1 —Katei sánduti sun adagaragüdüni luagu duru. Anihán burí arufudahani libügürü: 2 Animaalu le lunbei ladagarawagüdün luagu duru, gasu libigúniwa ligiina lidan fulasu le ñein lubéi háfarawagua animaalugu ha ichugúbaña lun hagudúniwa, ábame labahichawagun hata, lóugiñe luma geyegua lau latarü. 3 Gasu ladagarawagüdün sun lagüle animaalu ligía: Le luágubei lili luma le luágubei lisasa, 4 biángubei riñón lau sun tagüle, luma agülei le lanaganwagubei luma le gagülebei luagu lubana, le lunbei lagidarúniwa úara luma riñón. 5 Ábame láguduni fádiri sun le luagu latarü keisi idewesei gudawarügüti lun Wabureme. Aban adagaragüdüni lira luagu duru 6 ani gayaraabei heigin sun fádirigu lídangiñe, gama lumoun gasu lidan lan aban fulasu le anuadirúati heigei, lugundun aban lan katei sánduti lira.

7 —Adagaragüdüni le luáguti duru, ítara liña kei adagaragüdüni luagu figóu, ábanmeme giñe arufudahanibei libügürü biángubei ligía. Le adagarawagüdübei, lánibei fádiri le eseriwidubei lidan ferudun. 8 Ítarameme giñe, fádiri le áfarubalin animaalu le anügǘbei lun adagaragüdüni gudawarügüti, gayaraabei lanügüni lura animaalu ligía lánime. 9 Lánibei giñe fádiri le eseriwidubei lidan adagaragüdüni sun idewesei fulúaruauti to ásürahoutu, to ábouagutu tuma to afuriduhóutu. 10 Ítarameme giñe, sun idewesei fulúaruauti, dandu le ñóunwaguati lau agülei kei le mábeiti, hánibei sun ladügawagun Aarón, ábanbei labu hafanran kada aban.

11 —Anihán burí arufudahani libügürü adagaragüdüni lánina arandaruni le anügǘbei lun Wabureme: 12 Anhein lánina lubéi eteingiruni adagaragüdüni ligía, tadagarawagüdüba giñe durudia maganatu lébini to añoundawagutu lau garaba, furidasi maganatu lébini lau garaba tuagu, tuma durudia to tautu tubuidun-agei fulúaru, to añoundawagutu lau garaba. 13 Tadagaruba giñe durudia gaganatu lébini úara luma adagaragüdüni lánina eteingiruni luma lánina arandaruni. 14 Lanügǘba murusun lídangiñe sun idewesei, ábame ladagarun lun Wabureme keisi ídehani, lánibeiti fádiri le abahichagubalin lita adagaragüdüni lánina arandaruni.

15 —Animaalu le adagaragüdüwabei lun eteingiruni luma arandaruni, gasu leigín lídanmeme weyu le ladagarawagüdün. Moun lumuti lareidúniwa ni murusun lídangiñe lubá le aban weyu. 16 Anhein lun lubéi lagunfulirúniwa aban füramasei ladagarawagüda animaalu ligía o aban lan idewesei le mébunati, gasu leigín weyuméme le ladagarawagüdün, gama lumoun gayaraabei leigín le ígiragubei larugan. 17 Anhein aniheingua lubéi lídangiñe úi ligía ǘrüwa weyu lárigiñe ladagarawagüdün gasu lagudúniwa súngubei. 18 Ani anhein eiga aban gürigia lídangiñe úi ligía le adagarawagüdübei lun arandaruni, luagu lǘrüwan weyu, meresibirúabei adagaragüdüni ligía, lanügǘba giñe úi ligía kei ni kata. Le éigiti lídangiñe lanügübei figóu ligía luouguoun.

19 —Ui le adagaruti luagu furumiñeguarügü katei le wíyeti, moun lumuti leigín, lunti lagudún. Sun ha harumabaña gayaraabei heigin úi.

20 —Anhein eiga gürigia le wíyeti ligibugiñe Bungiu lídangiñe úi le adagarawagüdüti lun arandaruni, le yuuti lun Wabureme, lagidarúba hádangiñe lumutuniña Bungiu.

21 —Gürigia le aguuruti furumiñeguarügü katei wíyeti, lani yebe gürigia o lani lan animaalu o furumiñeguarügü lan katei le moun lumuti laguuruni lárigiñe aba leigin úi lídangiñe le adagarawagüdübei lun arandaruni, le yuubei lun Wabureme, lagidarúba hádangiñe lumutuniña Bungiu.

22 Aba lariñagun Wabureme lun Moisesi:

23 —Ariñagabéi katei le houn Ísüraelina: Moun lumuti heigin ni lagüle bágasu, ni lagüle mudún ni lagüle gábara. 24 Gayaraati hayusuruni lagüle furumiñeguarügü animaalu óunweti o le háfarun animaalugu gáñitiña, gama lumoun mama lun héigini.

25 —Furumiñeguarügü le éigiti hagüle animaalugu ha adagarawagüdütiña lun Bungiu keisi idewesei gudawarügüti, lasagarúba hádangiñe lumutuniña Bungiu.

26 —Ñein lumuti haganawa moun lumuti heigin hata dunuru ni hata animaalugu. 27 Gürigia le éigiti furumiñeguarügü luwuyeri hitaü, lagidarúba hádangiñe lumutuniña Bungiu.

28 Aba lariñagun Wabureme lun Moisesi:

29 —Ariñagabá houn Ísüraelina le lan anügüti aban adagaragüdüni le lánina arandaruni; gasu lan lanügüni ligibugiñoun Wabureme. 30 Lunti lanügüni idewesei gudawarügüti ligía ligibugiñoun Wabureme, agülei le laniguagubei animaalu luma laniguagu animaalu ligía, lun hefeduhani ayudeihani le lánina arufudúni liñúarü Wabureme. 31 Ábame láguduni fádiri agülei luagu latarü, ánheinti laniguagu animaalu lunbei Aarón hama ladügawagun. 32 Hayadati animaalugu le hóunwenren ha adagarawagüdübaña lun arandaruni, lichugúba lun fádiri, keisi íderawaguni. 33 Iyadaü le óunwenrei ligía lunbei fádiri le arufudubalin agülei luma hitaü kei adagaragüdüni lánina arandaruni, 34 ladüga lídangiñe hadagaragüdün Ísüraelina le lánina arandaruni, suesi naali laniguagu animaalu keisi le buítimati, iyadaü keisi ídehani ani ru naali lun fádiri Aarón luma houn ladügawagun keisi le lunbei yu lan houn lídangiñe hadagaragüdün Ísüraelina.

35 Lídangiñe burí idewesei le agudúbei lidan liri Wabureme, anihán le yuubei lun Aarón hama ladügawagun lúmagiñe weyu le lanuadirúnbaliña Wabureme keisi lufadirinigu. 36 Ruti Wabureme gumadi houn Ísüraelina lun híchuguni burí katei le houn lúmagiñe weyu le líchugunbaliña fádirigume, ani lunti ítara luba lan ladügǘn súnwandan, lásügürüba hámagiñe agübürigu hamoun isaanigu.

37 Anihán burí arufudahani libügürü adagaragüdüni gudawarügüti, idewesei fulúaruauti, adagaragüdüni luagu figóu luma luagu duru, idewesei le lánina anúadiruni luma burí adagaragüdüni lánina arandaruni. 38 Lidan wübü Sinaí líchigei Wabureme lun Moisesi, dan le lariñagunbei houn Ísüraelina lidan fulasu mageirawati le lani Sinaí lun hanügüba lan idewesei lun.