1 —Anhein anüga aban gürigia aban bágasu hádangiñe lilügüniña lun ladügün adagaragüdüni le lánina arandaruni lun Wabureme, lunti ua lan mégeiti luagu animaalu ligía. 2 Le adügübalin idewesei, líchugubei lúhabu lábulugu animaalu le ladagaragüdübei, lárigiñe ábame líbuguni ligiina tubenari kianpu lánina óundaruni. Ábameti habahichaguni fádirigu lita lóugiñe luma geyegua lau latarü.

3 —Le anügübalin animaalu lun ladügün adagaragüdüni le lánina arandaruni lun Wabureme, gasu lanügüni agülei le luágubei lisasa animaalu ligía lun Wabureme keisi adagaragüdüni gudawarügüti, 4 lani riñón lau sun agülei le lanaganwagubei, luma le agülei le luágubei lubana le yebe lunbei lagidaruni úara luma riñón. 5 Ábame háguduni fádirigu sun katei le luagu latarü úara luma animaalu le lunbei lagudúniwa lidan watu gemeti, keisi idewesei gudawarügüti le buiti líhemen lun Wabureme.

6 —Anhein anüga aban gürigia aban animaalu hádangiñe libiñanigu lun Wabureme keisi adagaragüdüni lánina arandaruni, gasu úabei lan mégeiti luagu animaalu ligía, würi tan yebe o wügüri. 7 Anhein adagaragüda aban mudún ñǘraügili, danme lanügüni ligibugiñoun Wabureme, 8 ábame líchuguni lúhabu lábulugu, lárigiñe ábame líbuguni ligiina tubenari kianpu lánina óundaruni. Ábameti habahichaguni fádirigu lita animaalu ligía ligibuagu latarü luma geyegua lau.

9 —Le anügübalin animaalu lun adagaragüdüni le lánina arandaruni, gasu lanügüni lagüle animaalu ligía, lili animaalu ligía dayarügü, agülei le luágubei lisasa, 10 biángubei lani riñón, agülei le tuágubei luma le lanaganwagubei, luma agülei le luágubei lubana le lunbei lagidaruni úara tuma riñón keisi adagaragüdüni gudawarügüti lun Wabureme. 11 Ábame láguduni fádiri sun le ligibuagu latarü keisi idewesei éiginiauti le agudúti lun Wabureme.

12 —Anhein aban lubéi gábara lanügüboun lun ladagaragüdün, danme lanügünu ligibugiñoun Wabureme, 13 lunti líchuguni lúhabu tábulugu, ábame líbuguni tigiina tigibugiñe kianpu lánina óundaruni. Ábameti habahichaguni fádirigu hitaü ligibuagu latarü luma geyegua lau.

14 —Le adagaragüdübalin animaalu gayaraati lanügüni sun agülei le luágubei lisasa animaalu ligía lun láguduni keisi idewesei gudawarügüti lun Bungiu, 15 tau sun biángubei riñón, agülei le tuágubei, agülei le luágubei lanagan animaalu, luma lagüle lubana, le lunbei lagidaruni úara tuma riñón. 16 Lárigiñeme ábame láguduni fádiri sun katei le ligibuagu latarü keisi idewesei lánina éigini gudawarügüti le buíduti líhemen, sun agülei lunti Wabureme.

17 —Lúrudu le, lunti ladurarun lun sun dan, lunti harufudahani agübürigu houn isaanigu furumiñeguarügü fulasu le ñein lumuti haganawa: Meiga humá agülei ni hitaü.