9 —Magamaridaboun bitu. Gayaraati bitu lan luéigiñe búguchi o tuéigiñe lan búguchu; húbiñe lan yebe tágurahoua o bóugudi lan tuéi huban, moun lumuti bagamaridunu.

10 —Mǘnabudaguagüdabá bungua lau bagamaridunu bibari to liráü biráü o tiráü lan biráü, moun lumuti bagamaridunu.

11 —Magamaridaboun tiráü lúmari búguchi, liráü búguchi tura, ani bitu, moun lumuti bagamaridunu.

12 —Magamaridaboun litu búguchi, ladüga ábanmeme mutu luma búguchi.

13 —Magamaridaboun tíbugaña o tamulelua búguchu lugundun ábanmeme gürigia tuguya tuma búguchu.

14 —Mǘnabudaguagüdabei biyaurite lau bagamaridunu lúmari, lugundun bóufuri tuguya.

15 —Magamaridaboun bídiñu, lugundun lúmari biráü tuguya, moun lumuti bagamaridunu.

16 —Mǘnabudaguagüdabei bíbugaña o bamulen lau bagamaridunu lúmari.

17 —Magamaridaboun aban würi tau sun tiráü, magamaridunbounme giñe tibari luéigiñe tiráü o tuéigiñe lan tiráü. Wíyeti igaburi lira, lugundun ábanmeme gürigia hagía.

18 —Manügabóun tíbugaña o tamulelua búmari búmarime, magamaridunbounme sun wínwangiru lan búmari luéi hagaganiragun hámagua.

19 —Magamaridabá würi dan le lauñoun lan tidaani.

20 —Marounrabá tuma lúmari amu gürigia, magamaridunbounme luéi bawiyedun lau katei ligía.

21 —Mederegerabá ni aban hádangiñe birahüñü keisi idewesei lun Moloku. Manabaguabéi liri Bubungiute ítara. Au Aburemeibei.

22 —Magamaridabá aban wügüri kamá hamuga aban würi, wíyeti katei lira.

23 —Magamaridabá aban animaalu luéi bawiyedun lau lira. Moun lumuti giñe tíchaagun würi tungua lun lagamaridunu aban animaalu. Wíyeti katei lira.

24 —Mawiyedaguagüda humá hungua lau ni aban lídangiñe katei le. Lau burí katei ligía hawiyedaguagüda gürigia ha lúnbaña nasagaruniña higibugiñegiñe, 25 rédeiti giñe hageira gürigia hagía wíyeñu; gama lumoun aguseragüda numutiña luagu hariban, aba lachagaruniña fulasu lílana luáriua. 26 Ánheinti huguya Ísüraelina, hama terencha ha aganóubaña haganagua, adüga huméi le lariñagubei nilurudun, madüga humá ni aban lídangiñe katei wíyeti le, 27 ladüga sun iwiyei le, adüga hamuti ha meha aganóubaña lidan fulasu ligía hubaragiñe, aba lerederun fulasu wíyeñu. 28 Machagaralaün fulasu luáriua ladüga hawiyeduni, ítara kei lachagaruniña gürigia ha aganóubaña ñein hubaragiñe! 29 Le adügüti furumiñeguarügü lídangiñe iwiyei le, lasagarúba hádangiñe lumutuniña Bungiu. 30 Adüga huméi lubeiti le lubeibei nugumadin, madüga huméi liwiye igaburi le adügǘbei hubaragiñe, mawiyedaguagüdün huguyame hungua lau. Au Aburemeibei le Hubungiute.