1 Aba lariñagun Wabureme lun Moisesi:

2 —Ariñagabéi katei le houn Ísüraelina: Danme labusenrun aban gürigia lafayeirun aban füramasei lun Wabureme keisi ebegi le lunbei líchuguni kada gürigia, 3 aban wügüri le weinti irumu lau lumoun ǘrüwa-wein, lafayeihaba dimí-san murusun pülata según tiseinsuna sanduariu, 4 anhein würi tubéi, tafayeihaba darandi murusun. 5 Gürigia ha lúmagiñeti seingü irumu hau lumoun wein, hafayeihaba wein murusun anhein wügüri lubéi, diisi anhein würi tubéi. 6 Irahüñü ha ábanti hati hau lumoun seingü irumu hafayeihaba wügüriña irahüñü seingü murusun, würiña irahüñü ǘrüwa. 7 Gürigia ha hiñugua hamaali ǘrüwa-wein irumu hafayeihaba wügüriña keinsi murusun, würiña diisi. 8 Anhein weiri lubéi tugudemen o lugudemen gürigia ligía lun lafayeiruni le lunbei lafayeiruni, ábame lanügǘniwa kesi le lumoun fádiri lun líridun amu ebegi le liyaraati gürigia le adügübalin füramasei.

9 —Habügürüti animaalu ha gayaraabei hadagarawagüdün lun Wabureme, sun animaalu le ederegeruti lun Bungiu lerederuba anuadirúañu, 10 ani siñabei lasansirun luagu amu animaalu ni le buítimati ni le wuribatimati. Ánheindügü hamuga ñein sánsiguaü, dandu animaalu le adagarawagüdübei kei le uágubei lasansirúa herederuba anuadirúañu.

11 —Aban animaalu le wíyeti le siñati ladagarawagüdün lun Wabureme, lanügüba animaalu ligía lun fádiri, 12 lun líriduni ebegi le lunbei lafayeihóun luagu, según ka lan luwuyeribei animaalu ligía. Gasu lánharun lun ebegi le líridun fádiri, 13 ánheinti busenwa lubéi libihín animaalu ligía lárigoun, gasu lafayeirun seingü lídangiñe san lanwoun fáyeiti le iridúbei.

14 —Anhoun lanúadira aban gürigia luban lun Bungiu, líridubei fádiri tebegi según ka lan tuwuyeri muna tuguya. Gasu lanharúniwa lun ebegi le líridubei fádiri. 15 Gama lumoun anhein busén le anúadirubarun muna libihinu tárigoun, gasu líchugun seingü lídangiñe san lanwoun ebegi le iridúbei, ábayame luban tan muna tuguya.

16 —Anhein anúadira aban gürigia murusun lídangiñe lufulasun lun Wabureme, ladandiahouba lebegi fulasu ligía según le liyaraati arandara, dimí-san murusun pülata luagu kada bián-san-wein líturu sebada. 17 Anhein lanúadira fulasu lúmagiñe irumu lánina esefuruni, ligiamémeba lebegi; 18 gama lumoun anhein lanúadira lárigiñe irumu le lánina esefuruni, ladandiahabei fádiri pülata le lunbei lafayeirun, ábame lasagaruni le lebegi dan le mégeigilibei luba irumu le lánina esefuruni lídangiñe ebegi le adandiahóubei.

19 —Anhein abusenra le anúadirubalin fulasu libihini lárigoun, gasu líchugun seingü lídangiñe san lanwoun ebegi le adandiahóubei, ábame laniméme lan fulasu; 20 gama lumoun anhein masaga lan, aba lalugurúniwa fulasu lun amu gürigia, siñaalime lesefuruni. 21 Danme le maburemeeli fulasu ligía lidan irumu lánina esefuruni, ábame lerederun lun layusurún lúnrügü Wabureme, ábame lárügüdüni fádiri.

22 —Anhein lanúadira aban gürigia aban fulasu le lagañeihan, le mama lalagante hámagiñe liduheñu lun Wabureme, 23 ladandiahabei fádiri luma gürigia ligía lebegi fulasu ligía lumoun lidaani esefuruni, lídanmeme weyu ligía ábame lafayeiruni ebegi le adandiahóubei luagu fulasu ligía, ábame lanúadiruni lun Wabureme. 24 Lagiribudawagüdüba fulasu ligía lun le alugurubalin lidan irumu lánina esefuruni o lunmeme labureme le tímatimaati.

25 —Sun badandiahan gasu séingübei lan güramu lagumeseha, ligía ihürü ǘnabutimabei lidan tubalansun sanduariu.

26 —Furumiñetiña harahüñü ibiñani, ha lánibaña Wabureme luagu furumiñetiña lan, moun lumuti lanúadiruniña ni aban. Gayaraati liraüraü lan bágasu o liraüraü lan mudún, lani Wabureme. 27 Anhein aban lubéi animaalu wíyeti, gayaraabei lesefurun según ebegi le iridúti luagu, lúmaya seingü lídangiñe san ligibuagun ebegi ligía. Gama lumoun anhein mesefurun, gayaraabei lalugurún luagu ebegi le iridúbei luagu.

28 —Anhein anúadira aban gürigia lídangiñe lumegen lun Wabureme, kei burí hamuga gürigia, animaalu o fulasu le lalagante hámagiñe liduheñu, siñabei lalugurúniwa ni kata anúadirawaali, sun katei ligía ábanbei katei sánduti le ederegeruti lun Wabureme. 29 Siñabei giñe lesefurun aban gürigia le siádiwaali lun lounwen.

30 —Diisi lídangiñe san, lídangiñe le líchugubei múa, dandu ilaü kei ídibu le gagindaditi lani Bungiu, ani anuadirúati lun. 31 Le abusenruti lesefurun lídangiñe diisi lídangiñe san ligía, gasu lafayeiruni lebegi lúmaya aban seingü murusun ligibuagun.

32 —Aban hádangiñe kada diisi ilügüniñaü gasu hanuadirúniwa lun Wabureme, 33 manúadahounga habuidun-agei ni hariban-agei, ni lasansirun aban luagu amu. Lun ladügün aban sánsiguaü, dandu animaalu le ichugúbei leweñegua le aban, herederuba anuadirúañu lun Wabureme, siñabeiti hesefurúniwa.

34 Anihán burí gumadi le líchugubei Wabureme lun Moisesi houn Ísüraelina luagu wübü Sinaí.